約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
8:1 犯姦淫ê Cha-bó͘人
耶穌去橄欖山。
8:2 隔tńg早起透早，耶穌koh去聖殿。群眾lóng來祂hia，祂to̍h坐落來kā in教示。
8:3 經學教師kah法利賽派ê人chhōa一个chabó͘人來，她teh行姦淫ê時hō͘人掠tio̍h。 In hō͘她khiā tī中央，
8:4 然後對耶穌講：「老師，chitê chabó͘人是tú teh行姦淫ê時hō͘人掠tio̍h。
8:5 摩西ê律法命令咱，tio̍h用石頭kā chit款chabó͘人tìm死，taⁿ祢想án怎？」
8:6 In講ánne是beh試探耶穌，ài beh chhōe孔縫kā祂告。耶穌就àⁿ落去，用指頭á tī土腳寫字。
8:7 In一直問bē soah。耶穌to̍h khiā起來，對in講：「Lín中間無罪ê人thang先用石頭kā她tìm。」
8:8 耶穌koh àⁿ落去，用指頭á tī土腳寫字。
8:9 In聽tio̍h chiahê話了後，tùi老ê到少年ê，一个一个溜出去，chhun耶穌kakī 一个留tī hia。Hitê cha-bo͘人猶原khiā tī hia，
8:10 耶穌khiā起來，kā她講：「Cha-bó͘人，in hiahê人去tī tó位？無人kā你定罪，是無？」
8:11 Cha-bó͘人應講：「先生ah，無半人。」耶穌講：「我mā無beh kā你定罪，你thang tńg去，taⁿ以後m̄ thang koh犯罪。」
8:12 耶穌是世間ê光
耶穌koh對群眾講：「我是世間ê光。Tòe我ê人無tī烏暗中生活，顛倒ē有活命ê光。」
8:13 法利賽派ê人to̍h kā祂講：「祢teh為kakī 做見證，祢ê見證無效。」
8:14 耶穌應講：「我雖然為kakī 做見證，我ê見證mā是有效，因為我知kakī tùi tó位來，beh去tó位；lín m̄知我tùi tó位來，beh去tó位。
8:15 Lín用人ê標準判斷人；我無kā人判斷。
8:16 我若判斷人，我ê判斷是正確ê，因為我m̄是kakī teh審判，是差派我來ê天父kah我做伙teh審判。
8:17 Koh再講，照lín ê律法ê記載，有兩人ê見證to̍h有效。
8:18 我為kakī 做見證，差派我來ê天父mā 為我做見證。」
8:19 Into̍h問耶穌講：「祢ê天父tī tó位？」耶穌應講：「Lín m̄ bat我，mā m̄ bat我ê天父。Lín若bat我，mā ēbat我ê天父。」
8:20 耶穌tī聖殿教示人，tī奉獻箱ê邊á講chiahê話，mā無人kā祂掠，因為祂ê時iáu未到。
8:21 我Beh去ê所在Lín Bē tàng去
耶穌koh kā in講：「我beh離開ā，lín會chhōe我，lín mā ē為tio̍h kakī ê罪來死。我beh去ê所在，lín bē tàng去。」
8:22 Hiahê偤太人講：「祂講：『我beh去ê所在，lín bē tàng去。』，kám講祂beh去自殺？」
8:23 耶穌kā in講：「Lín是tùi下面來，我是tùi頂面來。Lín是屬tī chit世間，我無屬chit世間。
8:24 所以，我chiah kā lín講，línē為tio̍h kakī ê罪來死；因為lín若m̄信我to̍h是hit位，línē死tī lín ê罪惡中。」
8:25 Into̍h問耶穌：「祢是啥人？」耶穌應講：「我tùi起頭to̍h kā lín講過à。
8:26 關係lín ê tāichì，我有真chē thang講，thang kā lín定罪；獨獨差派我來ê hit位是真實，我kā tùi祂所聽tio̍h ê傳hō͘世間。」
8:27 In無了解耶穌對in講ê是teh指天父。
8:28 所以，耶穌kā in講：「Lín舉起人子ê時，to̍h知我是hit位。我所做ê tāichì無一項是照kakī ê意思，lóng是照天父教示我ê來講。
8:29 差派我來ê hit位kah我同在，祂無放我kakī 一个，因為我不時teh做祂所歡喜ê tāichì。」
8:30 耶穌講chiahê話ê時，有真chē人信祂。
8:31 真理ē hō͘ Lín得tio̍h自由
耶穌to̍h對信祂ê偤太人講：「Lín若tiāⁿ-tiāⁿ 遵守我ê道理，to̍h真正是我ê門徒。
8:32 Lín會bat真理，真理ē hō͘ lín得tio̍h自由。」
8:33 Hiahê人應祂講：「阮是亞伯拉罕ê kiáⁿ孫，從（chêng）到taⁿ m̄ bat做人ê奴隸，祢ná ē講：『Línē得tio̍h自由？』」
8:34 耶穌應講：「我實在kā lín講，犯罪ê人to̍h是罪ê奴隸。
8:35 奴隸無永遠屬tī主人ê家庭，kiáⁿ就永遠屬hitê家庭。
8:36 所以，上帝ê Kiáⁿ若hō͘ lín自由，lín to̍h真正自由。
8:37 我知lín是亞伯拉罕ê kiáⁿ孫，獨獨lín想behthâi我，因為lín m̄接受我ê道理。
8:38 我是遵照我tùi天父hia看tio̍h ê來講；lín是tùi lín ê父hia聽tio̍h ê來做。」
8:39 Lín ê父是魔鬼
Hiahê人應祂講：「阮ê祖先是亞伯拉罕。」耶穌kā in講：「Lín若是亞伯拉罕ê kiáⁿ孫，lín會做亞伯拉罕所做ê tāichì。
8:40 Taⁿ我kā tùi上帝所聽ê真理來kā lín講，lín soah behthâi我；亞伯拉罕並無做chit款tāichì。
8:41 Lín是teh做lín ê父所做ê tāichì。」Hiahê人應講：「阮m̄是不義ê kiáⁿ兒，上帝是阮唯一ê天父。」
8:42 耶穌kā in講：「上帝若真正是lín ê天父，lín會疼我，因為我是tùi上帝hia來ê，chitmá tī chia。我m̄是照我kakī ê意思來，是上帝差派我來ê。
8:43 Lín ná ē bē明白我ê話？是因為我ê道理lín聽bē入去。
8:44 Lín ê父是魔鬼，lín kantaⁿ想beh實行lín老父ê私慾。伊自起頭to̍h是thâi人ê兇手，無遵守真理，因為伊心內無真理。講白賊是伊ê本性，因為伊是講白賊ê人，mā是講白賊ê老父。
8:45 因為我講真理，lín chiah m̄信我。
8:46 Lín中間啥人ē tàng指責我有罪？我若講真理，lín ná ē m̄信我？
8:47 屬上帝ê奴僕聽上帝ê話。Lín m̄聽，因為lín m̄是屬上帝ê奴僕。」
8:48 亞伯拉罕Iáu未出世，我To̍h存在
Hiahê偤太人應耶穌講：「阮講祢是撒瑪利亞人，koh hō͘邪神附身，kám m̄ tio̍h？」
8:49 耶穌應講：「我m̄是hō͘邪神附身，我是尊敬我ê天父，m̄ koh，lín顛倒侮辱我。
8:50 我無求kakī ê榮光，有一位teh替我求，koh做chit項tāichì ê審判者。
8:51 我實在kā lín講，人若遵守我ê道理，就永遠bē死。」
8:52 亞伯拉罕kah耶穌
Hiahê偤太人應講：「Taⁿ阮知祢是hō͘邪神附身。亞伯拉罕死à，眾先知mā死à，m̄ koh，祢講：『人若遵守我ê道理就永遠bē死！』
8:53 祢kám ē比阮ê祖先亞伯拉罕khah偉大？伊已經死，眾先知mā死；祢想講祢是啥人？」
8:54 耶穌應講：「我若榮光kakī ，我ê榮光to̍h無價值；榮光我ê是我ê天父，to̍h是hit位lín所講ê lín ê上帝。
8:55 Lín m̄ bat祂，獨獨我bat祂。我若講我m̄ bat祂，我to̍h kah lín仝款是teh講白賊；獨獨我bat祂，mā遵守祂ê道理。
8:56 Lín ê祖先亞伯拉罕歡喜teh thèng候我來臨ê日子，伊有看tio̍h，koh看了真歡喜。」
8:57 Hiahê偤太人對耶穌講：「祢iáu未五十歲，kám bat看tio̍h亞伯拉罕？」
8:58 耶穌應講：「我實在kā lín講，亞伯拉罕iáu未出世，我to̍h存在（註：原文是「我是」，約翰福音有真chē位用耶穌kakī 講「我是」來表現祂ê神性，本節是siōng明顯ê例。作者若kantaⁿ beh表達「亞伯拉罕iáu未出世，耶穌to̍h存在」，ánne，chitê 「存在/我是」ê希臘文動詞應該是過去式，m̄ koh chia是現在式。作者用chit種怪怪ê文法，讀者chiah ē注意chit兩字[我是]有無平凡ê意義。）」
8:59 Hiahê偤太人to̍htheh8石頭beh kā祂tìm，m̄ koh，耶穌閃開，tùi聖殿出去。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。