約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
6:1 耶穌hō͘五千人食飽
(太14：13-21；可6：30-44；路9：10-17)
Chiahê tāichì以後，耶穌過去加利利湖，to̍h是Tî-bé-lī-a湖ê hit-pêng。
6:2 有真chē人tòe耶穌去，因為in有看tio̍h祂醫好病人ê神跡。
6:3 耶穌peh上山，kah祂ê門徒做伙坐tī hia。
6:4 偤太人ê Pôaⁿ過節teh beh到。
6:5 耶穌gia̍h頭看tio̍h真chē人對祂行óa來，to̍h kā腓力講：「咱beh去tó位買餅來hō͘ chiahê人食？」
6:6 耶穌講ánne是teh試探腓力，因為耶穌kakī 知teh beh做ê tāichì。
6:7 腓力應講：「用兩百個銀á來買餅，mā無夠hō͘ in ta̍k人食淡薄á。」
6:8 另外一个門徒，to̍h是西門彼得ê小弟安得烈，kā耶穌講：
6:9 「Chia有一个gín-á，伊有五塊大麥餅kah兩尾魚，總是，kā chiahê hō͘ hiah chē人食，ná有夠？」
6:10 耶穌講：「Lín叫hiahê人坐落去。」Hit所在真chē草，眾人to̍h lóng坐落去，kantaⁿ chapo͘人to̍h有五千人。
6:11 耶穌the̍h hiahê餅來祝謝了後，就分hō͘坐tī hia ê人；魚mā是ánne分，chhut-chāi in食。
6:12 眾人lóng食飽了後，耶穌kā門徒講：「Kā食chhun落來ê屑á拾起來，m̄ thang phahsńg。」
6:13 Into̍h kā食chhun落來ê餅屑á拾起來，所有ê貯滿十二籃。
6:14 眾人看tio̍h耶穌所行ê神跡to̍h講：「Chitê真正是teh beh來chit世間ê先知。」
6:15 耶穌知影眾人teh beh來強迫祂做王，就kakī 一个退去山裡。
6:16 耶穌行水面
(太14：22-27；路6：45-52)
黃昏ê時，耶穌ê門徒落去到湖邊。
6:17 In坐船beh過湖去迦百農hit-pêng。天已經暗，耶穌iáu未到in hia。
6:18 因為透大風，風湧ná來ná大。
6:19 門徒划船差不多行五六公里ê時，看tio̍h耶穌tī湖面teh行，ná來ná óa近船，in to̍h起驚。
6:20 M̄ koh，耶穌對in講：「是我là，m̄免驚！」
6:21 門徒to̍h歡喜接祂上船，船liâmpiⁿ to̍h到in beh去ê所在。
6:22 耶穌是活命ê餅
隔tńg工，iáu tī湖hit-pêng岸ê群眾，看tio̍h hia kantaⁿ一隻船á，耶穌mā無kah門徒做伙坐hit隻船，只有門徒kakī 去。
6:23 總是，有幾隻船á tùi Tî-bé-lī-a來，到óa近前主祝謝了後分餅hō͘群眾食ê所在。
6:24 群眾看tio̍h耶穌kah門徒lóng無tī hia，to̍h坐hit幾隻船á過去迦百農chhōe耶穌。
6:25 群眾tī湖ê hit-pêng岸chhōe tio̍h耶穌，to̍h問祂講：「老師，你tang時到chia？」
6:26 耶穌應講：「我實在kā lín講，lín chiahê人chhōe我，是因為食餅食到飽，m̄是因為看tio̍h神跡。
6:27 M̄-thang為tio̍h ē敗壞ê食物來勞苦，tio̍h為久長tī ·leh ê永遠活命ê食物來phah拚，to̍h是人子beh hō͘ lín ê，因為天父上帝已經kā祂蓋印認定。」
6:28 群眾to̍h問耶穌講：「阮beh完成上帝ê工作應該tio̍h án怎來做？」
6:29 耶穌應講：「信上帝差派來ê hit位，to̍h是teh做上帝ê工。」
6:30 群眾to̍h講：「祢行啥物神跡hō͘阮看，thang hō͘ 阮來信祢？祢beh做ê工是啥物？
6:31 阮ê祖先tī曠野食嗎哪，tútú照經典所記載：用tùi天來ê餅hō͘ in食。」(註：詩78：24)
6:32 耶穌to̍h kā in講：「我實在kā lín講，m̄是摩西用tùi天來ê餅hō͘ lín食，是我ê天父用tùi天來ê真ê餅hō͘ lín。
6:33 因為上帝ê餅，to̍h是hitê tùi天落來，mā是賜活命hō͘世間ê餅。」
6:34 群眾to̍h對耶穌講：「先生，請祢時常賞賜chit款餅hō͘阮。」
6:35 耶穌kā in講：「我是活命ê餅。來我chia ê人絕對bē iau，信我ê人永遠bē嘴乾。
6:36 M̄ koh，我bat kā lín講：「Lín已經有看tio̍h我，猶原m̄信。
6:37 天父所交帶我ê人lóngē來我chia；來我chia ê人，我絕對bē kā伊棄sak。
6:38 因為我tùi天降落來，m̄是beh照kakī ê意思做tāichì，是beh完成差派我來ê hit位ê旨意。
6:39 差派我來ê hit位ê旨意to̍h是：祂所交帶我ê人，一个都 bē用得失落。Tī末日我ē hō͘伊koh活。
6:40 因為我ê天父ê旨意to̍h是：所有看tio̍h Kiáⁿ來信祂ê人，lóng有永遠ê活命，我tī末日mā ē hō͘伊koh活。」
6:41 偤太人因為耶穌有講：「我是tùi天降落ê餅」，就七嘴八舌講：
6:42 「Chitê kám m̄是約瑟ê kiáⁿ耶穌？祂ê父母是咱所bat ê。Chit-má祂ná ē講：『我是tùi天降落來ê』？」
6:43 耶穌應講：「Lín m̄ thang ánne nga̍uh-nga̍uh念。
6:44 若m̄是差派我來ê天父引chhōa，無人ē來我chia。來我chia ê人，tī末日，我ē hō͘伊koh活。
6:45 先知ê冊有記載：眾人lóng ē接受上帝ê教示。(註：賽54：13)所有tùi天父聽tio̍h來學習ê人lóngē來我chia。
6:46 這m̄是講有人bat看tio̍h天父，只有tùi上帝hia來ê hit位bat看tio̍h天父。
6:47 我實在kā lín講，信ê人有永遠ê活命。
6:48 我是活命ê餅。
6:49 Lín ê祖先tī曠野食嗎哪，in mā是死去。
6:50 這to̍h是tùi天降落ê餅，hō͘人食了bē死。
6:51 我to̍h是tùi天降落hitê活ê餅，人若食chitê餅to̍h ē永遠活leh。我所beh hō͘人ê餅to̍h是我ê肉，是為tio̍h beh hō͘世間有活命來獻ê。」
6:52 因為ánne，偤太人to̍h互相爭論，講：「Chitê人ná ē用祂ê肉hō͘咱食？」
6:53 耶穌對in講：「我實在kā lín講，lín若無食人子ê肉，無lim祂ê血，lín ê內面to̍h無活命。
6:54 食我ê肉，lim我ê血ê人，有永遠ê活命，tī末日，我ē hō͘伊koh活。
6:55 我ê肉是真實ê食物，我ê血是真實ê飲料。
6:56 食我ê肉，lim我ê血ê人，伊tiàm tī我內面，我mā tiàm tī伊內面。
6:57 永活ê天父差派我，我為天父來活；親像ánne，食我ê肉ê人ē因為我來活。
6:58 這是tùi天降落ê餅，m̄是親像lín祖先所食ê 嗎哪，in食了mā是死去；食我chitê餅ê人ē永遠活leh。」
6:59 Chiahê是耶穌tī迦百農ê會堂教示人ê時講ê話。
6:60 永遠活ê話
耶穌ê門徒有真chē人聽了to̍h講：「Chiahê話真困難明白koh鑿耳，啥人聽會落去？」
6:61 耶穌心內知影門徒因為chitê tāichì teh nga̍uh-nga̍uh念，to̍h kā in講：「Chiahê話惹tio̍h lín，是無？
6:62 Án-ne，lín若看tio̍h人子升到祂原來ê所在，línē án怎？
6:63 賜活命hō͘人ê是聖神，肉體無啥物路用。我kā lín講ê話，是tùi賜活命ê聖神來ê。
6:64 M̄ koh，lín中間有人m̄信。」因為耶穌tùi起頭to̍h知影啥人m̄信，啥人beh kā祂出賣。
6:65 耶穌koh講：「因為ánne，我bat kā lín講，若m̄是天父允准，無人ē tàng來我chia。」
6:66 因為ánne，門徒中間有真chē人離開，無koh tòe耶穌行。
6:67 耶穌to̍h對十二使徒講：「Lín mā beh離開，是無？」
6:68 西門彼得應講：「主ah，祢有永遠活命ê話，阮tio̍h koh去tòe啥人？
6:69 阮已經信，koh確實知祢是上帝ê聖ê。」
6:70 耶穌應講：「我kám m̄是揀lín十二人？Lín中間mā有一个是魔鬼！」
6:71 耶穌講ánne是teh指加略人西門ê kiáⁿ偤大，伊是十二使徒ê一个，teh beh出賣耶穌。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。