約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 耶穌kah撒馬利亞ê婦人人
法利賽派ê人聽tio̍h耶穌比約翰招tio̍h khah chē門徒，mā kā khah chē人洗禮。
4:2 其實耶穌kakī 無kā人洗禮，是祂ê門徒kā人洗禮。
4:3 耶穌聽tio̍h chitê tāichìto̍h離開偤太，koh tńg去加利利省。
4:4 祂tio̍h經過撒馬利亞。
4:5 耶穌來到撒馬利亞一个叫做敘加ê城，chitê城óa近雅各hō͘伊ê kiáⁿ約瑟ê hit塊地；tī hia有雅各ê水井。
4:6 耶穌行路行kah真倦，to̍h坐tī井邊；hit時差不多是中晝。
4:7 有一个撒馬利亞ê婦人人來chhiūⁿ水，耶穌kā她講：「水分我lim一下。」
4:8 Hit時，祂ê門徒已經入去城內買食物。
4:9 撒馬利亞ê婦人人kā祂講：「祢是偤太人，ná ē對我—撒馬利亞ê婦人人討水lim？」Hit當時，偤太人kah撒瑪利亞人無往來。
4:10 耶穌應講：「你若知上帝hō͘人ê恩賜，koh知對你講『水分我lim一下』ê是啥人，你一定ē kā祂求，祂ē kā活水hō͘你。」
4:11 婦人人講：「先生，祢無chhiūⁿ水ê器具，井koh深，祢beh tùi tó位得tio̍h活水？
4:12 阮ê祖先雅各留chit口井hō͘阮，伊kakī kah kiáⁿ孫以及chengseⁿ，lóng lim chit口井ê水。祢kám ē比雅各khah偉大？」
4:13 耶穌應講：「Lim chit口井水ê人lóng ēkoh嘴乾，
4:14 獨獨lim我所beh hō͘伊lim ê水ê人，永遠bē koh嘴乾。因為我所beh hō͘伊lim ê水，tī伊ê內面會成做水泉，一直chhèng起來，hō͘伊得tio̍h永遠ê活命。」
4:15 婦人人講：「先生，請hō͘我chitê水，我chiah bē koh嘴乾，mā免koh來chiah遠chhiūⁿ水。」
4:16 耶穌kā她講：「去叫lín翁來chia。」
4:17 婦人人應講：「我無翁。」耶穌kā她講：「你講無翁，無m̄ tio̍h。
4:18 你bat有五個翁，taⁿ kah你同居ê m̄是你ê翁；你ánne講無m̄ tio̍h。」
4:19 婦人人kā祂講：「先生，我看祢是先知。
4:20 阮祖先tī chitê山敬拜，m̄ koh，lín講耶路撒冷chiah是敬拜ê所在。」
4:21 耶穌kā她講：「婦人人，tio̍h信我，時beh到à。Hit時，lín bē tī chitê山，mā bē tī耶路撒冷敬拜天父。
4:22 Lín m̄知lín teh敬拜啥物，阮知阮teh敬拜啥物，因為拯救是對偤太人出來ê。
4:23 M̄ koh，時teh beh到，現今to̍h是。真正敬拜ê人，ē用心神kah真誠來敬拜天父，因為天父ài chit款人敬拜祂。
4:24 上帝是神，敬拜祂ê人tio̍h用心神kah真誠來敬拜。」
4:25 婦人人kā祂講：「我知基督teh beh來臨。祂若到，ē kā一切ê tāichì kā阮講。」
4:26 耶穌kā她講：「Chit-má teh kah你講話ê to̍h是。」
4:27 Hit時，耶穌ê門徒tńg來，in看tio̍h耶穌kah婦人人teh講話，感覺奇怪，獨獨無人問婦人人講：「你beh創啥物？」á是問耶穌講：「祢ná ē kah婦人人講話？」
4:28 婦人人to̍h kā水瓶放hē ·leh，入去城內kā人講：
4:29 「Lín來看，chitê人kā我過去ê tāichì lóng kā我講。Chitê人kám to̍h是基督？」
4:30 Into̍h出城beh去看耶穌。
4:31 Hit時，門徒kā耶穌講：「老師，來食。」
4:32 M̄ koh，耶穌應講：「我有lín所m̄知ê食物thang食。」
4:33 門徒to̍h問來問去，講：「Kám有人hō͘祂食物？」
4:34 耶穌kā in講：「遵照差派我來ê hit位ê旨意，koh完成祂ê工作，to̍h是我ê食物。
4:35 Lín kám無ánne講：『Koh四月日to̍h有thang收成ā』？我kā lín講，lín看四面ê田園，五穀已經熟，thang收成ā。
4:36 收成ê人已經teh領工錢，koh為tio̍h永遠ê活命teh積聚五穀，hō͘掖種ê人kah收割ê人做伙歡喜。
4:37 因為俗語講：『一个掖種，另外一个收成』，實在講了真tio̍h。
4:38 Lín無勞苦耕作ê田園，我差 lín去收成；lín享受別人勞苦耕作ê成果。」
4:39 Hitê城有真chē撒瑪利亞人信耶穌，因為hitê婦人人見證講：「Chitê人kā我過去ê tāichì lóng kā我講。」
4:40 所以，撒瑪利亞人來見耶穌，求祂kah in tòa，祂to̍h tī hia tòa兩日。
4:41 因為聽tio̍h耶穌ê道理，來信ê人koh khah chē。
4:42 Hiahê人kā婦人人講：「阮taⁿ m̄是tùi你ê話來信，是因為阮親身聽tio̍h耶穌ê道理，阮知祂真正是世間ê救主。」
4:43 耶穌醫好官員ê Kiáⁿ
(太8：5-13；路7：1-10)
兩日後，耶穌離開hia去加利利省。
4:44 因為耶穌kakī bat講：「先知tī kakī ê故鄉bē受尊重。」
4:45 耶穌來到加利利省ê時，加利利人kā祂歡迎，因為chiahê人去耶路撒冷過Pôaⁿ過節ê時，mā有看tio̍h祂tī節期中一切所做ê tāichì。
4:46 耶穌koh來到加利利省ê迦拿，to̍h是祂kā水變做酒ê所在，tī hia有一个迦百農官員ê kiáⁿ破病。
4:47 伊聽見耶穌tùi偤太省來到加利利省，to̍h去求祂落去迦百農醫治伊ê kiáⁿ，因為伊ê kiáⁿ teh beh死à。
4:48 耶穌kā伊講：「Lín若無看tio̍h神跡奇事，一定m̄信。」
4:49 Hitê官員應講：「先生，趁我ê細kiáⁿ iáu未死，緊來去。」
4:50 耶穌kā伊講：「你tńg去，你ê kiáⁿ bē死。」Hitê人相信耶穌kā伊講ê話，to̍h tńg去。
4:51 伊tī路中tú tio̍h伊ê奴僕，奴僕kā伊講伊ê kiáⁿ活起來à。
4:52 伊to̍h問in伊ê kiáⁿ是tang時chiah好起來，in應講：「昨昏下晡一點，熱就退。」
4:53 老父知影hit時tútú是耶穌講：「你ê kiáⁿ bē死。」ê時。伊kakī kah全家ê人to̍h lóng信耶穌。
4:54 這是耶穌tùi偤太省來到加利利省以後，所行ê第二pái神跡。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。