約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
2:1 Ka-ná ê Hun-iàn
Tē-saⁿ ji̍t, tī Ga-lí-la-iah séng ê Ka-ná ū hun-iàn, I-é-su ê lāu-bú ū chham-ka.
2:2 I-é-su kah bûn-tô͘ mā hō͘ in chhiáⁿ khì hù chit-ê hun-iàn.
2:3 Chiú lóng lim-liáu ê sî, I-é-su ê lāu-bú chiū tùi I kóng, " In bô chiú à. "
2:4 I-é-su ìn kóng, " Lāu-bú, che kah lí góa ū siáⁿ-mi̍h koan-hē? Góa ê sî iáu-bōe kàu. "
2:5 I-é-su ê lāu-bú hoan-hù chhe-ēng ê lâng kóng, " Lín tio̍h chiàu I kā lín kóng ê khì chò. "
2:6 Chiàu Iô-tá-iah lâng kiat-chēng ê lé-gî, tī hia ū pâi la̍k-ê chio̍h-àng, ta̍k-ê ē-tàng té chha-put-to chi̍t-pah kong-seng.
2:7 I-é-su kā chhe-ēng ê lâng kóng, " Ēng chúi kā chiahê chio̍h-àng té hō͘ i tīⁿ. " In chiū kā chúi tò ji̍p-khì chio̍h-àng, tó kah móa-móa.
2:8 Jiân-āu I-é-su koh kā in kóng, " Taⁿ lín tio̍h kā chúi iúⁿ chhut-.lâi, phâng khì hō͘ pān toh ê hū-chek-jîn. " In chiū phâng khì hō͘ i.
2:9 Pān-toh ê hū-chek-jîn chi̍t ē tam tio̍h piàn-chò chiú ê chúi, m̄-chai chit-ê chiú tùi tó-ūi lâi, to̍k-to̍k iúⁿ chúi ê chhe-ēng chai. Pān-toh ê hū-chek-jîn chiū kiò sin-lông lâi,
2:10 Kā i kóng, " Lâng lóng sī seng chhut hó chiú, kàu lâng-kheh lim kàu chùi chiah chhut khah bái ê chiú, lí tian-tò kā siōng hó ê chiú lâu kàu chitmá "
2:11 I-é-su tī Ga-lí-la-iah séng ê Ka-ná kiâⁿ chit-ê thâu chi̍t pái ê sîn-jiah, lâi hián-chhut I ê êng-kng, I ê bûn-tô͘ chiū lóng sìn I.
2:12 Chit-ê tāichì í-āu, I-é-su kah I ê lāu-bú, hiaⁿ-tī í-ki̍p I ê bûn-tô͘ lo̍h-khì Ka-peh-ná-um, in tī hia tòa bô kúi ji̍t.
2:13 I-é-su Chheng-khì Sèng-tiān
( Mt 21: 12-13; Mk 11: 15-17; Lk 19: 45-46)
Iô-tá-iah lâng ê Pôaⁿ-kòe-cheh teh beh kàu, I-é-su chiūⁿ Ê-lú-sa-lèm.
2:14 I khòaⁿ tio̍h tī sèng-tiān ū lâng teh bōe gû, iûⁿ, hún-chiáu, mā ū lâng chē tī hia teh ōaⁿ chîⁿ.
2:15 I-é-su ēng soh-á chò piⁿ, kā hiahê lâng kah in ê iûⁿ, gû lóng tùi sèng-tiān kóaⁿ chhut-.khì, koh chhia-tó ōaⁿ chîⁿ ê toh-á, kā in ê chîⁿ iā-sòaⁿ.
2:16 I-é-su koh kā bē hún-chiáu ê lâng kóng, " Kā chiahê mi̍h lóng poaⁿ chhut-.khì! M̄-thang kā góa ê Thiⁿ-pē ê chhù piàn-chò chhī-tiûⁿ. "
2:17 I ê bûn-tô͘ chiū siūⁿ-khí ū kì-chài, góa ūi tio̍h Lí ê sèng-tiān, sim-lāi ná chhin-chhiūⁿ hóe teh to̍h. (chù, SPh 69:9)
2:18 Iô-tá-iah lâng mn̄g I-é-su kóng, " Lí ēng siáⁿ-mi̍h sîn-jiah lâi chèng-bêng Lí ū koân chò chiahê tāichì? "
2:19 I-é-su ìn kóng, " Lín húi-hoāi chit keng sèng-tiān, góa saⁿ ji̍t āu beh koh kā i khí khí-.lâi. "
2:20 Iô-tá-iah lâng chiū kóng, " Chit keng sèng-tiān sì-cha̍p-la̍k nî chiah khí hó, Lí saⁿ ji̍t lāi chiū beh koh kā i khí hó, sī-.bô? "
2:21 M̄ koh, I-é-su ánne kóng sī teh chí I kakī seng-khu ê tiān.
2:22 I-é-su tùi sí-lâng tiong koh-oa̍h ê sî, I ê bûn-tô͘ chiah siūⁿ-khí I bat ánne kóng, in chiū ánne lâi sìn keng-tián kah I-é-su só͘ kóng ê ōe.
2:23 I-é-su Liáu-kái Chèng lâng ê Sim
I-é-su tī Ê-lú-sa-lèm kòe Pôaⁿ-kòe-cheh ê sî, chin chē lâng khòaⁿ tio̍h I só͘ kiâⁿ ê sîn-jiah, chiū sìn I.
2:24 M̄ koh, I-é-su bô oân-choân sìn-jīm in, in-ūi I liáu-kái kûn-chiòng ê sim.
2:25 Koan-hē lâng ê tāichì, I bô su-iàu lâng koh lâi tùi I chèng-bêng, in-ūi I chin liáu-kái lâng ê lāi-sim.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。