約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
1:1 道成肉體
上帝創造以前to̍h有道，道kah上帝同在，道to̍h是上帝。
1:2 Tùi源起頭，chitê道to̍h kah上帝同在。
1:3 上帝通過道來創造萬物，一切受創造ê lóng是通過道來創造。
1:4 道本身有活命，chitê活命是人類ê光。
1:5 Chitê光照tī烏暗中，m̄ koh，烏暗m̄接納光。
1:6 上帝差派一个人來，伊ê名叫做約翰。
1:7 Chitê人來beh為光做見證，thang hō͘全人類聽伊ê話來信。
1:8 伊本身m̄是hitê光，kantaⁿ是beh為hitê光做見證。
1:9 Hitê是真ê光，beh來chitê世間kā全人類照光。
1:10 道已經tī世間，世間通過道來創造，m̄ koh，世間m̄ bat chitê道。
1:11 道來到kakī ê本所在，kakī ê人mā無接納祂。
1:12 Hiahê接納祂ê，to̍h是信祂ê人，祂就賞賜hō͘ in有權成做上帝ê kiáⁿ兒。
1:13 In m̄是tùi血統，m̄是tùi肉體，mā m̄是tùi人ê意思來出世ê，in是上帝生ê。
1:14 道chiâⁿ肉體，tiàm tī咱中間，充滿恩典kah真理。咱有看tio̍h祂ê榮耀，he是天父ê獨生Kiáⁿ chiah有ê榮耀。
1:15 約翰為tio̍h祂做見證，大聲hoah：「Chitê to̍h是我所講ê，祂tòe我後面來，卻比我khah偉大，因為我iáu未出世，祂to̍h存在。」
1:16 祂已經用豐盛ê恩典祝福咱大家，hō͘咱恩上加恩。
1:17 律法是上帝通過摩西來頒布；恩典kah真理是通過耶穌基督來ê。
1:18 無人bat看見上帝，kantaⁿ tī天父心懷中ê獨生Kiáⁿ有kā祂顯明出來。
1:19 行洗禮約翰ê見證
(太3：1-12；可1：2-8；路3：15-17)
下面是約翰ê見證：耶路撒冷ê偤太人ê宗教當局，差派祭司kah利未人來問約翰講：「你是啥人？」
1:20 Hit時，約翰坦白公開承認講：「我m̄是基督。」
1:21 Hiahê人koh問伊講：「Án-ne，你是以利亞，是無？」約翰應講：「M̄是。」In koh問伊講：「你是hitê先知，是無？」約翰應講：「M̄是。」
1:22 Into̍h kā伊講：「你是啥人？請你kā阮講，thang hō͘阮回覆差派阮來ê人。你kakī 講你是啥人？」
1:23 約翰引用以賽亞先知ê話，講：「我to̍h是tī曠野teh hoah ê聲：Tio̍h為主修直道路。」(註：賽40：3)
1:24 Hiahê人to̍h是法利賽派ê人差派ê。
1:25 In koh問約翰，講：「你若m̄是基督，mā m̄是以利亞，mā m̄是hitê先知，你ná ē kā人洗禮？」
1:26 約翰應講：「我是用水kā人洗禮，有一位lín m̄ bat ê khiā tī lín中間。
1:27 祂tī我ê後面teh來，我連kā祂thǹg鞋都bē堪得。」
1:28 Chiahê tāichì tī約旦河東岸ê伯大尼發生；約旦河to̍h是約翰kā人洗禮ê所在。
1:29 上帝ê羊羔
隔tńg工，約翰看tio̍h耶穌行óa來，to̍h講：「你看，上帝ê羊羔，祂beh來消除世間ê罪。
1:30 關係祂ê tāichì我bat kā lín講，祂比我khah慢來，祂比我khah偉大，因為我iáu未出世，祂to̍h存在。
1:31 我kakī mā m̄ bat祂，獨獨我來用水kā人洗禮，是beh hō͘以色列人認bat祂。」
1:32 約翰koh見證講：「我bat看tio̍h聖神親像粉鳥tùi天降落來歇tī祂頂面。
1:33 我kakī mā m̄ bat祂，獨獨差我來用水kā人洗禮ê hit位上帝有kā我講：『你看，聖神降臨歇tī祂頂面，祂to̍h是beh用聖神kā人洗禮ê hit位。』
1:34 我有親目看tio̍h，所以，我來見證Chit位to̍h是上帝ê Kiáⁿ。」
1:35 耶穌呼召第一批門徒
隔tńg工，約翰kah兩 个門徒koh khiā tī hia。
1:36 約翰看tio̍h耶穌teh行，to̍h講：「你看，上帝ê羊羔！」
1:37 Hit兩 个門徒聽tio̍h伊ánne講，to̍h去tòe耶穌。
1:38 耶穌oa̍t-tńg身看tio̍h in teh tòe祂，to̍h kā in講：「Lín teh chhōe啥物？」In應講：「拉比，祢tòa tī tó位？」(拉比to̍h是老師ê意思)。
1:39 耶穌kā in講：「Lín tòe我來去看。」In去看耶穌tòa ê所在，hit日to̍h kah祂做伙tòa，hit時差不多是下晡四點。
1:40 聽約翰ê話來tòe耶穌hit兩 个人，一个是西門彼得ê小弟安得烈。
1:41 伊先去chhōe伊ê阿兄西門，kā伊講：「阮已經tú tio̍h基督。」
1:42 伊to̍hchhoa7西門來見耶穌。耶穌注目kā伊看，講：「你是約翰ê kiáⁿ西門。我beh kā你叫做磯法。」(磯法kah彼得仝款意思，to̍h是石磐)。
1:43 耶穌呼召腓力kah拿但業
隔tńg工，耶穌beh去加利利省，tú tio̍h腓力，to̍h kā伊講：「來tòe我。」
1:44 腓力是伯賽大人，是安得烈kah彼得ê同鄉。
1:45 腓力tú tio̍h拿但業，to̍h kā伊講：「摩西tī律法書所寫kah眾先知書所記載ê hit位，阮已經有tú tio̍h，to̍h是約瑟ê kiáⁿ，拿撒勒人耶穌。」
1:46 拿但業kā伊講：「拿撒勒hit款所在kámē出啥物好物？」腓力講：「你來看！」
1:47 耶穌看tio̍h拿但業行óa來，to̍h講：「你看，伊是真正ê以色列人，是心無虛假ê人。」
1:48 拿但業問耶穌講：「祢ná ē bat我？」耶穌應講：「腓力iáu未叫你，我to̍h看tio̍h你tī無花果樹腳。」
1:49 拿但業應講：「老師，祢to̍h是上帝ê Kiáⁿ，祢to̍h是以色列ê王。」
1:50 耶穌應講：「因為我kā你講，我有看tio̍h你tī無花果樹腳，你to̍h信我，是無？你ē看見比這koh khah大ê tāichì。」
1:51 耶穌koh kā in講：「我實在kā lín講，lín會看見天開，上帝ê天使tī人子ê頂面teh起起落落。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。