路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
24:1 空墓
(太28：1-10；可16：1-8；約20：1-10)
七日ê頭一日，天phú光，hiahê婦人人帶所準備ê芳料來到墓地。
24:2 In看tio̍h石頭已經tùi墓口kō開。
24:3 In入去墓內，無看tio̍h主ê身屍。
24:4 In tú為tio̍h ánne iáu teh躊躇ê時，忽然有兩 个人穿光iàⁿiàⁿ ê衫khiā tī in身邊。
24:5 婦人人大tio̍h驚，面仆落土腳。Hit兩 个人kā in講：「Lín ná ē tī死人中teh chhōe活人？
24:6 祂無tī chia，祂已經koh活ā。Lín tio̍h ē記得祂iáu tī加利利省ê時kā lín講ê話：
24:7 『人子一定ēhông出賣交tī罪人ê手，hō͘ in釘tī十字架，第三日koh活。』」
24:8 Hiahê婦人人to̍h想起耶穌ê話。
24:9 In離開墓地tńg去，kā chiahê tāichì lóng報hō͘十一个使徒kah其他ê群眾知。
24:10 對使徒報告chiahê tāichì ê，to̍h是抹大拉ê馬利亞kah Iô-a-ná，雅各ê老母馬利亞，以及其他kah in做陣ê婦人人。
24:11 使徒想講hiahê婦人人所講ê話無影無跡，所以，m̄相信。
24:12 M̄ koh，彼得起來，走去墓裡，àⁿ落去看內面，只有看tio̍h幼苧布。伊to̍htng2去，對所發生ê tāichì感覺真奇怪。
24:13 到以馬忤ê路中
(可16：12-13)
Siâng hit日，門徒中有兩人去一个叫做以馬忤ê庄頭，離耶路撒冷約十一公里。
24:14 In ná行ná teh談論所發生ê tāichì。
24:15 In當teh談論來談論去ê時，耶穌親身óa來kah in做陣行；
24:16 kahná有物件teh窒礙in ê目chiu ，in soah bē認得耶穌。
24:17 耶穌對in講：「Lín ná行ná teh議論ê是啥物tāichì？」Into̍h停落來，滿面憂愁。
24:18 其中一个叫Ku-lé-o-pah ê應耶穌講：「Chit幾日tī耶路撒冷所發生ê tāichì，是án怎kantaⁿ祢m̄知？」
24:19 耶穌問講：「是啥物tāichì？」In應講：「to̍h是拿撒勒人耶穌ê tāichì，祂是先知，tī上帝kah眾人ê面前所講所做ê lóng真有權能。
24:20 Hiahê祭司長kah頭人kā祂押去hō͘人判死刑，釘十字架。
24:21 祂to̍h是阮所期待teh beh來拯救以色列ê hit位。M̄-nā ánne，chiahê tāichì發生到taⁿ已經三日ā。
24:22 Koh阮中間ê幾nā个婦人人hō͘阮tio̍h驚kah gāng去，因為in phah-phú光to̍h到墓地，
24:23 in chhōe無耶穌ê身屍，to̍h tńg來講in有看tio̍h天使出現kā in講：耶穌已經koh活à。
24:24 阮中間mā有幾nā个人去墓地，看tio̍h ê一切lóng kah婦人人所講ê仝款，in mā無看tio̍h耶穌。」
24:25 耶穌對in講：「Ai-ah，lín ná ē chiahni̍h戇，心ná ē chiahni̍h鈍，bē相信先知所講一切ê話！
24:26 基督kám m̄是tio̍h受chiahê苦難chiah來入祂ê榮光？」
24:27 耶穌to̍h對摩西kah眾先知開始講起，kā經典中所有關係耶穌ê記載，lóng對in說明。
24:28 In teh beh到所beh去ê庄頭，耶穌ná親像beh繼續行，
24:29 hit兩 个人強留耶穌講：「日頭落山à，天已經暗。請kah阮tòa。」耶穌to̍h入去kah in tòa。
24:30 耶穌kah in坐桌ê時，the̍h餅祝謝，然後peh開分hō͘ in。
24:31 In ê目chiu 開，就認出祂是耶穌，祂隨時tùi in中間消失。
24:32 In就互相講：「祂tī路裡kah咱講話，kā咱說明經典ê時，咱ê心kám無親像火teh to̍h？」
24:33 In隨時出發tńg去耶路撒冷，tú tio̍h hit十一个使徒kah其他ê人聚集teh談論，
24:34 講：「主果然koh活ā，祂已經出現hō͘西門看。」
24:35 Hit兩 个人to̍h講起tī路裡所tú ·tio̍h ê tāichì，kah耶穌peh餅ê時in án怎認出祂ê一切，lóng講hō͘ in聽。
24:36 耶穌對門徒顯現
(太28：16-20；可16：14-18；約20：19-23；徒1：6-8)
Hit兩 个門徒teh講chiahê話ê時，耶穌親身khiā tī in中間，kā in講：「願lín平安！」
24:37 In tio̍h驚koh感覺奇怪，掠做是看tio̍h鬼。
24:38 耶穌to̍h kā in講：「Lín ná ē teh不安，心內teh起憢疑？
24:39 來看我ê手，我ê腳，確實是我本身。Lín摸to̍h知，因為鬼無骨無肉。Lín摸看，我lóng有！」
24:40 耶穌ánne講了to̍h kā手kah腳hō͘ in看。
24:41 門徒歡喜kah iáu koh m̄敢相信，iáu teh莫名奇妙ê時，耶穌kā in講：「Lín chia有啥物thang食無？」
24:42 In就the̍h一塊烘好ê魚hō͘耶穌。
24:43 耶穌接過來，當in ê面前食hō͘ in看。
24:44 耶穌koh對in講：「我iáu kah lín做伙ê時有kā lín講過，摩西ê律法kah先知ê冊，以及詩篇所記載關係我ê tāichì，lóng一定ē應驗。」
24:45 耶穌開in ê心竅，hō͘ in ē tàng了解經典。
24:46 祂koh對in講：「經典有ánne記載：基督tio̍h受苦難，第三日tùi死人中koh活；
24:47 koh有記載：Lín tio̍h奉祂ê名，傳悔改來得tio̍h赦罪ê道理，tùi耶路撒冷開始傳到萬邦。
24:48 Lín to̍h是chiahê tāichì ê見證人。
24:49 我kā我ê天父所應允ê交hō͘ lín，總是，lín tio̍h tī chitê城thèng候，一直到得tio̍h頂面來ê權能。」
24:50 耶穌上天
(可16：19-20；徒1：9-11)
耶穌chhōa in出去到伯大尼，然後gia̍h起雙手kā in祝福。
24:51 Teh kā in祝福ê中間to̍h離開in，受接上天。
24:52 Into̍h仆落去kā祂拜，然後歡歡喜喜tńg去耶路撒冷，
24:53 繼續ta̍k日tī聖殿內oló上帝。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。