路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
10:1 耶穌差派七十二人
Chiahê tāichì了後，主koh差派七十二人（註：原版本是「七十人」），一對一對差in做前去祂所beh去ê ta̍k个城kah ta̍k个所在。
10:2 耶穌kā in講：「Thang收成ê真chē，做工ê人真少，所以，lín tio̍h去求園主派khah chē工人去收成。
10:3 Lín去！我差lín出去做工，親像羊á入去豺狼ê中間。
10:4 M̄-thang帶錢袋，m̄ thang帶行李袋，m̄ thang穿鞋，tī路裡m̄ thang kā人請安。
10:5 Lín無論入去啥人ê厝，tio̍h tāi先講：『願lín chit家ê人平安。』
10:6 Tī hia若有意愛平安ê人，into̍h ē得tio̍h lín kā in請安ê平安。若無，hitê平安to̍h ē倒tńg來歸lín。
10:7 Tio̍h tiàm hit家，lim食in所供給ê物，因為做工ê人ē堪得得tio̍h伊ê工錢。M̄-thang tùi chit家徙過去hit家。
10:8 Lín無論入去啥物城，人若接納lín，tio̍h食in所排tī lín面前ê物。
10:9 城內有病ê人，tio̍h kā in醫好，續kā in講：『上帝國度teh beh到à。』
10:10 M̄ koh，無論入去啥物城，人若m̄接納lín，lín tio̍h出去in ê大街路，講：
10:11 『連lín ê城tiâu tī阮腳底ê土沙粉，阮都beh pōaⁿ掉；總是，lín tio̍h知上帝國度teh beh到à。』
10:12 我kā lín講，審判ê日子若到，所多瑪所受ê刑罰比hitê城所受ê iáu khah好忍受。」
10:13 M̄悔改ê城有災禍
(太11：20-24)
「Ko-la̍h-sìn，你有災禍！伯賽大，你有災禍！因為我tī lín中間所行chiahê權能，若行tī 推羅 kah西頓，in早to̍h穿麻衫，sám火灰，坐teh來悔改。
10:14 M̄ koh，tī審判ê時，推羅 kah西頓 tio̍h受ê刑罰比lín iáu khah好忍受。
10:15 迦百農，你siàu想hō͘人扶起lí天頂？你ē hō͘人chhia落去陰府。
10:16 聽lín ê話to̍h是聽我ê話；棄sak lín ê to̍h是棄sak我；棄sak我ê to̍h是棄sak差我來ê hit位。」
10:17 七十二人Tńg來報告
Hit七十二人歡歡喜喜tńg來，講：「主ah，阮奉祢ê名命令，邪神mā lóng屈服。」
10:18 耶穌kā in講：「我有看tio̍h撒旦親像sihnà tùi天lak落來。
10:19 我已經hō͘ lín有權能thang踏蛇kah蠍á蟲，koh有制服對敵所有ê氣力，絕對無一項ē kā lín傷害。
10:20 總是，m̄ thang因為chiahê邪神屈服lín來歡喜；tio̍h因為lín ê名記tī天頂來歡喜。」
10:21 耶穌ê喜樂
(太11：25-27；13：16-17)
Hit時，耶穌hō͘聖神充滿kah滿心歡喜，講：「天父ah，天地ê主，我oló祢，因為祢kā chiahê tāichì對智慧聰明ê人掩蓋起來，卻對細漢gín-á有顯明出來。天父ah，是lah，因為這是祢看做歡喜ê。
10:22 我ê天父已經kā 一切lóng交付我。天父以外無一个bat Kiáⁿ是啥人；Kiáⁿ kah Kiáⁿ所ài beh啟示ê人以外，mā無一个bat天父是啥人。」
10:23 耶穌oa̍t-tńg身偷偷á對門徒講：「有目chiu 看見lín所看tio̍h ê人，實在有福氣！
10:24 我kā lín講，以前有真chē先知kah君王，ài beh看lín所看tio̍h ê mā無看tio̍h，in ài beh聽lín所聽tio̍h ê mā無聽tio̍h。」
10:25 疼你ê厝邊
有一个律法教師khiā起來試探耶穌講：「老師ah，我tio̍h án怎做chiah ē得tio̍h永遠ê活命？」
10:26 耶穌應講：「律法有記載啥物？你讀了án怎？」
10:27 Hitê人應講：「你tio̍h盡心、盡性、盡力，盡意疼主你ê上帝，mā tio̍h疼厝邊親像kakī 。」(註：申6：5；利19：18)
10:28 耶穌kā伊講：「你所應ê是tio̍h，照ánne去做，to̍h ē得tio̍h活命。」
10:29 M̄ koh，hitê人ài beh顯明kakī 做了真tio̍h，to̍h koh問耶穌講：「啥人是我ê厝邊？」
10:30 耶穌應講：「有一个人tùi耶路撒冷落去耶利哥城，tú tio̍h土匪搶伊ê衫褲，kā伊phah到半死，然後kā伊放hē ·leh，做in去。
10:31 Tú好有一个祭司tùi hit條路落去，看tio̍h hitê人to̍h閃tùi路ê hit-pêng過去。
10:32 Koh有一个利未人行到hit所在，看了mā仝款tùi路ê hit-pêng過去。
10:33 獨獨有一个撒瑪利亞人行路tùi hia經過，看tioh8to̍h kā伊憐憫。
10:34 伊行óa去，用酒（註：有ê抄本是「用油kah酒」）洗tio̍h傷ê孔嘴，用布kā伊包teh，然後扶伊起lí騎kakī ê驢á，chhōa伊到客店來kā伊照顧。
10:35 隔tńg工，伊the̍h兩 个銀á hō͘店主，講：『請你照顧chitê人，所費若khah加，我倒tńg來ê時chiah補你。』
10:36 Chit三人中間，你想tó一个是tú tio̍h土匪hitê人ê厝邊？」
10:37 伊應講：「Kā伊憐憫hitê人to̍h是。」耶穌kā伊講：「你去，照ánne去做。」
10:38 耶穌訪問馬大kah馬利亞
耶穌kah門徒繼續行，耶穌入去一个庄頭。有一个名叫做馬大ê婦人人，接待耶穌入去in厝。
10:39 馬大有一个姊妹，叫做馬利亞，坐tī主ê腳前teh聽祂ê教示。
10:40 馬大因為接待in，tāichì chē，soah心肝亂chhau-chhau，to̍h來kā耶穌講：「主ah，我ê姊妹放我kakī 一个teh無閒，祢kám無teh要緊？Tio̍h叫她來kā我tàu腳手。」
10:41 M̄ koh，主應講：「馬大ah，馬大ah，你為tio̍h tāichì chē teh操煩。
10:42 M̄ koh，所需要ê kantaⁿ7一項；馬利亞已經揀tio̍h好ê hit份，無人ē tàng kā它搶去。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。