路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
8:1 服事耶穌ê婦人人
過無幾日，耶穌tī ta̍k个城市kah ta̍k个庄頭四界行透透，來宣揚上帝國度ê福音。十二個門徒lóng kah祂做陣。
8:2 一kóa bat hō͘邪神附身á是破病hō͘耶穌醫好ê婦人人mā kah in做伙，其中有抹大拉ê馬利亞。耶穌bat tùi chitê馬利亞身上趕出七个鬼。
8:3 Koh有希律ê管家Khó͘-sat ê bó͘ Iô-a-ná kah So͘-sat-ná，以及其他真chē婦人人，in lóng用kakī ê錢財來服事耶穌kah祂ê門徒。
8:4 掖種籽ê譬喻
(太13：1-9；可4：1-9)
有群眾繼續tùi ta̍k个城市聚集óa來chhōe耶穌。
8:5 耶穌用譬喻kā in講：「有一个作穡人出去掖種籽，teh掖ê時，有ê ka-la̍uh tī路邊，hō͘過路人踏，空中ê飛鳥kā in全部食了了。
8:6 有ê ka-la̍uh tī石磐頂，因為無水分，芽發起來就乾去。
8:7 有ê ka-la̍uh tī刺á內，刺á平平大欉起來，soah hō͘ 刺á hip死。
8:8 有ê ka-la̍uh tī好ê土地，成長起來，結實到一百倍。」Chiahê話講了，耶穌koh大聲hoah：「有耳孔thang聽ê人，tio̍h聽！」
8:9 譬喻ê目的
(太13:10-17；可4：10-12)
耶穌ê門徒問祂chitê譬喻是啥意思。
8:10 耶穌講：「上帝國度ê奧祕已經hō͘ lín知，m̄ koh，對一般人tio̍h用譬喻，因為有記載：In看mā看bē清楚，聽mā聽bē明白。」(註：賽6：9)
8:11 解說掖種籽ê譬喻
(太13：18-23；可4：13-20)
「Chitê譬喻ê意思是ánne：種籽to̍h是上帝ê道理。
8:12 Ka-la̍uh tī路邊ê，是teh譬喻人聽tio̍h道理，魔鬼to̍h來tùi in ê心內kā道理搶去，hō͘ in bē tàng信道理來得tio̍h救。
8:13 Ka-la̍uh tī石磐頂ê，是teh譬喻人聽tio̍h道理隨時歡喜來接受，m̄ koh，in釘根無深，是暫時信niā-niā，tú tio̍h試探to̍h放sak。
8:14 Ka-la̍uh tī刺á內ê，是teh譬喻人聽tio̍h道理，to̍h去hō͘世間ê操煩、錢財kah宴樂阻礙，道理soah bē成長結實。
8:15 Ka-la̍uh tī好土地ê，是teh譬喻人用好koh善良ê心來聽道理koh執守，耐心堅持到結實。」
8:16 米斗下ê燈
(可4：21-25)
「無人點燈用米斗kā它蓋起來，á是hē tī眠床腳。Tio̍h kā它chhāi tiàm燈台頂，hō͘入來ê人看tio̍h hitê光。
8:17 因為所有隱密ê tāichì將來lóng ē露現；所有祕密ê tāichì到時lóng ē暴露出來hō͘人知。
8:18 所以，lín tio̍h謹慎tio̍h án怎來聽；因為見若有ê人beh hō͘伊koh khah chē；無ê人連伊kakī 掠做有ê，mā beh kā伊搶去。」
8:19 耶穌ê老母kah兄弟
(太12：46-50；可3：31-35)
耶穌ê老母kah兄弟來chhōe祂，因為人真chē，bē tàng óa去。
8:20 有人kā祂講：「祢ê老母kah兄弟khiā tī外面，ài beh見祢。」
8:21 耶穌應講：「Chiahê聽上帝ê道理koh有照ánne去做ê人to̍h是我ê老母，我ê兄弟。」
8:22 耶穌平靜風湧
(太8：23-27；可4：35-41)
有一日，耶穌kah門徒上船ê時kā in講：「咱來去湖ê hit-pêng岸。」Into̍h開船。
8:23 船teh行ê時，耶穌睏去。忽然一chūn強風掃落來湖裡，船內入水kiōng-beh tīⁿ起來，非常危險。
8:24 門徒óa去叫醒耶穌，講：「老師ah，老師ah，咱teh beh無命lò͘！」耶穌醒起來，責備風kah大湧，風湧就靜落來。
8:25 耶穌to̍h對門徒講：「Lín ná ē hiah無信心？」In就驚惶koh感覺奇怪，互相議論講：「Chitê到底是啥人？連風kah湧lóng順服祂ê命令！」
8:26 耶穌醫好邪神附身ê人
(太8：28-34；可5：1-20)
耶穌kah門徒坐船過去加利利湖ê對面岸，來到Gê-la̍h-sam人ê所在。
8:27 耶穌落船上岸ê時，有一个hō͘邪神附身ê人tùi城裡出來tú tio̍h祂。Chitê人已經真久無穿衫，無tòa tī厝內，lóng tiàm tī墓á埔。
8:28 Hitê人一下看見耶穌to̍h仆tī祂ê面前大聲hoah：「至koân上帝ê Kiáⁿ耶穌，我kah祢有啥物牽連？求祢m̄ thang hō͘我受苦毒。」
8:29 因為耶穌有命令邪神tùi hitê人出來。以前邪神tiāⁿ-tiāⁿ kā伊掠tiâu-tiâu，人用鐵鏈á kā伊鏈teh，用腳鐐手銬kā伊銬teh，koh kā伊關起來；m̄ koh，伊kā縛伊ê器具chhoah斷，邪神koh hō͘伊chông出去曠野。
8:30 耶穌問hitê人講：「你叫啥物名？」伊應講：「軍團。」因為有真chē邪神kā伊附身。
8:31 邪神哀求耶穌m̄ thang命令in入去無底深坑。
8:32 Hit時，有kui大陣ê豬tī山裡teh討食。邪神求耶穌准in入去hiahê豬ê內面。耶穌有照in所求ê允准in。
8:33 邪神to̍h對hitê人出去，入去hiahê豬ê內面。Kui陣ê豬to̍h tùi山坪chông落去湖裡，hō͘水淹死。
8:34 Hiahê顧豬ê人看tio̍h chitê tāichì，to̍h走去報hō͘城內kah庄頭ê人知。
8:35 聽tio̍h ê人lóng出來ài beh看chitê tāichì。In來到耶穌hia，邪神已經tùi hitê人出來。In看tio̍h伊有穿衫，精神正常，坐tī耶穌ê腳前，in to̍h大tio̍h驚。
8:36 親目看tio̍h ê人kā hō͘邪神附身ê人án怎得tio̍h醫好ê tāichì，報hō͘眾人知。
8:37 Gê-la̍h-sam四箍圍ê人lóng求耶穌離開in，因為in真驚惶。耶穌to̍h坐船tńg去。
8:38 脫離邪神ê hitê人求beh tòe耶穌去，m̄ koh，耶穌叫伊tńg去，講：
8:39 「Tńg去lín tau，kā上帝為你所做hiah大ê tāichì報hō͘眾人知。」Hitê人to̍h tńg去，kā耶穌為伊所做ê tāichì報hō͘全城ê人知。
8:40 耶穌醫好兩 个婦人人
(太9：18-26；可5：21-43)
耶穌tńg來ê時，眾人lóng kā祂迎接，因為大家lóng teh thèng候祂。
8:41 有一个會堂ê主管，名叫做崖魯，來仆tī耶穌ê腳前，懇求祂去伊ê厝。
8:42 因為伊十二歲ê獨生chabó͘ kiáⁿ teh beh死à。耶穌to̍h kah伊去，群眾mā挨挨kheh-kheh做伙去。
8:43 Hit時，有一个婦人人，帶血漏病已經十二年à，雖然家伙開了了chhōe醫生醫治，無kah一个人ē tàng kā她醫好。
8:44 Chitê婦人人行óa來耶穌ê 尻脊後，摸祂衫á裾ê鬚，她ê血漏隨時止。
8:45 耶穌問講：「啥人kā我摸？」大家lóng講無。彼得to̍h講：「老師，群眾逼óa來kā祢kheh tio̍h lah。」
8:46 耶穌講：「的確有人摸tio̍h我，因為我知有權能tùi我身軀出去。」
8:47 婦人人知影掩蓋bē tiâu，就phi̍h-phi̍h chhoah來仆tī耶穌ê腳前。她tī群眾ê面前講明摸耶穌ê原因，kah伊ê病án怎隨時好去。
8:48 耶穌kā她講：「婦人人，你ê信心hō͘你ê病好去。做你安心tńg去。」
8:49 耶穌iáu teh講ê時，有人tùi會堂主管ê厝來kā崖魯講：「你ê chabó͘ kiáⁿ已經死去à，何必koh勞煩老師？」
8:50 耶穌聽tioh8to̍h應講：「M̄免驚，只有信，她to̍h會好起來。」
8:51 耶穌去到in厝ê時，除了彼得、約翰、雅各，kah chabó͘ gín-á ê父母以外，m̄准別人kah祂入去。
8:52 眾人lóng為tio̍h死去ê chabó͘ gín-á teh啼哭悲傷。耶穌講：「M̄-thang啼哭，因為她m̄是死，是teh睏niā-niā。」
8:53 因為大家lóng知chabó͘ gín-á已經死去à，就恥笑耶穌。
8:54 耶穌牽chabó͘ gín-á ê手大聲hoah：「Cha-bó͘ gín-á，起來！」
8:55 Cha-bó͘ gín-á就回魂，隨時peh起來。耶穌吩咐tio̍h hō͘ chabó͘ gín-á食物件。
8:56 她ê父母tio̍h驚kah gāng去。耶穌命令in m̄ thang kā所發生ê tāichì kā人講。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。