路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
7:1 耶穌醫好軍官ê奴僕
(太8：5-13；約4：43-54)
耶穌講hō͘民眾聽ê話講soah了後，to̍h入去迦百農。
7:2 有一个羅馬ê連長所重用ê奴僕破病kah teh beh死。
7:3 Chitê軍官聽tio̍h耶穌ê tāichì，to̍h差幾nā个偤太人ê長老去求耶穌來醫治伊ê奴僕。
7:4 In來見耶穌，就迫切求祂講：「Chitê人ē堪得祢kā伊幫贊，
7:5 因為伊愛護咱偤太人，koh本身為咱起會堂。」
7:6 耶穌to̍h kah in去。離連長ê厝無gōa遠ê時，連長有差幾nā个朋友來kā耶穌講：「主ah，m̄ thang kā祢勞煩，我bē堪得祢來我ê厝。
7:7 我mā想講kakī bē堪得來chhōe祢。祢若講一句話，我ê奴僕to̍h ē好起來。
7:8 因為我mā是hō͘人管ê人，mā有兵hō͘我管。我kā chitê講：『去！』，伊to̍h去；kā hitê講：『來！』，伊to̍h來；kā我ê奴僕講：『Án-ne做』，伊to̍hánne去做。」
7:9 耶穌聽tio̍h chiahê話to̍h感覺奇怪，oa̍t-tńg身kā tòe祂ê群眾講：「我kā lín講，連以色列人ê中間，我都m̄ bat看tio̍h親像chit款ê信心。」
7:10 受差ê人tńg去到厝，看tio̍h奴僕已經好去à。
7:11 耶穌hō͘寡婦ê Kiáⁿ Koh活
Koh無gōa久，耶穌去一个城名叫做Ná-in。祂ê門徒kah kui大陣人kah祂做伙行。
7:12 Beh到城門ê時，tú好有人扛一个死人出來。死人ê老母孤孤生chitê kiáⁿ，koh是寡婦。城內有真chē人teh kā伊送葬。
7:13 主一下看tio̍h，to̍h kā她憐憫，講：「M̄-thang哮。」
7:14 祂行óa去，摸hitê扛身屍ê架，扛ê人to̍h停腳。耶穌講：「少年人，我kā你講：『起來！』」
7:15 死人to̍hpeh起來坐，續開嘴講話。耶穌to̍h kā chitê少年人交hō͘伊ê老母。
7:16 眾人lóng驚惶，歸榮光hō͘上帝講：「咱中間有興起一个大先知。」Koh講：「上帝有teh看顧祂ê子民。」
7:17 就ánne，耶穌chitê風聲傳到偤太kah四箍圍ê ta̍k所在。
7:18 行洗禮約翰kah耶穌
(太11：2-19)
約翰ê門徒kā chiahê tāichì lóng報hō͘ in ê老師知。
7:19 約翰to̍h叫兩 个門徒來，差in去問耶穌：「祢kám是teh beh來ê hit位？Á是阮tio̍h koh thèng候別人？」
7:20 Hit兩人來見耶穌to̍h講：「行洗禮約翰差阮來請問祢：『祢kám是teh beh來ê hit位？Á是阮tio̍h koh thèng候別人？』」
7:21 Hit時，耶穌有醫好真chē身苦病疼ê人kah hō͘邪神附身ê人，koh hō͘真chē chheⁿmê ·ê koh再看見。
7:22 耶穌to̍h應講：「Lín tio̍h去，kā lín所看tio̍h kah所聽tio̍h ê報約翰知，to̍h是chheⁿmê ·ê看見，跛腳ê行路，癩ko ê清氣，臭耳聾ê聽見，死人koh活，sànchhiah人ē tàng聽tio̍h福音。
7:23 對我無失去信心ê人實在有福氣。」
7:24 約翰所差ê人tńg去了後，耶穌chiah提起約翰ê tāichì，對群眾講：「Lín前出去曠野，是beh看啥物？Kám是蘆竹hō͘風teh吹振動？
7:25 Án-ne，lín出去是beh看啥物？Kám是beh看人穿奢華ê衫？你看，穿súi衫koh享受宴樂ê人是tī王宮。
7:26 Án-ne，lín出去beh看啥物？Kám是先知？是，我kā lín講過，伊比先知koh khah偉大。
7:27 經典有關係約翰ê記載：祢看，我差使者做祢ê前鋒，伊beh tī祢ê頭前準備祢ê道路。(註：瑪3：1)
7:28 我kā lín講，婦人人所生ê kiáⁿ無一个比約翰khah偉大；總是，tī上帝國度內siōng微細ê iáu比伊khah偉大。」
7:29 聽tio̍h chiahê話ê民眾，連抽稅ê人mā lóng承認上帝是公義，因為in lóng有領受約翰ê洗禮。
7:30 M̄ koh，法利賽派ê人kah律法教師拒絕上帝為in所安排ê旨意，因為in lóng無受約翰ê洗禮。
7:31 耶穌koh講：「Chit世代ê人，我beh用啥物來比並？In親像啥物款ê人？
7:32 In ná親像gín-á坐tī街路口，互相大聲hoah：阮pûn phín-á，lín無跳舞！阮對lín唱葬式ê哀歌，lín無啼哭。
7:33 因為行洗禮約翰來，無食餅無lim酒，lín to̍h講：『伊hō͘邪神附身。』
7:34 人子來mā食mā lim，lín to̍h講：『祂是貪食好酒ê人，是抽稅ê kah罪人ê朋友。』
7:35 M̄ koh，是hiahê遵守上帝智慧ê人teh證明上帝ê智慧是真實。」
7:36 赦免kah感謝
有一个法利賽派ê人請耶穌食飯。祂to̍h入去法利賽派ê人ê厝坐桌。
7:37 Hit時，城內有一个pháiⁿ婦人人，知耶穌tī法利賽派ê人ê厝teh食飯，就帶一罐貯芳油ê玉罐來。
7:38 Hitê婦人人khiā tī耶穌ê後面teh啼哭，有目屎滴-tâm耶穌ê腳。她to̍h用kakī ê頭毛來拭，koh chia̍p-chia̍p chim耶穌ê腳，用芳油來抹腳。
7:39 請耶穌食飯ê法利賽派ê人看tio̍h ánne，心內想講chitê人若是先知，一定ē知是啥人kā祂摸，是啥物款ê chabó͘人？因為hitê chabó͘人是pháiⁿ chabó͘。
7:40 耶穌kā西門講：「我有話beh kā你講。」西門應講：「老師，請講。」
7:41 耶穌講：「有兩 个人欠債主ê錢。一个欠伊五百ê銀á，一个欠伊五十。
7:42 因為兩 个lóng無法度還債，債主to̍h免除in兩人ê債。Án-ne，tó一个會khah疼債主？」
7:43 西門應講：「我想是hitê hông免除khah chē ê人。」耶穌kā伊講：「你ê判斷正確。」
7:44 然後耶穌oa̍t頭ǹg婦人人，kā西門講：「你有看tio̍h chitê婦人人無？我入去你ê厝，你無用水hō͘我洗腳，m̄ koh，她用目屎滴tâm我ê腳，koh用頭毛來kā我拭腳。
7:45 你無kā我chim；獨獨chitê婦人人tùi我入來ê時to̍h一直無停teh chim我ê腳。
7:46 你無用油抹我ê頭殼，m̄ koh，她用芳油抹我ê腳。
7:47 所以，我kā你講，她ê疼khah chē，表示她真chē ê罪已經得tio̍h赦免；m̄ koh，得tio̍h赦免少ê人，伊表達出來ê疼to̍h少。」
7:48 耶穌kā hitê婦人人講：「你ê罪得tio̍h赦免à。」
7:49 仝桌ê人心內想講chitê teh赦罪ê是啥人？
7:50 耶穌koh對hitê婦人人講：「你ê信心有救tio̍h你，做你安心tńg去。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。