路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
6:1 Tī安息日摘麥穗
(太12：1-8；可2：23-28)
有一个安息日，耶穌tùi麥園經過，祂ê門徒摘麥穗，用手jôe來食。
6:2 有一kóa法利賽派ê人對in講：「Lín ná ē tī安息日做律法規定無應該做ê tāichì？」
6:3 耶穌應講：「Lín kám無讀tio̍h大衛kah跟tòe ê人腹肚iau ê時所做ê tāichì？
6:4 伊入去上帝ê殿，the̍h獻祭ê餅來食，koh hō͘伊跟tòe ê人食。Chit款餅kantaⁿ7祭司chiah thang食。」
6:5 耶穌koh kā in講：「人子是安息日ê主。」
6:6 耶穌tī安息日醫好瘸手ê人
(太12：9-14；可3：1-6)
Koh有一个安息日，耶穌入去會堂教示人。Tī hia有一个正手瘸去ê人。
6:7 有一kóa經學教師kah法利賽派ê人teh當等，看耶穌有tī安息日kā人醫病á無，意思是beh chhōe孔縫thang告耶穌。
6:8 耶穌知in ê企圖，to̍h kā hitê瘸手ê人講：「起來！khiā tòa中央。」Hitê人to̍h起來khiā tī hia。
6:9 然後耶穌對in講：「我問lín，tī安息日做好事á是做pháiⁿ事，救性命á是害性命，tó一項khah合律法？」
6:10 耶穌kā群眾看一liàn了後，對hitê人講：「Kā你ê手伸出來！」伊一下伸手，手to̍h好去。
6:11 Hiahê人非常受氣，to̍h做伙參詳beh án怎來對付耶穌。
6:12 耶穌設立十二使徒
(太10：1-4；可3：13-19)
有一工，耶穌出去山裡祈禱，kui暝對上帝祈求。
6:13 到天光to̍h叫門徒來，tùi in中間揀選十二人，稱in做使徒，
6:14 to̍h是西門，耶穌koh kā伊號名做彼得，kah伊ê兄弟安得烈，koh有雅各kah約翰，腓力kah巴多羅買，
6:15 馬太kah多馬，亞勒腓 ê kiáⁿ雅各kah叫做Se-lô-tí ê西門，
6:16 雅各ê kiáⁿ偤大，kah出賣耶穌ê加略人偤大。
6:17 耶穌ê名聲提高
(太4：23-25)
耶穌kah使徒落山來khiā tī平地，tī hia有真chē祂ê門徒kah kui大陣ê人。Chiahê人是tùi偤太全地kah耶路撒冷，以及推羅、西頓沿海ê所在來ê。
6:18 In來beh聽耶穌講道理，mā beh hō͘祂醫病。Hiahê hō͘邪神附身攪擾ê人mā lóng得tio̍h醫治。
6:19 眾人lóng想beh kā祂摸，因為有權能tùi耶穌出來，hō͘ in lóng得tio̍h醫好。
6:20 福氣kah災禍
(太5：1-12)
耶穌gia̍h頭看祂ê門徒，講：「Lín chiahê sànchhiah人實在有福氣，因為上帝國度是lín ê。
6:21 Lín chitmá teh iau ê人實在有福氣，因為上帝ē hō͘ lín食kah飽。Lín chitmá teh啼哭ê人實在有福氣，因為上帝ē hō͘ lín笑。
6:22 人為tio̍h人子ê緣故來怨恨lín，拒絕lín，侮辱lín，kā lín看做pháiⁿ人來排斥ê時，lín實在有福氣。
6:23 Hit日lín tio̍h歡喜tiô跳，因為lín tī天頂ê報賞真大，以前in ê祖先mā是ánne款待先知。
6:24 M̄ koh，lín chiahê好額人ē有災禍！因為lín已經teh享受安樂ê生活。
6:25 Lín chitmá飽足ê人ē有災禍！因為lín teh beh iau；lín chitmá teh笑ê人ē有災禍！因為lín teh beh哀傷啼哭。
6:26 Lín chiahê hō͘群眾oló ê人ē有災禍！因為in ê祖先mā bat ánne款待假先知。」
6:27 疼敵人
(太5：38-48；7：12a)
「M̄ koh，lín chiahê teh聽ê人，我kā lín講，tio̍h疼lín ê對敵，tio̍h好款待怨恨lín ê人。
6:28 Tio̍h祝福pháiⁿ嘴罵lín ê人，tio̍h替侮辱lín ê人祈禱。
6:29 有人siàn你一pêng ê嘴phóe，另外hit pêng mā hō͘伊siàn；有人剝lín ê外衫，連內衫mā順續hō͘伊。
6:30 若有人kā你求啥物tio̍h hō͘伊；若有人搶你ê物件，m̄ thang kā伊討tńg來。
6:31 Lín ài人án怎對待lín，mā tio̍h ánne對待人。
6:32 Lín若疼hiahê疼lín ê人，有啥物功勞？因為pháiⁿ人mā是疼hiahê疼in ê人。
6:33 Lín若好款待hiahê kā lín好款待 ê人，有啥物功勞？因為pháiⁿ人mā是ánne teh做。
6:34 Lín若借錢hō͘ hiahê有ǹg望還你錢ê人，有啥物功勞？因為pháiⁿ人mā敢借錢hō͘ē照數額來還ê人。
6:35 M̄ koh，lín tio̍h疼lín ê對敵，好款待in；借人mā m̄ thang想beh討tńg來。Án-ne，línē得tio̍h真大ê報賞，koh ē成做至koân上帝ê kiáⁿ兒，因為祂對忘恩背義kah做pháiⁿ ê人mā真慈悲。
6:36 所以，lín tio̍h有憐憫ê心，親像lín ê天父teh憐憫人。」
6:37 批評人
(太7：1-5)
「M̄-thang批評人，chiah bē hō͘人批評。M̄-thang kā人判罪，chiah bē hō͘人kā lín判罪。Tio̍h赦免人，chiah ē得tio̍h人ê赦免。
6:38 Tio̍h hō͘人，lín chiah ē得tio̍h，koh ē用足額ê斗量 hō͘ lín；kā它ji̍h koh搖，hō͘它cha̍t kah滿出來，chiah piàⁿ落去lín ê衫á帕; 因為lín用啥物量器來量hō͘人，人mā ē照ánne量倒tńg去hō͘ lín。」
6:39 Tio̍h避免自欺欺人
耶穌koh用譬喻kā in講：「Chheⁿ-mê ê kámē kā chheⁿmê ·ê chhōa路？Kám bē兩 个人lóng跋落坑溝？
6:40 學生bē tàng贏過老師；總是，學生若學有起，to̍h ē親像伊ê老師。
6:41 「你ná ē kantaⁿ7看tio̍h兄弟目chiu 內ê草á幼，ā無注意tio̍h你kakī 目chiu 內ê柴箍？
6:42 Á是你本身無看見kakī 目chiu 內ê柴箍，ná ē tàng kā你ê兄弟講：『兄弟，你目chiu 內ê草á幼hō͘我kā它the̍h出來』？假好ê人，tio̍h先kā你kakī 目chiu 內ê柴箍the̍h出來，chiah ē tàng看清楚，thang kā你兄弟目chiu 內ê草á幼the̍h出來。」
6:43 Tùi果子來認bat樹
(太7：17-20；12：33-34b)
「因為好樹bē結pháiⁿ果子，pháiⁿ樹mā bē結好果子。
6:44 看果子to̍h ē tàng知hit欉樹ê好pháiⁿ。人bē tàng tùi刺phè內挽無花果，mā bē tàng tùi刺á藤挽葡萄。
6:45 好人tùi伊ê心所積聚ê好來發出好；pháiⁿ人tùi伊所積聚ê pháiⁿ來發出pháiⁿ，因為人心內充滿啥物，嘴to̍h ē講出啥物。」
6:46 兩款地基
(太7：24-27)
「Lín ná ē稱呼我，『主ah，主ah』，m̄ koh無照我ê教示去做？
6:47 來我chia，聽我ê話來做ê人，我報lín知hitê人親像啥物。
6:48 伊親像人teh起厝，掘hō͘它深，kā地基hē tī石磐頂；大水一下到，溪流沖tio̍h厝，厝mā bē搖動，因為厝起了真堅固。
6:49 M̄ koh，聽了無去做ê人，是親像人起厝tī土頂，無hē地基，hō͘溪流沖tio̍h，hit間厝to̍h隨時倒落去，koh ē倒kah真傷重。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。