馬可福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
11:1 I-é-su Kong-êng Chìn-ji̍p Ê-lú-sa-lèm
( Mt 21: 1-11; Lk 19: 28-40; Ih 12: 12-19)
I-é-su kah bûn-tô͘ kiâⁿ óa kīn Ê-lú-sa-lèm, lâi-kàu Kaⁿ-ná-soaⁿ piⁿ ê Pek-hoat kî kah Bē-tha-niah ê sî,
11:2 I-é-su chhe nn̄g-ê bûn-tô͘, kā in kóng, " Lín khì tùi-bīn ê chng-thâu, lín ji̍p-khì chiū ē tú tio̍h chi̍t chiah iáu m̄ bat hō͘ lâng khiâ-kòe ê lî-á pa̍k tī hia. Lín kā i tháu-khui, khan-lâi chia.
11:3 Nā ū lâng mn̄g lín kóng ná ē beh ánne chò, lín tio̍h kā i kóng, ' Chú beh ēng chit chiah lî-á, liâmpiⁿ ē khan tńg-lâi hêng. '"
11:4 Hit nn̄g-ê bûn-tô͘ chiū khì, khòaⁿ tio̍h lō͘ piⁿ ū chi̍t chiah lî-á pa̍k tī mn̂g gōa, chiū kā i tháu-khui.
11:5 Piⁿ-á teh khiā ê lâng mn̄g in kóng, " Lín tháu lî-á beh chhòng siáⁿ-mi̍h? "
11:6 In chiàu I-é-su só͘ hoan-hù ê kā in kóng, hiahê lâng chiū pàng hō͘ in khì khan.
11:7 In chiū khan hit chiah lî-á tńg-lâi hō͘ I-é-su, kā in kakī ê saⁿ phoa̍h tī lî-á téng-bīn, I-é-su chiū peh khí-lih khiâ.
11:8 Ū chin chē lâng ēng in ê gōa-saⁿ pho͘ tī lō͘-.ni̍h, mā ū lâng ēng tùi hn̂g-.ni̍h chhò lo̍h-.lâi ê chhiū-ki pho͘ tī lō͘-.ni̍h, lâi kā I hoan-gêng.
11:9 Chêng-kiâⁿ āu-tòe ê lâng tōa-siaⁿ hoah, Hô-sàn-ná! Hōng Chú ê miâ lâi ê hit ūi eng-kai tit tio̍h oló! (chù, SPh 118:26)
11:10 Hitê teh beh lâi ê ông-kok, to̍h-sī lán ê chó͘-sian Ta-bi̍t ê ông-kok, eng-kai tit tio̍h oló! O-ló kui tī chì-koân Siōng-tè!
11:11 I-é-su chìn-ji̍p Ê-lú-sa-lèm, ji̍p-khì sèng-tiān lāi, sì-kè khòaⁿ chi̍t liàn-tńg. In-ūi thiⁿ í-keng àm à, I-é-su chiū kah cha̍p-jī sù-tô͘ chhut-.khì, khì-kàu Bē-tha-niah.
11:12 I-é-su Chiù-chó͘ Bû-hoa-kó Chhiū
( Mt 21: 18-19)
Keh tńg kang, I-é-su kah bûn-tô͘ tùi Bē-tha-niah chhut-.lâi ê sî, I-é-su pak-tó͘ iau.
11:13 I tùi hn̄g-hn̄g khòaⁿ tio̍h chi̍t châng ū chin chē hio̍h-á ê bû-hoa-kó chhiū, chiū óa-khì khòaⁿ hit téng-bīn ū kóe-chí á-bô. Kàu-ūi chi̍t ē khòaⁿ, chhiū téng kantaⁿ ū hio̍h, kî-tha bô pòaⁿ-hāng, in-ūi m̄-sī bû-hoa-kó ê sî-kî.
11:14 I-é-su chiū tùi hit-châng chhiū kóng, " Tùi taⁿ í-āu, éng-oán bô lâng ē koh chia̍h tio̍h lí ê kóe-chí. " I ê bûn-tô͘ ū thiaⁿ tio̍h chit kù ōe.
11:15 I-é-su chheng-khì Sèng-tiān
( Mt 21:12-17; Lk 19:45-48; Ih 2:13-22)
Āu-lâi, I-é-su kah bûn-tô͘ lâi-kàu Ê-lú-sa-lèm. I-é-su ji̍p-khì sèng-tiān, chiū kā tiān lāi teh chò senglí ê lâng kóaⁿ chhut-.khì, koh chhia-tó ōaⁿ chîⁿ ê lâng ê toh-á kah bē hún-chiáu ê lâng ê í-á,
11:16 Mā m̄-chún lâng tòa mi̍h-kiāⁿ kā sèng-tiān tòng-chò thong-lō͘ lâi-lâi khì khì.
11:17 I-é-su koh kà-sī hiahê lâng kóng, " Keng-tián kám bô kì-chài, góa ê chhù beh kiò-chò bān-bîn kî-tó ê tiān? (chù, ISI 56:7) Lín soah kā i pìⁿ chò chha̍t-siū. " (chù, ILM 7:11)
11:18 Chè-si-tiúⁿ kah keng-ha̍k kàu-su thiaⁿ-.tio̍h, chiū it-ti̍t chhōe-khòaⁿ ū siáⁿ-mi̍h pān-hoat lâi hāi-sí I-é-su; in kiaⁿ I-é-su, in-ūi kûn-chiòng tùi I ê kà-sī lóng chin kám-ho̍k.
11:19 Hông-hun ê sî, I-é-su kah bûn-tô͘ chiū chhut-khì siâⁿ gōa.
11:20 Koân-lêng, Kî-tó kah Sià-bián
( Mt 21: 20-22)
Keh-tńg-chá-khí, I-é-su kah bûn-tô͘ tùi hia keng-kòe ê sî, khòaⁿ tio̍h hit-châng bû-hoa-kó chhiū í-keng ta-.khì à.
11:21 Piat-tò͘ siūⁿ tio̍h, chiū kā I-é-su kóng, " Lāu-su, Lí khòaⁿ, Lí só͘ chiù-chó͘ ê hit-châng bû-hoa-kó chhiū í-keng 枯 ta-.khì à. "
11:22 I-é-su ìn kóng, " Lín tio̍h sìn Siōng-tè.
11:23 Góa si̍t-chāi kā lín kóng, lâng kā chit chō soaⁿ kóng, ' Sóa khì thiām hái! ' I ê sim-lāi nā bô giâu-gî, siong-sìn i só͘ kóng ê it-tēng ē si̍t-hiān, chit-ê tāichì to̍h it-tēng ē chiàu i ê ì-sù si̍t-hiān.
11:24 Só͘-í, góa kā lín kóng, lín kî-tó bô-lūn kiû siáⁿ-mi̍h, tio̍h siong-sìn í-keng tit tio̍h, chiū lóng ē chiàu ánne si̍t-hiān.
11:25 Lín khiā-teh kî-tó ê sî, nā siūⁿ tio̍h ū lâng tek-chōe lí siáⁿ-mi̍h, tio̍h kā i sià-bián, lín ê Thiⁿ-pē mā ē sià-bián lín ê kòe-sit.
11:26 Lín nā m̄ sià-bián lâng, lín ê Thiⁿ-pē mā bē sià-bián lín ê kòe-sit. " (chù, ū ê chhau-pún bô chit chat. )
11:27 Chit-būn I-é-su ê Koân-pèng
( Mt 21:23-27; Lk 20:1-8)
I-é-su kah bûn-tô͘ koh lâi-kàu Ê-lú-sa-lèm. I-é-su tī tiān lāi teh kiâⁿ ê sî, hiahê chè-si-tiúⁿ, keng-ha̍k kàu-su kah tiúⁿ-ló lâi chhōe I-é-su,
11:28 Mn̄g I kóng, " Lí khò siáⁿ-mi̍h koân-pèng lâi chò chiahê tāichì? Koh sī siáⁿ lâng hō͘ Lí chit-ê koân-pèng lâi chò chiahê tāichì? "
11:29 I-é-su kā in kóng, " Góa mā beh mn̄g lín chi̍t kù ōe. Lín nā ìn góa, góa chiah beh kā lín kóng góa khò siáⁿ-mi̍h koân-pèng lâi chò chiahê tāichì.
11:30 Iô-há-neh e sé-lé ê koân-pèng sī tùi thiⁿ á-.sī tùi lâng lâi ê? Lín tio̍h kā góa kóng. "
11:31 In chiū hō͘-siong gī-lūn kóng, " Lán nā kóng, ' Tùi thiⁿ', I ē kóng, ' Án-ne lín ná ē m̄-sìn Iô-há-neh? '
11:32 Lán kám thang kóng, ' Tùi lâng '? "(In iū koh kiaⁿ kûn-chiòng, in-ūi chèng lâng lóng lia̍h Iô-há-neh chò sian-ti. )
11:33 In chiū ìn I-é-su kóng, " Goán m̄-chai. " I-é-su chiū tùi in kóng, " Án-ne góa mā bô beh kā lín kóng góa sī khò siáⁿ-mi̍h koân-pèng lâi chò chiahê tāichì. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。