馬可福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
10:1 關係離婚ê教示
(太19：1-12)
耶穌離開hia來到偤太地區，過去約旦河hit-pêng。群眾koh聚集去耶穌hia，祂koh照常教示in。
10:2 有一kóa法利賽派ê人beh試探耶穌，óa來問祂講：「人kám thang離伊ê bó͘？」
10:3 耶穌應講：「摩西ê律法án怎規定？」
10:4 In講：「摩西允准人寫離婚書來離伊ê bó͘。」
10:5 耶穌kā in講：「摩西因為lín ê心硬，chiah制定chitê誡命hō͘ lín。
10:6 總是，源起頭，上帝創造人有男有女。(註：創1：27)
10:7 因為ánne，chapo͘人tio̍h離開父母來kah伊ê bó͘結聯；
10:8 兩 个成做一體。(註：創2：24) Án-ne，in m̄是兩 个，是成做一體。
10:9 所以，上帝所配合ê，人m̄ thang kā它拆散。」
10:10 入去厝內，門徒koh問耶穌chitê問題。
10:11 耶穌kā in講：「人若離伊ê bó͘ koh娶別个 chabó͘人，to̍h是犯姦淫來辜負伊ê bó͘；
10:12 bó͘若棄sak她ê丈夫來嫁別个翁，mā是犯姦淫。」
10:13 耶穌祝福細漢Gín-á
(太19：13-15；路18：15-17)
有人chhōa細漢gín-á來耶穌hia，beh hō͘耶穌hōaⁿ手祝福。門徒kā in責備。
10:14 耶穌看tio̍h，真無歡喜，kā門徒講：「Hō͘ hiahê細漢gín-á來我chia，m̄ thang kā in阻擋。因為親像chit款gín-á ê人，chiah ē tàng成做上帝國度ê子民。
10:15 我實在kā lín講，若無親像gín-á ánne接受上帝國度，絕對bē tàng入去。」
10:16 耶穌to̍h kā gín-á抱起來，kā in hōaⁿ手祝福。
10:17 好額人ê疑問
(太19：16-30；路18：18-30)
耶穌出去tī路裡，有一个人走來跪tī祂ê面前，問講：「好ê老師ah，我tio̍h án怎做chiah ē tàng得tio̍h永遠ê活命？」
10:18 耶穌kā伊講：「你ná ē稱呼我是好ê？上帝以外無一个是好ê。
10:19 Chiahê誡命你已經lóng知：M̄-thangthâi死人；M̄-thang姦淫；M̄-thang偷the̍h；M̄-thang做假ê見證；M̄-thang khek虧人；Tio̍h孝敬你ê父母。」(註：出12：16)
10:20 Hitê人應講：「老師ah，chiahê我tùi細漢to̍h lóng有teh遵守。」
10:21 耶穌注目kā伊看，用疼心kā伊講：「你iáu欠一項，你tio̍h去賣你所有ê財產來hō͘ sànchhiah人。Án-ne，你to̍h有積聚財寶tī天頂；然後chiah來tòe我。」
10:22 Hitê人聽tio̍h chiahê話，面就失色，憂頭結面離開耶穌，因為伊有真chē財產。
10:23 耶穌kā群眾看一liàn chiah對門徒講：「好額人beh入上帝國度真困難！」
10:24 門徒聽了chiahê話，感覺真奇怪。耶穌koh講：「細kiáⁿ，óa靠錢財beh入上帝國度真正困難！
10:25 駱駝穿過針鼻比好額人入上帝國度iáu khah簡單。」
10:26 門徒koh khah tio̍h驚，起疑問，講：「Án-ne啥人chiah ē tàng得救？」
10:27 耶穌注目kā in看，講：「Chit項tāichì人做bē到；對上帝來講m̄是ánne，因為上帝ta̍k項lóng ē。」
10:28 彼得to̍h對耶穌講：「阮已經放sak一切來tòe祢à。」
10:29 耶穌應講：「我實在kā lín講，人若為tio̍h我kah福音ê緣故來放sak厝宅、兄弟、姊妹、老母、老父、kiáⁿ兒、田園，
10:30 in tī今世ē得tio̍h百倍ê厝宅、兄弟、姊妹、老母、kiáⁿ兒、田園，同時mā ē受迫害；m̄ koh，tī來世inē得tio̍h永遠ê活命。
10:31 總是，真chē做頭前ê人ē變做路尾，路尾ê人mā ē變做頭前。」
10:32 耶穌第三pái預言祂ê死亡kah Koh活
(太20：17-19；路18：31-34)
耶穌kah門徒上耶路撒冷。Tī路裡，耶穌行tī頭前，門徒tio̍h驚kah gāng去，跟tòe ê人mā真驚惶。耶穌koh chhōa十二使徒去邊á，kā祂teh beh tú ·tio̍h ê tāichì kā in講。
10:33 祂講：「Chit-má咱beh上耶路撒冷，人子會hông出賣去交hō͘ hiahê祭司長kah經學教師。Inē kā祂定死罪，koh kā祂交hō͘外邦人。
10:34 Inē kā祂戲弄、phùi瀾、鞭phah、害死，三日後祂ēkoh活。」
10:35 雅各kah約翰ê要求
(太20：20-28)
然後西庇太ê kiáⁿ雅各kah約翰óa來kā耶穌講：「老師ah，求祢答應阮對祢所求ê tāichì。」
10:36 耶穌問講：「Lín ài我為lín做啥物？」
10:37 In講：「Tī祢得tio̍h榮光ê時，求祢hō͘阮一个坐祢ê正pêng，一个坐祢ê倒pêng。」
10:38 耶穌kā in講：「Lín m̄知kakī teh求啥物。我所lim ê杯，lín kám ē tàng lim？我受ê洗禮，lín kám ē tàng受？」
10:39 In講：「阮會。」耶穌kā in講：「我所lim ê杯，lín beh lim，我所受ê洗禮，lín beh受。
10:40 總是，坐我ê正pêng á是倒pêng，m̄是我ē tàng做主。上帝為tio̍h啥人準備，to̍h ēhō͘ hitê人。」
10:41 其他十個門徒聽tio̍h，to̍h對雅各kah約翰受氣。
10:42 耶穌叫in來，kā in講：「Lín知外邦人ê中間，hō͘人尊做統治者ê人ē做主來kā in治理，in ê官員mā有權kā in管轄。
10:43 獨獨lín中間無應該ánne。Lín中間ài beh做大ê人tio̍h做眾人ê差用；
10:44 lín中間ài beh做頭ê人tio̍h做眾人ê奴僕。
10:45 因為人子來chitê世間m̄是beh hō͘人服事，反tńg是beh來服事人，甚至犧牲kakī ê性命來贖回真chē人。」
10:46 耶穌醫好Chheⁿ-mê ê巴底買
(太20：29-34；路18：35-43)
耶穌kah門徒來到耶利哥城。In kah一大陣人出耶利哥城ê時，有一个chheⁿmê ê乞食，Tí-mái ê kiáⁿ巴底買，坐tī路邊。
10:47 Hitê chheⁿmê ê乞食聽tio̍h拿撒勒人耶穌tùi hia經過，to̍h大聲hoah：「大衛ê kiáⁿ孫，耶穌，可憐我！」
10:48 真chē人kā伊責備，叫伊恬恬，m̄ koh，伊koh khah大聲hoah：「大衛ê kiáⁿ孫ah，可憐我！」
10:49 耶穌停落來，講：「叫伊來。」Into̍h叫chheⁿmê ·ê來，kā伊講：「放心，起來，祂teh叫你。」
10:50 Chheⁿ-mê e5to̍h放落伊ê衫，跳起來去到耶穌hia。
10:51 耶穌kā伊講：「你ài我kā你做啥物？」 Chheⁿ-mê-ê講：「老師，求祢hō͘我ēkoh看見。」
10:52 耶穌kā伊講：「你tńg去，你ê信心已經hō͘你得tio̍h醫好。」Chheⁿ-mê ê隨時koh ē看見，就tòe耶穌去。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。