馬可福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
6:1 耶穌tī家鄉Hông拒絕
(太13：53-58；路4：16-30)
耶穌離開hia，tńg去祂ê故鄉，門徒mā tòe祂去。
6:2 到安息日，祂to̍h tī會堂教示人。真chē人聽tio̍h就奇怪，講：「Chitê人ê本事是tùi tó位來？是啥人賞賜hō͘祂chit款ê智慧？祂án怎有權能行神跡？
6:3 祂kám m̄是木匠師ê kiáⁿ？Kám m̄是馬利亞ê kiáⁿ，雅各、約西、偤大kah西門ê兄弟？祂ê姊妹kám m̄是kah咱tī chia？」In soah對耶穌起反感。
6:4 耶穌to̍h kā in講：「先知tī kakī ê故鄉、kakī ê宗族、kakī ê家庭以外，去到tó位lóngē受人尊重。」
6:5 祂tī故鄉bē tàng行啥物神跡，只不過用手hōaⁿ幾個á病人來kā in醫好。
6:6 耶穌對in ê m̄信感覺奇怪。耶穌差派十二個使徒
(太10：5-15；路9：1-6)
祂to̍h去四箍圍ê庄頭行透透來教示人。
6:7 耶穌召集十二使徒來，to̍h差in一對一對出去，koh賞賜hō͘ in有權能來制壓hiahê邪神。
6:8 祂koh kā in吩咐：m̄ thang帶路費，只有帶一支柺á；m̄ thang帶乾糧；m̄ thang帶行李袋；m̄ thang khǹg錢tī腰帶；
6:9 tio̍h穿涼鞋，mā m̄ thang加帶內衫。
6:10 耶穌koh kā in講：「Lín無論去到啥物所在，tio̍h tòa tī歡迎lín ê人ê厝，一直到離開hitê所在。
6:11 無論tī啥物所在，人若m̄接納lín，m̄聽lín ê教示，lín離開hia ê時，tio̍h kā腳裡ê土沙粉pōaⁿ清氣，來對in警告。」
6:12 門徒to̍h出去傳道，講人tio̍h悔改。
6:13 In mā趕出真chē鬼，用油抹真chē病人，kā in醫好。
6:14 行洗禮約翰ê死亡
(太4：1-12；路9：7-9)
希律王有聽tio̍h耶穌ê tāichì，因為祂ê名聲已經傳到ta̍k所在。有人講：「祂是行洗禮約翰tùi死人中koh活，所以，有權能行chiahê神跡。」
6:15 M̄ koh，mā有別人講：「祂是以利亞。」Koh有人講：「祂是先知，親像古早ê一个先知。」
6:16 希律聽tioh8to̍h講：「伊是我kā伊斬頭ê約翰，伊已經koh活起來。」
6:17 希律有派人去掠約翰來關監，原因是希律侵佔小弟腓力ê bó͘希羅底。
6:18 約翰tiāⁿ-tiāⁿ 對希律講：「你無應該佔兄弟ê bó͘。」
6:19 希羅底就怨恨約翰，ài beh kā伊thâi，m̄ koh無法度實現。
6:20 因為希律知約翰ê做人公義koh聖潔，所以驚伊，mā有teh kā伊保護。希律每pái聽tio̍h約翰ê話，心就操煩不安，m̄ koh伊iáu是歡喜ài聽。
6:21 希羅底有tn̄g tio̍h好機會ê日，to̍h是希律做生日辦桌，請hiahê文武百官kah加利利省民間ê頭人。
6:22 希羅底 ê chabó͘ kiáⁿ入來跳舞，hō͘希律kah同桌ê來賓lóng歡喜。希律王kā chabó͘ gín-á講：「看你ài啥物，做你求，我lóng beh hō͘你。」
6:23 希律koh對她chiùchōa講：「無論你kā我討啥物，連我ê國ê一半，我mā beh hō͘你。」
6:24 Cha-bó͘ gín-á出去問她ê老母，講：「我tio̍h求啥物？」老母應講：「行洗禮約翰ê頭殼。」
6:25 Cha-bó͘ gín-á隨時tńg來對王要求講：「我ài你隨時kā行洗禮約翰ê頭殼貯tī盤裡hō͘我。」
6:26 王ê心to̍h大憂悶；總是，伊bē tàng kā她拒絕，因為伊有tī眾人ê面前chiùchōa。
6:27 王隨時差派一个侍衛兵去監裡the̍h約翰ê頭殼來。侍衛兵to̍h去監裡斬約翰ê頭，
6:28 kā頭殼貯tī盤裡，phâng來hō͘ chabó͘ gín-á。Cha-bó͘ gín-á就the̍h去hō͘ in老母。
6:29 約翰ê門徒聽tio̍h，to̍h來收伊ê身屍，kā伊埋葬tī墓裡。
6:30 耶穌hō͘五千人食飽
(太14：13-21；路9：10-17；約6：1-14)
使徒lóng tńg來聚集tī耶穌ê面前，kā in所做kah所教示ê lóng kā祂報告。
6:31 因為hit時出入ê人真chē，連食飯ê時間都無。耶穌kā in講：「Án-ne, lín mā tio̍h kah我來去偏僻khah無人ê所在小歇睏一下。」
6:32 In就閃開群眾，坐船去偏僻ê所在tòa。
6:33 真chē人看tio̍h in離開，認出是in，to̍h tùi ta̍k个城市行陸路走進前，比in tāi先到hit所在。
6:34 耶穌一下上岸to̍h看tio̍h kui大陣ê人，就憐憫in，因為in親像羊無牧者。祂就教示in真chē項tāichì。
6:35 日beh落山ê時，門徒來kā耶穌講：「Chia真偏僻，時間mā真òaⁿ à，
6:36 請kā群眾解散，hō͘ in thang去附近ê庄頭，kakī 買物件食。」
6:37 耶穌應講：「Lín hō͘ in食。」門徒應講：「總無阮tio̍h用兩百個銀á去買餅來hō͘ in食？」
6:38 耶穌問in講：「Lín有gōa chē餅，去看māi lè。」In看了，to̍h講：「有五塊餅，mā有兩尾魚。」
6:39 耶穌to̍h吩咐門徒kā群眾分組，坐tòa 青翠ê草埔。
6:40 群眾就分組來坐，有ê一百人，有ê五十人。
6:41 耶穌the̍h起hit五塊餅kah兩尾魚，ǹg天感謝了後，kā餅peh開，hō͘門徒去分hō͘群眾，mā kā hit兩尾魚分hō͘群眾。
6:42 大家lóng食kah真飽。
6:43 後來，門徒拾hiahê食chhun落來ê餅碎kah魚屑á，貯滿十二籃。
6:44 食餅ê chapo͘人to̍h有五千。
6:45 耶穌tī湖ê水面行
(太14：22-33；約6：15-21)
耶穌隨時叫門徒緊上船，tāi先過去hit-pêng岸，到伯賽大。祂kakī 留teh，來解散群眾。
6:46 群眾離開了後，耶穌to̍h去山裡祈禱。
6:47 天已經暗à，船行到湖中，kantaⁿ耶穌kakī tī岸頂。
6:48 耶穌看tio̍h門徒chìⁿ風划槳真艱苦。暗時差不多四更，耶穌tùi湖ê水面行來in hia，ài beh tùi in ê邊á過去。
6:49 門徒看tio̍h祂行tī水面，掠做是鬼，to̍h大聲hoah。
6:50 因為大家lóng有看tio̍h祂，to̍h tio̍h驚。耶穌隨時kā in講：「安lín ê心，是我，m̄免驚。」
6:51 耶穌to̍h chiūⁿ船去kah in做伙，風to̍h恬去。門徒不止á tio̍h驚，soah gāng去。
6:52 因為in iáu未了解hit五塊餅ê神跡；in ê心真鈍。
6:53 耶穌tī革尼撒勒醫好病人
(太14：34-36)
耶穌kah門徒過湖了後，來到革尼撒勒上岸，kā船拋tòa岸邊。
6:54 In一下落船，眾人隨時認出耶穌。
6:55 眾人tī hit地方行透透，群眾聽tio̍h耶穌tī啥物所在，to̍h用舖á扛病人去hia。
6:56 耶穌無論入去啥物庄頭、城市、鄉村，人to̍h kā病人khǹg tòa街路，求耶穌至少hō͘ in摸祂ê衫á裾ê鬚。所有摸tio̍h ê人lóng得tio̍h醫好。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。