馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
23:1 經學教師kah法利賽派ê行為
Hit時，耶穌kā群眾kah祂ê門徒講：
23:2 「經學教師kah法利賽派ê人坐tī摩西ê位teh解說律法。
23:3 所以，in kā lín講ê，lín lóng tio̍h遵守來做，總是，m̄ thang照in ê行為來行；因為in講一款，做koh另外一款。
23:4 In kā重koh oh擔ê擔縛tòa人ê肩胛頭頂，m̄ koh，in kakī 連一支指頭á都m̄肯振動。
23:5 In所做ê tāichì lóng是為tio̍h beh hō͘眾人看。In kā經文袋做khah闊，衫á裾ê鬚做khah長。
23:6 In koh ài tī宴席坐大位，tī會堂內坐高位，
23:7 又koh ài tī大路口hō͘人請安，mā ài hō͘人稱呼in做『拉比』(老師)。
23:8 M̄ koh，lín m̄ thang hō͘人叫做「拉比」，因為lín ê老師只有一个，lín互相lóng是兄弟。
23:9 Tī地chiūⁿmā m̄ thang稱人做「父」，因為lín ê天父只有一位，to̍h是tī天頂hit位。
23:10 Lín mā m̄ thang hō͘人叫做「老師」，因為lín ê老師只有一位，to̍h是基督。
23:11 M̄ koh，lín中間做大ê人tio̍h做lín ê差用。
23:12 凡若驕傲ê人一定ēhō͘人壓低；自謙ê人一定ēhō͘人高升。」
23:13 譴責經學教師kah法利賽派ê人
(可12：38-40；路11：37-52；20：45-47)
「Lín chiahê假好ê經學教師kah法利賽派ê人，lín慘à！因為lín kā天國ê門關起來。Lín kakī 無beh入去，mā m̄准hō͘想beh入去ê人入去。
23:14 「Lín chiahê假好ê經學教師kah法利賽派ê人，lín慘à！Lín侵佔寡婦ê家伙，koh假意祈禱真久。Lín一定ē受tio̍h koh khah嚴重ê刑罰。」（註：原譯本無chit節，有ê抄本加chit節）
23:15 Lín chiahê假好ê經學教師kah法利賽派ê人，lín慘à！因為lín為tio̍h beh hō͘一个人入教，天邊海角行透透。M̄ koh，hitê人入教了後，lín soah hō͘伊變做比lín加倍pháiⁿ ê人。
23:16 Lín chiahê chheⁿmê做指導者ê人慘à！Lín講kí聖殿來chiùchōa ê無效果；獨獨kí聖殿ê金器來chiùchōa ê chiah有準算。
23:17 Lín chiahê戇koh chheⁿmê ê人，是金器á是hō͘金器成做神聖ê聖殿，tó一項khah重要？
23:18 Lín koh講kí祭壇來chiùchōa ê無準算；獨獨kí壇頂ê祭物來chiùchōa ê chiah tio̍h遵守。
23:19 Lín chiahê chheⁿmê ·ê ah，是祭物á是hō͘祭物成做神聖ê祭壇，tó一項khah重要ah？
23:20 所以，人kí祭壇來chiùchōa，是kí祭壇kah壇頂ê祭物來chiùchōa。
23:21 人kí聖殿來chiùchōa，是kí聖殿kah tiàm tī hit內面ê上帝來chiùchōa。
23:22 人kí天來chiùchōa，是kí上帝ê寶座kah坐tī hit頂面ê上帝來chiùchōa。
23:23 「Lín chiahê假好ê經學教師kah法利賽派ê人，lín慘ah！Lín都kā薄荷、八角、小茴香ê十份獻一份hō͘上帝，m̄ koh，lín顛倒忽略律法所重視ê公義、憐憫kah信實。總是，chiahê tio̍h應該遵守，頂面所提起hiahê慣例mā m̄ thang忽略。
23:24 Lín chiahê chheⁿmê做指導者ê人，細隻蚊á lín to̍h kā牠濾起來，駱駝soah kui隻吞落去。
23:25 「Lín chiahê假好ê經學教師kah法利賽派ê人，lín慘ah！Lín kā杯kah盤ê外面洗清氣，m̄ koh，hit內面充滿貪慾kah放縱。
23:26 Lín chiahê chheⁿmê ·ê法利賽派ê人，lín tio̍h tāi先kā杯盤ê內面洗清氣，外面自然to̍h ē清氣。
23:27 「Lín chiahê假好ê經學教師kah法利賽派ê人，lín慘ah！Lín親像漆kah白siaksiak ê墓，外面看起來真súi，m̄ koh，內面充滿死人ê骨頭kah ta̍k項ê污穢。
23:28 Lín mā親像ánne，外面hō͘人看做是義人，m̄ koh，內面充滿假好kah不義。」
23:29 「Lín chiahê假好ê經學教師kah法利賽派ê人，lín慘ah！Lín起造先知ê墓，整修義人ê紀念碑。
23:30 Lín koh講：『阮若活tī阮祖先ê時代，阮一定bē kah in tàu陣殺害先知。』
23:31 Án-ne，lín kakī 證明lín是做伙殺害先知ê人ê kiáⁿ孫。
23:32 做lín去繼續完成lín祖先惡毒ê tāichì。
23:33 Lín chiahê毒蛇ê kiáⁿ孫ah！奸詭ê人ah！Lín ná ē tàng逃閃地獄ê刑罰？
23:34 所以，我beh差派先知、智慧ê人kah經學教師去lín hia。有êē hō͘ lín殺害á是釘十字架；有ê mā ē hō͘ lín tī會堂用鞭phah，tùi chitê城趕逐到hitê城。
23:35 Án-ne，lín tī地chiūⁿ所流義人ê血，lóng歸tī lín，to̍h是tùi義人亞伯ê血到Ba-la-khiah ê kiáⁿ撒迦利亞tī殿kah壇ê中間所流ê血lóng歸tī lín。
23:36 我實在kā lín講，chiahê血債lóng beh歸tī chit代ê人。」
23:37 耶穌為耶路撒冷哀哭
(路13：34-35)
「耶路撒冷ah！耶路撒冷ah！Lin2thâi死先知，用石頭tìm死上帝差派來到lín chia ê使者。我gōa chē pái ài beh聚集你ê kiáⁿ兒，親像雞母聚集雞á-kiáⁿ tī翼股下，m̄ koh，lín lóng無ài。
23:38 你看！Lín ê厝一定ē拋荒無人tòa。
23:39 我kā lín講，tùi taⁿ以後lín bē tàng koh看tio̍h我，一直到lín講：『奉主ê名來ê hit位應該得tio̍h oló。』」(註：詩118：26)
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。