馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
10:1 I-é-su Siat-li̍p Cha̍p-jī Bûn-tô͘
( Mk 3: 13-19; Lk 6: 12-16)
I-é-su chiū kiò I cha̍p-jī bûn-tô͘ lâi, hō͘ in ū chè-ap siâ-sîn ê koân-pèng lâi kóaⁿ kúi, koh i hó ta̍k-khoán ê chèng-thâu kah pēⁿ-thiàⁿ.
10:2 Cha̍p-jī sù-tô͘ ê miâ to̍h-sī, thâu chi̍t-ê Sí-mòng ( mā kiò-chò Piat-tò͘ ) kah i ê hiaⁿ-tī An-to-le̍h; Che-beh-tái ê kiáⁿ Iâ-kop kah i ê hiaⁿ-tī Iô-há-neh;
10:3 Hui-li̍p-pò͘ kah Ba-tho-lô-mái; Tho-má-suh kah thiu-sòe ê Má-thài; Al-hoa-ioh ê kiáⁿ Iâ-kop kah That-tái;
10:4 Kek-chìn-tóng ê Sí-mòng kah chhut-bē I-é-su hit-ê Ka-lio̍k lâng Iô-tah.
10:5 Cha̍p-jī Bûn-tô͘ ê Sù-bēng
( Mk 6:7-13; Lk 7 9:1-6)
I-é-su chhe-phài chit cha̍p-jī lâng chhut-.khì, koh hoan-hù in kóng, " M̄-thang khì gōa-pang lâng ê tē-khu, mā m̄ thang ji̍p-khì Sa-má-lī-a lâng ê siâⁿ.
10:6 Lín eng-kai tio̍h khì chhōe I-su-la-el cho̍k sit-bê ê iûⁿ.
10:7 Lín tio̍h ná kiâⁿ ná soan-iông, kóng, ' Thian-kok teh beh lâi-lîm à! '
10:8 Lín tio̍h i hó phòa-pēⁿ ê lâng, hō͘ sí-lâng koh-oa̍h, hō͘ thái-ko ê lâng chheng-khì, kóaⁿ kúi. Lín pe̍h-pe̍h tit tio̍h, mā tio̍h pe̍h-pe̍h hō͘ lâng.
10:9 Lín ê io-tē lāi, lóng m̄ thang tòa kim, gîn á-.sī tâng ê chîⁿ.
10:10 Lín chhut-mn̂g mā m̄ thang tòa hêng-lí tē, m̄ thang tòa nn̄g niá saⁿ, m̄ thang chhēng ê, m̄ thang gia̍h koái-á, in-ūi chò-kang ê lâng eng-kai tit tio̍h i só͘ su-iàu ê lim-chia̍h.
10:11 " Lín bô-lūn ji̍p-khì tó chi̍t-ê siâⁿ á-.sī tó chi̍t-ê hiuⁿ-siā, tio̍h thàm-thiaⁿ kî-tiong siáⁿ lâng goān-ì chiap-thāi lín, chiah-khì tòa hia, kàu lī-khui ûi-chí.
10:12 Lín ji̍p-khì hit keng chhù ê sî, tio̍h kā in chhéng-an.
10:13 Hitê ka-têng nā goān-ì chiap-thāi lín, lín só͘ chiok-hok ê pêng-an chiū ē hō͘ in. Nā bô goān-ì, tio̍h siu hôe léng só͘ chiok-hok ê pêng-an.
10:14 Nā ū lâng m̄ chiap-thāi lín, m̄-thiaⁿ lín ê ōe, lín lī-khui hit keng chhù á-.sī hit-ê siâⁿ ê sî, tio̍h kā lín kha-.ni̍h ê thô͘-soa hún pōaⁿ hō͘ i chheng-khì.
10:15 Góa si̍t-chāi kā lín kóng, tī sím-phòaⁿ ê ji̍t, So͘-tóm kah Am-mo͘-la̍h ê só͘-chāi só͘ siū ê hêng-hoa̍t, ē pí hit-ê siâⁿ khah hó jím-siū. "
10:16 Teh Beh Lâi-lîm ê Pek-hāi
( Mk 13: 9-13; Lk 21: 12-17)
" Taⁿ Góa chhe lín chhut-khì thoân hok-im, ná chhin-chhiūⁿ sàng iûⁿ ji̍p-khì chhâi-lông ê tiong-kan, só͘-í, lín tio̍h chhin-chhiūⁿ chôa hiahni̍h lêng-khiáu, koh chhin-chhiūⁿ hún-chiáu hiahni̍h sûn-liông.
10:17 Chóng-.sī, lín tio̍h thê-hông, in-ūi lâng ē kā lín kau hō͘ gī-hōe, mā ē tī in ê hōe-tn̂g kā lín piⁿ-phah.
10:18 Koh lín mā ē ūi tio̍h góa ê iân-kò͘, hō͘ lâng thoa-khì chóng-tok kah kun-ông ê bīn-chêng, lâi tùi in kah gōa-pang lâng chò kiàn-chèng.
10:19 M̄ koh, lín hō͘ lâng lia̍h-khì sím-mn̄g ê sî, m̄-bián chhau-hoân beh án-chóaⁿ kóng á-.sī kóng siáⁿ-mi̍h ōe, in-ūi hit sî Sèng Sîn ē kā lín chí-sī;
10:20 In-ūi m̄-sī lín kakī teh kóng, sī Sèng Sîn tiàm tī lín lāi-bīn teh kóng.
10:21 Hiaⁿ-tī-hōe chhut-bē hiaⁿ-tī hō͘ i sí, lāu-pē mā ánne tùi-thāi kiáⁿ-jî; kiáⁿ-jî ē khí-lâi kong-kek pē-bú, kā in kau hō͘ lâng khì chhú sí-hêng.
10:22 Lín ē in-ūi góa ê miâ hō͘ chèng lâng oàn-hūn, to̍k-to̍k jím-nāi kàu-té ê lâng ē tit tio̍h kiù.
10:23 Lâng nā tī chit-ê siâⁿ pek-hāi lín, lín tio̍h tô-cháu khì pa̍t-ê siâⁿ. Góa si̍t-chāi kā lín kóng, I-su-la-el chiahê siâⁿ-chhī lín kiâⁿ iáu-bōe thàu, Jîn-chú chiū ē lâi-lîm.
10:24 Ha̍k-seng bē chhiau-kòe lāu-su, lô͘-po̍k mā bē chhiau-kòe chú-lâng.
10:25 Ha̍k-seng kah lāu-su kāng-khoán, lô͘-po̍k kah chú-lâng kāng-khoán, ánne chiū ū kàu-gia̍h. Chi̍t ke ê chú-lâng nā hông mā chò kúi-ông Be̍h-che-bul, i chhù lāi ê lâng ē hông mē koh khah pháiⁿ thiaⁿ. "
10:26 Tio̍h Kèng-ùi ê Sī Siōng-tè
( Lk 12: 2-7)
" Só͘-í, m̄-bián kiaⁿ hiahê lâng, in-ūi bô chi̍t hāng khàm ba̍t ê tāichì āu-lâi bô lō͘-hiān chhut-.lâi, mā bô chi̍t hāng ún-ba̍t ê tāichì āu-lâi bô hō͘ lâng chai.
10:27 Góa tī àm-tiong kā lín kóng ê, lín tio̍h tī kng-bêng ê só͘-chāi kóng chhut-.lâi; àⁿ tī hīⁿ-khang kā lín kóng ê, lín tio̍h tī chhù-bóe-téng soan-iông chhut-.khì.
10:28 M̄-bián kiaⁿ hiahê hāi-sí seng-khu khiok bē hāi-sí lêng-hûn ê; tian-tò tio̍h-kiaⁿ Siōng-tè, I ū lêng-le̍k kā lêng-hûn kah seng-khu hiat lo̍h-khì tē-ga̍k.
10:29 Nn̄g chiah chhek-chiáu-á kám m̄-sī ē-tàng bē chi̍t kak gîn? Nā m̄-sī lín ê Thiⁿ-pē ū ín-chún, liân chi̍t chiah to bē poa̍h-lo̍h thô͘-kha.
10:30 Thiⁿ-pē liân lín ê thâu-mn̂g mā lóng ū sǹg kòe.
10:31 Só͘-í, m̄-bián kiaⁿ. Lín pí chit kui tīn ê chhek-chiáu-á koh khah kùi-tiōng! "
10:32 Kong-khai Sêng-jīn Ki-tok
( Lk 12: 8-9)
" Só͘-í, tī lâng ê bīn-chêng sêng-jīn góa ê, góa mā beh tī góa Thiⁿ-pē ê bīn-chêng sêng-jīn i. "
10:33 Tī lâng ê bīn-chêng m̄ sêng-jīn góa ê, góa mā beh tī Thiⁿ-pē ê bīn-chêng m̄ sêng-jīn i. "
10:34 M̄-sī Hô-pêng, Sī To-kiàm
( Lk 12: 51-53; 14: 26-27)
" M̄-thang siūⁿ kóng Góa lâi sī beh hō͘ tē-chiūⁿ hô-pêng. Góa m̄-sī tòa-lâi hô-pêng, sī tòa-lâi to-kiàm.
10:35 In-ūi góa lâi sī beh hō͘ lâng tùi-khòng; kiáⁿ kah i ê lāu-pē choa̍t-chêng, chabó͘ kiáⁿ kah i ê lāu-bú, sim-pū kah i ê ta-ke mā ē ánne.
10:36 Sū-si̍t siōng, lâng ê tùi-te̍k to̍h-sī kakī chhù lāi ê lâng. " (chù, MKS 7:6)
10:37 Thiàⁿ pē-bú chhiau-kòe thiàⁿ góa ê lâng, bô chu-keh chò góa ê bûn-tô͘; thiàⁿ kiáⁿ-jî chhiau-kòe thiàⁿ góa ê lâng, mā bô chu-keh chò góa ê bûn-tô͘.
10:38 M̄ giâ kakī ê si̍p-jī-kè lâi tòe góa ê lâng, mā bô chu-keh tòe góa.
10:39 Ài beh pó-choân kakī sèⁿ-miā ê lâng ē sòng-sit sèⁿ-miā; ūi tio̍h góa lâi sòng-sit sèⁿ-miā ê lâng ē tit tio̍h sèng-miā. "
10:40 Pò-siúⁿ
( Mk 9: 41)
" Chiap-la̍p lín ê lâng to̍h-sī chiap-la̍p góa. Chiap-la̍p góa ê lâng to̍h-sī chiap-la̍p chhe góa lâi ê hit ūi.
10:41 Ūi tio̍h sian-ti ê miâ lâi kā i chiap-la̍p ê lâng, ē-tàng hun-hióng sian-ti ê pò-siúⁿ.
10:42 Góa si̍t-chāi kā lín kóng, lâng nā tài-liām kóng lín sī góa ê bûn-tô͘, kantaⁿ phâng chi̍t poe léng-chúi hō͘ bûn-tô͘ tiong siōng bî-sè ê chi̍t-ê lim, i chiū it-tēng ē tit tio̍h pò-siúⁿ. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。