馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
5:1 Soaⁿ-téng ê Kà-sī
I-é-su khòaⁿ tio̍h hiah tōa-tīn ê lâng, to̍h peh chiūⁿ soaⁿ. I chē lo̍h-.khì, bûn-tô͘ chiū óa-.lâi.
5:2 I-é-su chiū khai-sí kà-sī,
5:3 Si̍t-chāi Ū Hok-khì ê Lâng
( Lk 6: 20-23)
" Ē-hiáu óa-khò Siōng-tè ê lô͘-po̍k si̍t-chāi ū hok-khì, in-ūi in ē chiâⁿ-chò thian-kok ê chú-bîn!
5:4 Ūi tio̍h chōe-kò iu-siong ê lâng si̍t-chāi ū hok-khì, in-ūi Siōng-tè ē kā in an-ùi!
5:5 Un-jiû ê lâng si̍t-chāi ū hok-khì, in-ūi Siōng-tè ē siúⁿ-sù hō͘ in I só͘ èng-ín ê thó͘-tē!
5:6 Jia̍t-chhiat him-bō͘ Siōng-tè chí-ì ê lâng si̍t-chāi ū hok-khì, in-ūi Siōng-tè ē hō͘ in boán-chiok!
5:7 Gâu liân-bín lâng ê lâng si̍t-chāi ū hok-khì, in-ūi Siōng-tè ē kā in liân-bín!
5:8 Sim-koaⁿ chheng-khì ê lâng si̍t-chāi ū hok-khì, in-ūi in ē kìⁿ tio̍h Siōng-tè!
5:9 Hō͘ lâng hô-pêng ê lâng si̍t-chāi ū hok-khì, in-ūi in ē chiâⁿ-chò Siōng-tè ê kiáⁿ-jî!
5:10 Ūi tio̍h si̍t-hiān Siōng-tè ê chí-ì siū pek-hāi ê lâng si̍t-chāi ū hok-khì, in-ūi in ē chiâⁿ-chò thian-kok ê chú-bîn!
5:11 Lín nā ūi tio̍h Góa ê iân-kò͘ hō͘ lâng bú-jio̍k, pek-hāi, húi-pòng, chiū si̍t-chāi ū hok-khì.
5:12 Tio̍h hoaⁿ-hí khoài-lo̍k, in-ūi lín tī thiⁿ-téng ū chin tōa ê pò-siúⁿ. Lín kó͘-chá ê sian-ti mā sī ánne hō͘ lâng pek-hāi. "
5:13 Iâm kah Kng
( Mk 9: 50; Lk 14: 34-35)
" Lín ná chhin-chhiūⁿ sè-kan ê iâm. Iâm nā sit-bī, beh án-chóaⁿ hō͘ i koh ū kiâm-bī? Nā sit-khì kiâm-bī chiū bô lō͘-ēng ā, chí ū hiat khì gōa-bīn hō͘ lâng thún-ta̍h. "
5:14 " Lín sī sè-kan ê kng. Khí tī soaⁿ téng ê siâⁿ am-khàm bē tiâu.
5:15 Bô lâng tiám teng khǹg tòa bí-táu lāi-bīn, lóng sī chhāi tī teng-tâi téng lâi chiò-kng, thang hō͘ kui keng chhù lāi ê lâng ū khòaⁿ-kìⁿ.
5:16 Chhin-chhiūⁿ ánne, lín ê kng tio̍h chiò tī lâng ê bīn-chêng, hō͘ in khòaⁿ tio̍h lín ê hó hêng-ûi, lâi êng-kng lín ê Thiⁿ-pē. "
5:17 I-é-su kah Lu̍t-hoat
" M̄-thang siūⁿ kóng góa lâi ê bo̍k-tek sī beh hùi-tû Mô͘-se ê lu̍t-hoat á-.sī sian-ti ê kà-sī. Góa lâi m̄-sī beh hùi-tû, sī beh sêng-choân.
5:18 Góa si̍t-chāi kā lín kóng, to̍h-sī kàu thiⁿ-tē siau-sit kah lu̍t-hoat ê bo̍k-tek lóng ta̍t-sêng ê sî, lu̍t-hoat ê chi̍t-tiám chi̍t-u̍ih to bē siau-sit-.khì.
5:19 Só͘-í, nā ū lâng sûi-jiân hoān tio̍h kài-bēng tiong siōng sè ê chi̍t tiâu, koh ánne kà lâng khì hoān, i tī thian-kok sǹg-chò sī siōng sè ê. To̍k-to̍k nā si̍t-hiān kài-bēng koh kà-sī lâng khì ánne chò, i tī thian-kok chiū ē sǹg-chò sī siōng tōa ê.
5:20 Góa kā lín kóng, lín nā bô pí keng-ha̍k kàu-su kah Hoa-lí-sái phài ê lâng koh khah tiong-si̍t chun-siú Siōng-tè ê chí-ì, lín choa̍t-tùi bē tàng chìn-ji̍p thian-kok. "
5:21 Koan-hē Siū-khì ê Kà-sī
" Lín bat thiaⁿ tio̍h lu̍t-hoat kà-sī kó͘-chá lâng kóng, ' M̄-thang hāi-sí-lâng. (chù, CAG 20: 13) hāi-sí-lâng ê tio̍h siū sím-phòaⁿ. '
5:22 Chóng-.sī, góa kā lín kóng, tùi hiaⁿ-tī chí-mōe siū-khì ê lâng, lóng tio̍h siū sím-phòaⁿ. Mē hiaⁿ-tī chí-mōe ' Pn̄g-tháng'ê lâng, tio̍h-siōng hoat-têng; mē hiaⁿ-tī chí-mōe ' Gōng-tai'ê lâng, it-tēng tio̍h siū tē-ga̍k ê hóe-hêng.
5:23 Só͘-í, lí khì chè-tôaⁿ hiàn chè-mi̍h ê sî, nā siūⁿ-khí lí ê hiaⁿ-tī chí-mōe tùi lí ū siáⁿ-mi̍h put-boán,
5:24 Lí tio̍h kā chè-mi̍h lâu tī chè-tôaⁿ chêng, seng khì kah lí ê hiaⁿ-tī chí-mōe hô-hó, jiân-āu chiah tńg-lâi hiàn chè-mi̍h. "
5:25 " Nā ū lâng kā lí khòng-kò, beh kā lí thoa-khì hoat-têng, iáu tī lō͘-.ni̍h ê sî, tio̍h thàn-chá kah i hô-kái. Nā bô, i ē kā lí kau hō͘ hoat-têng, sím-phòaⁿ-koaⁿ ē kā lí kau hō͘ hoat-kéng khì chē-kaⁿ.
5:26 Góa si̍t-chāi kā lí kóng, chòe-āu ê chi̍t sián gō͘ lî nā bô hêng chheng-chhó, lí choa̍t-tùi bē tàng tùi kaⁿ-.ni̍h chhut-.lâi. "
5:27 Koan-hē Kan-îm ê Kà-sī
" Lín bat thiaⁿ tio̍h lu̍t-hoat kà-sī lâng kóng, ' M̄-thang hoān kan-îm. ' (chù, CAG 20: 14; SBK 5: 18)
5:28 M̄ koh, góa kā lín kóng, nā ū lâng sim chûn siâ-io̍k lâi khòaⁿ hū-jîn-lâng, i tī sim-lāi í-keng kah i hoān kan-îm ā.
5:29 Lí ê chiàⁿ ba̍k nā ín-khí lí hoān chōe, tio̍h kā i ó͘ hiat-ka̍k. Lêng-khó sit-khì seng-khu ê chi̍t-pō͘-hūn, pí choân-sin hó-hó hiat lo̍h tē-ga̍k khah hó.
5:30 Lí ê chiàⁿ chhiú nā ín-khí lí hoān chōe, tio̍h kā i chām hiat-ka̍k. Lêng-khó sit-khì ki-thé ê chi̍t-pō͘-hūn, pí kui seng-khu hó-hó hiat lo̍h tē-ga̍k khah hó. "
5:31 Koan-hē Lî-hun ê Kà-sī
( Mt 19: 9; Mk 10: 11-12; Lk 16: 18)
" Koh ū lu̍t-hoat ánne kóng, ' Lâng nā beh kah i ê bó͘ lî-hun, tio̍h hō͘ i lî-hun-su. ' (chù, SBK 24:1)
5:32 M̄ koh, góa kā lín kóng, lâng nā m̄-sī in-ūi bó͘ kah lâng su-thong lâi kā i lî-hun, chit-ê hū-jîn-lâng nā koh-kè, to̍h-sī hāi i hoān kan-îm; nā ū lâng chhōa chit-ê hū-jîn-lâng mā sī hoān kan-îm. "
5:33 Koan-hē Chiù-chōa ê Kà-sī
" Lín mā bat thiaⁿ tio̍h lu̍t-hoat kà-sī kó͘-chá lâng kóng, ' M̄-thang ûi-pōe chiùchōa, lí tī Siōng-tè ê bīn-chêng só͘ chiùchōa ê, it-tēng tio̍h si̍t-hêng. ' (chù, LBK 19:12; BSK 30:2; SBK 23:21)
5:34 M̄ koh, góa kā lín kóng, lóng m̄ thang chiùchōa. M̄-thang kí thiⁿ lâi chiùchōa, in-ūi thiⁿ sī Siōng-tè ê pó-chō;
5:35 Mā m̄ thang kí tē lâi chiùchōa, in-ūi tē sī Siōng-tè ê kha-ta̍h; mā m̄ thang kí Ê-lú-sa-lèm lâi chiùchōa, in-ūi Ê-lú-sa-lèm sī tōa kun-ông ê siâⁿ;
5:36 Mā m̄ thang kí lí ê thâu-khak lâi chiùchōa, in-ūi lí bē tàng hō͘ chi̍t ki thâu-mn̂g piàn-o͘ á-.sī piàn-pe̍h.
5:37 Lín kóng-ōe eng-kai, ' Sī' chiū kóng ' Sī', ' M̄-sī' chiū kóng ' M̄-sī'; kî-tha ke kóng ê, sī tùi hit-ê Mô͘-kúi chhut-.lâi ê. "
5:38 Koan-hē Pò-ho̍k ê Kà-sī
( Lk 6: 29-30)
" Lín mā bat thiaⁿ tio̍h lu̍t-hoat ê kà-sī ánne kóng, ' Ba̍k-chiu pôe ba̍k-chiu, chhùi-khí pôe chhùi-khí. ' (chù, CAG 21:24; LBK 24:20; SBK 19:21)
5:39 M̄ koh, góa kā lín kóng, m̄ thang ' ēng pháiⁿ pò pháiⁿ'. Nā ū lâng siàn lí chiàⁿ pêng ê chhùi-phóe, tio̍h liân tò pêng mā oa̍t khì hō͘ i siàn.
5:40 Lâng nā kā lí khòng-kò, beh ài lí ê lāi-saⁿ, tio̍h liân gōa-saⁿ mā pàng hō͘ i.
5:41 Nā ū lâng kiông-pek lí phāiⁿ i ê hêng-lí kiâⁿ chi̍t-lí lō͘, tio̍h kah i kiâⁿ nn̄g lí lō͘.
5:42 Nā ū lâng tùi lí kiû siáⁿ-mi̍h, tio̍h hō͘ i. Nā ū lâng beh kā lí chioh siáⁿ-mi̍h, m̄ thang kā i kī-choa̍t. "
5:43 Thiàⁿ Te̍k-jîn ê Kà-sī
( Lk 6: 27-28,32-36)
" Lín mā bat thiaⁿ tio̍h lu̍t-hoat ê kà-sī kóng, ' Tio̍h thiàⁿ lí ê chhù-piⁿ, oàn-hūn lí ê tùi-te̍k. '( Chù, LBK 19: 18)
5:44 M̄ koh, góa kā lín kóng, tio̍h thiàⁿ lín ê tùi-te̍k, tio̍h thè pek-hāi lín ê lâng kî-tó.
5:45 Lín nā ánne chò, chiū ē chiâⁿ-chò Thiⁿ-pē ê kiáⁿ-jî, in-ūi I hō͘ ji̍t-thâu chiò pháiⁿ lâng kah hó lâng, mā ūi tio̍h gī lâng kah put-gī ê lâng lo̍h hō͘.
5:46 In-ūi lín nā kantaⁿ thiàⁿ hiahê thiàⁿ lín ê lâng, kám ē-tàng tit tio̍h siáⁿ-mi̍h pò-siúⁿ? Liân hiahê thiu-sòe ê lâng mā ē-hiáu ánne chò.
5:47 Lín nā kantaⁿ tùi kakī ê hiaⁿ-tī chí-mē chhéng-an, ū siáⁿ-mi̍h pí pa̍t lâng khah te̍k-pia̍t? Liân gōa-pang lâng mā ánne teh chò, kám m̄-sī?
5:48 Só͘-í, lín tio̍h chò oân-choân ê lâng, chhin-chhiūⁿ lín ê Thiⁿ-pē. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。