撒迦利亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Siōng-chú Èng-ín beh Tiông-kiàn Sèng-tiān
Bān-kun ê Siōng-chú ê ōe lîm-kàu góa, kóng,
8:2 Bān-kun ê Siōng-chú ánne kóng, " Góa ūi tio̍h Si-óng hui-siông jia̍t-sim, Góa ūi tio̍h i jia̍t-sim, hoat-chhut tōa siū-khì. "
8:3 Siōng-chú koh kóng, " Góa taⁿ tò tńg-lâi Si-óng, beh tiàm tī Ê-lú-sa-lèm ê tiong-kan. Ê-lú-sa-lèm beh kiò-chò sêng-si̍t ê siâⁿ, bān-kun ê Siōng-chú ê soaⁿ beh kiò-chò ' sèng-soaⁿ'. "
8:4 Bān-kun ê Siōng-chú ánne kóng, " Chiong-lâi ē ū lāu ê chapo͘ lâng kah lāu ê chabó͘ lâng chē tī Ê-lú-sa-lèm khoah ê ke-lō͘, in-ūi nî lāu ta̍k-ê lóng gia̍h koái-á.
8:5 Siâⁿ lāi khoah ê ke-lō͘ ē ū chapo͘ gín'á, chabó͘ gín'á móa-móa sī tī hit-ê ke-lō͘ tiong teh chhitthô. "
8:6 Bān-kun ê Siōng-chú ánne kóng, " Hit tong-sî só͘ chhun lo̍h-.lâi ê jîn-bîn kā che khòaⁿ-chò kî-koài, Góa kám mā ē khòaⁿ-chò kî-koài? Che sī bān-kun ê Siōng-chú kóng ê. "
8:7 Bān-kun ê Siōng-chú ánne kóng, " Lí khòaⁿ, Góa beh kiù Góa ê chú-bîn tùi ji̍t chhut ê só͘-chāi, mā tùi ji̍t lo̍h ê só͘-chāi tò tńg-.lâi.
8:8 Góa beh chhōa in lâi, in beh tòa tī Ê-lú-sa-lèm ê tiong-kan. In beh chò Góa ê chú-bîn, Góa beh chò in ê Siōng-tè, pîn sêng-si̍t kah kong-gī. "
8:9 Bān-kun ê Siōng-chú ánne kóng, " Tng hē bān-kun ê Siōng-chú ê tiān ê tē-ki thang khí sèng-tiān ê sî, hit ji̍t sian-ti só͘ kóng ê ōe, chitmá lín thiaⁿ-.tio̍h, taⁿ tio̍h ióng-chòng lín ê chhiú.
8:10 Hit ji̍t í-chêng, lâng bô tit tio̍h kang-chîⁿ, chengseⁿ mā bô tit tio̍h kang-chîⁿ; jî-chhiáⁿ in-ūi tùi-te̍k ê iân-kò͘, chhut-ji̍p ê lâng bô tit tio̍h pêng-an, in-ūi Góa hō͘ chèng lâng hō͘-siōng kong-kek.
8:11 Chóng-.sī, Góa taⁿ khoán-thāi chiahê chhun lo̍h-.lâi ê jîn-bîn bô beh chhin-chhiūⁿ í-chêng ê ji̍t. Che sī bān-kun ê Siōng-chú kóng ê.
8:12 In-ūi ē ū pêng-an ê chéng-chí, phû-tô chhiū ē kiat kóe-chí, tē ē chhut lông-sán-bu̍t, thiⁿ ē lo̍h lō͘-chúi. Góa beh hō͘ chiahê chhun lo̍h-.lâi ê jîn-bîn sêng-siū chiahê it-chhè.
8:13 Iô-tah ke kah I-su-la-el ê chú-bîn, í-chêng tī lia̍t kok tiong ín-khí lín lâi chiù-chó͘, ánne góa beh chín-kiù lín, hō͘ lâng tit tio̍h lín lâi chiok-hok. Lín m̄-bián kiaⁿ, lín ê chhiú tio̍h ióng-chòng. "
8:14 In-ūi bān-kun ê Siōng-chú ánne kóng, " Lín ê chó͘-sian jiá Góa siū-khì ê sî, Góa siūⁿ beh kàng chai-hō tī lín, mā bô hō͘-hóe.
8:15 Taⁿ Góa mā ánne siūⁿ beh si un hō͘ Ê-lú-sa-lèm kah Iô-tah ke, lín m̄-bián kiaⁿ. Che sī Siōng-chú kóng ê.
8:16 Lín só͘ eng-kai kiâⁿ ê sī ánne: Ta̍k lâng kah chhù-piⁿ kóng-ōe tio̍h sêng-si̍t, tī lín ê siâⁿ mn̂g tio̍h kiâⁿ sêng-si̍t kah hô-pêng ê sím-phòaⁿ.
8:17 Sim lāi m̄ thang kè-bô͘ pháiⁿ tāi lâi hāi chhù-piⁿ, m̄ thang ài lāmsám chiùchōa, in-ūi chiahê tāichì lóng sī Góa só͘ oàn-hūn ê. Che sī Siōng-chú kóng ê. "
8:18 Bān-kun ê Siōng-chú ê ōe lîm-kàu góa, kóng,
8:19 " Bān-kun ê Siōng-chú ánne kóng: Sì-.goe̍h ê kìm-chia̍h, gō͘-.goe̍h ê kìm-chia̍h, chhit-.goe̍h ê kìm-chia̍h, cha̍p-.goe̍h ê kìm-chia̍h, tī Iô-tah ke ē chiâⁿ-chò hoaⁿ-hí khoài-lo̍k kah tek-ì ê cheh-kî; só͘-í, lín tio̍h ì-ài sêng-si̍t kah hô-pêng. "
8:20 Bān-kun ê Siōng-chú ánne kóng, " Chiong-lâi ū lia̍t kok ê lâng kah chin chē siâⁿ ê jîn-bîn ē lâi-kàu.
8:21 Tòa chit-ê siâⁿ ê jîn-bîn ē khì-kàu hit-ê siâⁿ, kóng, ' Lán tio̍h kóaⁿ-kín lâi-khì kiû Siōng-chú ê un, lâi-khì chhōe bān-kun ê Siōng-chú; nā-sī góa, góa mā beh khì. '
8:22 Ē ū chin chē jîn-bîn kah kiông-tōa ê kok lâi Ê-lú-sa-lèm chhōe bān-kun ê Siōng-chú, kiû Siōng-chú ê un.
8:23 Bān-kun ê Siōng-chú ánne kóng: Tng hiahê ji̍t, tùi lia̍t kok bān-cho̍k tiong ē ū cha̍p lâng khîⁿ chi̍t-ê Iô-tah lâng ê saⁿ-á-ki, khîⁿ i, kóng, ' Goán beh kah lín chò-hóe khì, in-ūi goán thiaⁿ tio̍h ū Siōng-chú kah lín tông-chāi. '"
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。