出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
28:1 「你tio̍h tùi以色列人ê中間，hō͘你ê阿兄亞倫kah伊hiahê kiáⁿ來你chia，thang做祭司，來服事我，to̍h是亞倫kah亞倫ê kiáⁿ拿答、亞比戶、以利亞撒、以他瑪。
28:2 你tio̍h kā你ê阿兄亞倫做聖ê衫，hō͘伊榮光koh súi。
28:3 Koh tio̍h吩咐所有心有智慧ê，to̍h是我用智慧ê聖神所充滿ê人，kā亞倫做衫，kā伊分別做聖，thang做祭司來服事我。
28:4 In所tio̍h做ê衫，to̍h是捕褂、祭司服、外袍、有花ê內衫、帽、腰帶。In tio̍h kā你ê阿兄亞倫kah伊ê kiáⁿ做聖ê衫，hō͘伊做祭司來服事我。
28:5 In tio̍h用金kah藍色、紫色、朱紅色ê料，以及幼苧來做。
28:6 「In tio̍h用金kah藍色、紫色、朱紅色ê料，以及過紡ê幼苧，用奇巧ê工夫來做祭司服。
28:7 Tio̍h有披肩兩塊，連tī雙pêng hō͘它相連。
28:8 祭司服頂面奇巧ê工夫所織ê帶，tio̍h kah它相siâng ê做法，hō͘它相連做一个，用金kah藍色、紫色、朱紅色ê料，以及過紡ê幼苧來做。
28:9 Tio̍h the̍h兩塊紅瑪瑙，tī頂面刻以色列chiahê kiáⁿ ê名，
28:10 六個名tī chit塊寶石，其他六個名tī hit塊寶石，lóng照in出世ê次序。
28:11 Tio̍h用刻寶石ê手工，親像刻印á，照以色列chiahê kiáⁿ ê名，刻tī chit兩塊寶石，入tī金槽裡。
28:12 Tio̍h kā chit兩塊寶石安置tī祭司服ê披肩頂，為以色列人做記念石。亞倫tio̍h tī兩 个肩胛頭揹in ê名，tī上主ê面前來做記念。
28:13 Tio̍h用金做兩塊槽，
28:14 koh用純金，親像phah索á，來做兩條鍊á，kā chiahê phah成ê鍊á，安置tī hiahê槽裡。」
28:15 捕褂
(出39：8-21)
「你tio̍h用奇巧ê工夫，做一个判決ê捕褂；tio̍h kah祭司服相siâng ê做法：用金kah藍色、紫色、朱紅色ê料，以及過紡ê幼苧來做。
28:16 捕褂tio̍h四方，拗雙重，長一掠，闊一掠。
28:17 你tio̍h kā chiahê寶石入tī它ê頂面，有寶石四chōa：一chōa是紅寶石、黃玉、赤玉，這是第一chōa；
28:18 第二chōa是綠寶石、藍玉、金剛石；
28:19 第三chōa是紫色ê瑪瑙、白瑪瑙、紫色水晶；
28:20 第四chōa是青玉、紅瑪瑙、碧玉。這lóng tio̍h入tī金槽內。
28:21 Chiahê寶石照以色列ê kiáⁿ ê名，總共十二塊，親像刻印á，每塊刻一个名，為tio̍h十二支族來做。
28:22 Tio̍h用純金phah鍊á，親像索á，安置tī捕褂。
28:23 Tī捕褂tio̍h做兩 个金環，kā chit兩 个環安置tī捕褂ê雙頭。
28:24 Tio̍h kā所phah ê hit兩條金鍊á，連tī捕褂雙頭ê兩 个環。
28:25 Kā所phah ê兩條鍊á ê雙頭，連tī兩 个槽，安置tī祭司服披肩ê頭前。
28:26 你tio̍h做兩 个金環，hē tī捕褂雙頭ê墘，近祭司服ǹg內hit-pêng。
28:27 Koh tio̍h做兩 个金環，安置tī 祭司服披肩下面ê頭前，óa近相連ê所在，tī祭司服奇巧ê工夫所織ê帶ê頂面。
28:28 In tio̍h用藍色ê幼帶，kā捕褂ê環kah祭司服ê環縛相連，hō͘它連tī祭司服奇巧ê工夫所織ê帶，hō͘捕褂kah祭司服無離縫。
28:29 「亞倫入去聖所ê時，tio̍h kā判決ê捕褂所刻以色列ê kiáⁿ ê名，帶tī伊ê胸前，tī上主ê面前tiāⁿ-tiāⁿ 做記念。
28:30 你tio̍h kā烏陵kah土明hē tī判決ê捕褂內；亞倫到上主ê面前ê時，hiahê tio̍h tī伊ê胸前。亞倫tio̍h tī上主ê面前tiāⁿ-tiāⁿ kā以色列ê判決掛tī胸前。」
28:31 其他祭司ê聖服
(出39：22-31)
「你tio̍h做祭司服內面ê外袍，kui領是藍色ê。
28:32 袍頂面ê對中tio̍h為tio̍h頭殼留一个領孔，孔ê四箍圍織領緣，親像戰甲ê領孔，免得破裂。
28:33 袍四箍圍ê下腳pô͘，tio̍h用藍色、紫色、朱紅色ê料，做石榴；袍ê四箍圍tī石榴（sia̍h-liû）ê中間tio̍h有金銜鈴。
28:34 一粒金銜鈴，一粒石榴，tī袍四箍圍ê下腳pô͘。
28:35 亞倫服事ê時，tio̍h穿祭司服。伊入去聖所來到上主ê面前，以及出來ê時，我有thang聽tio̍h聲，hō͘伊免死。
28:36 「Tio̍h用純金做一个牌，照刻印ê法度刻tī它ê頂面，ánne寫：『做聖歸上主』。
28:37 Tio̍h用一條藍色ê幼帶，kā它縛tī帽á頂，to̍h是tī帽á ê頭前。
28:38 Chitê牌tio̍h掛tī亞倫ê頭額，hō͘亞倫來擔當以色列人tī一切聖ê禮物所犯ê罪。Chitê牌tio̍h tiāⁿ-tiāⁿ tī伊ê頭額，hō͘ in tī上主ê面前得tio̍h接納。
28:39 「Tio̍h用幼苧織有chōa ê內衫，tio̍h用幼苧布做帽á，koh用繡花ê工夫做腰帶。
28:40 「你tio̍h kā亞倫chiahê kiáⁿ做內衫，做腰帶，做包頭殼ê巾，hō͘ in有榮光koh súi。
28:41 Tio̍h kā你ê阿兄亞倫kah伊ê kiáⁿ穿chiahê物件，koh用油kā in抹，行設立ê禮，kā in分別做聖，hō͘ in做祭司來服事我。
28:42 Tio̍h kā in做幼苧布ê褲來遮（cha̍h）in ê下身，褲tio̍h tùi 腰到大腿。
28:43 亞倫kah伊ê kiáⁿ入去會幕，á是來到壇前beh tī聖所服事ê時，tio̍h穿hiahê物件，免得為in擔當罪來死。這是beh kā亞倫kah伊ê kiáⁿ孫做永遠ê例。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。