撒迦利亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 上主呼召祂ê子民
大利烏二年八月,上主ê話臨到易多ê孫—比利家 ê kiáⁿ—撒迦利亞先知,講:
1:2 「上主bat對lín ê祖先大受氣。
1:3 所以,你tio̍h kā in講,萬軍ê上主ánne講:「Lín tio̍h oa̍t tńg來chhōe我;我mā beh oa̍t tńg來chhōe lín。這是萬軍ê上主講ê。
1:4 M̄-thang學lín ê祖先,以前ê先知bat叫in講,萬軍ê上主ánne講:『Lín tio̍h回頭離開lín ê pháiⁿ路,kah lín ê pháiⁿ所行。』總是,in m̄ àⁿ耳孔來聽,mā m̄聽我ê話。這是上主講ê。
1:5 Lín ê祖先tī tó位?Hiahê先知kámē永遠活leh?
1:6 總是,我ê言語、我ê律例kah我所吩咐我chiahê奴僕—先知ê,kám無到tī lín ê祖先?In就回頭,講:『萬軍ê上主按算beh照咱ê所行、所做施行tī咱,祂已經照ánne款待咱à。』」
1:7 馬ê異象
大利烏二年十一月,to̍h是Se-bat月(註:偤太人受掠後偤太日曆ê第11個月份,相當西曆ê一月或二月)二十四,上主ê話臨到易多ê孫—比利家ê kiáⁿ—撒迦利亞先知,講:
1:8 「我暗時觀看,你看,有一个人騎赤馬khiā tī低地岡拈樹ê中間。Tī伊ê後面koh有赤色、黃色、白色ê馬。」
1:9 我問講:「我ê主ah,這是啥物?」kah我講話ê使者to̍h kā我講:「我ē指示hō͘你知chiahê是啥物。」
1:10 Hitê khiā tī岡拈樹中間ê人應講:「這是上主所差派tī地chiūⁿteh出入ê。」
1:11 Into̍h應hitê khiā tī岡拈樹中ê上主ê使者講:「阮已經tī地chiūⁿteh出入,你看,全地lóng安然平定。」
1:12 就ánne,上主ê使者應講:「萬軍ê上主ah,祢對耶路撒冷kah偤大chiahê城受氣已經七十年,祢無施憐憫tio̍h到tang時?」
1:13 上主to̍h用好話kah安慰ê話,應hitê kah我講話ê使者。
1:14 Kah我講話ê使者對我講:「你tio̍h出聲講,萬軍ê上主ánne講:為tio̍h耶路撒冷kah為tio̍h錫安,我熱心到極。
1:15 我真受氣hiahê安然生活ê列國,因為我以前只有小khóa受氣,in to̍h加添伊ê艱苦。
1:16 所以,上主ánne講:Taⁿ我倒tńg來耶路撒冷,施憐憫,我ê殿ē koh起tī hit中間,繩索會牽tī耶路撒冷ê頂面。這是萬軍ê上主講ê。」
1:17 Hitê天使koh講:「你tio̍h koh出聲講,萬軍ê上主ánne講:我chiahê城ē koh豐盛發達。上主ēkoh安慰錫安,koh揀選耶路撒冷。」
1:18 角ê異象
我gia̍h頭觀看,你看,有四支角。
1:19 我to̍h問kah我講話ê使者講:「Chiahê是啥物?」伊應我講:「Chiahê to̍h是phah散偤大、以色列kah耶路撒冷ê chiahê角。」
1:20 上主koh hō͘我看tio̍h四個師傅。
1:21 我問講:「In來beh做啥物?」伊應講:「Hiahê是phah散偤大ê角,hō͘人m̄敢gia̍h頭;總是,chiahê師傅來是beh hō͘ in驚,phah倒列國ê角,to̍h是bat舉起in ê角來攻擊偤大,hō͘它四散ê。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。