哈該書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 新建聖殿ê榮耀
七月二十一，上主ê話託先知哈該，講：
2:2 你tio̍h kā偤大ê總督—撒拉鐵ê kiáⁿ所羅巴伯，kah約薩答ê kiáⁿ大祭司約書亞，以及所chhun落來ê人民，講：
2:3 「Lín中間iáu存在ê人，有啥人bat看tio̍h chit間殿早前ê榮光？Chit-má lín看了án怎？Kám m̄是tī lín ê目chiu kahná看無啥物價值？」
2:4 上主講：「所羅巴伯，你tio̍h勇敢！約薩答ê kiáⁿ—大祭司約書亞，你mā tio̍h勇敢！」上主koh講：「Chit所在ê人民，lín mā tio̍h勇敢！Mā tio̍h做工，因為我kah lín同在。這是萬軍ê上主講ê。
2:5 當lín出埃及ê時，我kah lín立約ê話。我ê聖神 tiàm tī lín中間，lín m̄免驚。」
2:6 因為萬軍ê上主ánne講：「Koh無gōa久，我beh koh一pái振動天kah地，kah海，kah乾地。
2:7 我beh振動萬國，萬國所欣慕êē來，我to̍h hō͘榮光充滿chit間殿。這是萬軍ê上主講ê。」
2:8 萬軍ê上主講：「銀是我ê，金mā是我ê。
2:9 Chit間殿後來，ê榮光會贏過以前ê榮光。這是萬軍ê上主講ê。Koh tī chitê所在，我beh賞賜平安。這是萬軍ê上主講ê。」
2:10 先知向祭司請教
大利烏王二年九月二十四，上主ê話託先知哈該講：
2:11 萬軍ê上主ánne講：「關係tī律法，你thang問祭司，
2:12 講：設使有人用衫á裾包聖ê肉，chitê衫á裾óa tio̍h餅，á是湯，á是酒，á是油，á是別種食物，chitê物kam2to̍h成做聖？」祭司應講：「無lah。」
2:13 哈該koh講：「設使有人摸tio̍h身屍無清氣，來óa tio̍h chiahê物ê一項，chitê物kám ē成做污穢？」祭司應講：「成做污穢。」
2:14 哈該to̍h應講：「上主講：『Tī我ê面前，chiahê人民是親像ánne，chitê國mā是ánne；in ê手所做ta̍k種ê工mā lóng是ánne；in tī chia所獻ê無清氣。』」
2:15 上帝應允賜福
上主講：「Taⁿ請lín想，chit日以前，聖殿iáu未有石頭疊tī石頭頂ê時。
2:16 經過hiahê時，人來到五穀堆，想beh得tio̍h二十斗，只有十斗。有人來到酒窟，想beh得tio̍h五十甕，只有得tio̍h二十甕。
2:17 Tī lín ê手所做一切ê工，我用枯焦、朽爛kah大雹phah lín，lín iáu koh無歸向我。這是上主講ê。
2:18 請lín tùi今á日起tio̍h用心想，tùi九月二十四建立上主殿ê地基ê時，lín tio̍h ánne思考。
2:19 粟倉kám iáu有種籽？葡萄樹、無花果樹、石榴樹kah橄欖樹lóng bē結果子。Tùi今á日起，我beh賜福hō͘ lín。」
2:20 上主對所羅巴伯ê應允
Hit月二十四，上主ê話第二pái臨到哈該，講：
2:21 「你tio̍h kā偤大ê總督所羅巴伯講：我beh振動天kah地。
2:22 我beh chhia倒列國ê寶座，除滅ta̍k邦國ê勢力，mā beh chhia倒戰車kah坐車ê，馬kah馬兵lóngē倒落去，ta̍k个ē tùi伊ê兄弟ê刀來死。
2:23 萬軍ê上主講：我ê奴僕—撒拉鐵ê kiáⁿ所羅巴伯，當hit日，我beh召你，上主ánne講：而且我beh用你做手指印，因為我bat揀選你。這是萬軍ê上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。