何西阿書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Tio̍h tùi lín ê hiaⁿ-tī kóng " Am "（ Chù, " Tông-pau " ê ì-sù ）, koh tùi lín ê chí-mōe kóng " Lu-ha-má "（ Chù, " Thiàⁿ-sioh " ê ì-sù ）.
2:2 Put-cheng ê Go-mel — Put-tiong ê I-su-la-el
Tio̍h kah lín lāu-bú piān-lūn, koh piān-lūn; in-ūi i m̄-sī Góa ê bó͘, Góa mā m̄-sī i ê tiōng-hu. Kiò i tû-khì bīn-.ni̍h ê îm-loān kah i heng-khám ê îm-hēng,
2:3 Bián-tit Góa kā i thǹg kng-kng, hō͘ i chhin-chhiūⁿ tú-á chhut-sì ê ji̍t, hō͘ i chhin-chhiūⁿ khòng-iá, chhin-chhiūⁿ ta-sò ê tē, hō͘ i tùi chhùi-ta lâi sí.
2:4 Góa bô beh liân-bín i ê kiáⁿ, in-ūi in sī tùi îm-loān lâi seⁿ ê kiáⁿ.
2:5 In-ūi in ê lāu-bú kiâⁿ kan-îm, hoâi-īn ê chò-chhut kiàn-siàu sū, in-ūi i kóng, " Góa beh tòe góa ê lông-kun khì, góa ê piáⁿ, chúi, iûⁿ-mn̂g, môa, iû kah góa só͘ lim ê, lóng sī in hō͘ góa ê. "
2:6 Lí khòaⁿ, in-ūi ánne, Góa beh ēng chhì-á chó͘-tòng i ê lō͘, chò chhiûⁿ lâi hō͘ i chhōe bô i ê lō͘.
2:7 I beh jiok i ê lông-kun, m̄ koh jiok bē tio̍h; i beh chhōe in, chóng-.sī, chhōe bē tio̍h, chiū kóng, " Góa beh tńg-khì chhōe góa pún-lâi ê tiōng-hu, in-ūi góa hit sî ê kéng-hóng pí chitmá khah hó. "
2:8 I m̄-chai i ê ngó͘-kok, chiú kah iû lóng sī Góa hō͘ i ê, ke-thiⁿ i ê gîn kah kim ê mā sī Góa; i ēng chiahê khì ho̍k-sāi Ba-al.
2:9 Só͘-í, kàu siu-koah ê ji̍t, Góa beh kā Góa ê ngó͘-kok tùi in the̍h tò tńg-.lâi, koh tī chhut chiú ê sî, beh kā Góa ê sin chiú the̍h tò tńg-.lâi, mā beh kā Góa hō͘ i thang jia chhiah-theh ê iûⁿ-mn̂g kah môa chhiúⁿ tò tńg-.lâi.
2:10 Taⁿ Góa beh tī i só͘ loân-ài ê lâng ê ba̍k-chiu chêng lō͘-chhut i ê îm-hēng; it-tēng bô lâng ē lâi kiù i thoat-lī Góa ê chhiú.
2:11 Góa beh soah in hiahê iàn-lo̍k, cheh-iân, goe̍h ê chhe-it, An-hioh-ji̍t kah só͘-ū ê cheh-kî.
2:12 Góa mā beh húi-hoāi i ê phû-tô chhiū kah bû-hoa-kó chhiū, to̍h-sī kóng, " Che sī hiahê lông-kun hō͘ góa ê lé-sò͘ ". Góa beh hō͘ hiahê piàn-chò chhiū-nâ, hō͘ iá-siù lâi chia̍h i.
2:13 I chêng-ji̍t sio hiuⁿ ho̍k-sāi chiahê Ba-al, koh ēng hīⁿ-kau kah pa̍t chióng chng-sek-phín kakī táⁿ-pān, tòe i ê lông-kun khì, soah bē kì-tit Góa, in-ūi ánne, Góa beh kā i pān. Che sī Siōng-chú kóng ê.
2:14 Siōng-tè Thiàⁿ I ê Chú-bîn
Lí khòaⁿ, Góa beh kā i chio-ho͘, chhōa i lâi-kàu khòng-iá, ēng ōe kā i an-ùi.
2:15 Góa mā beh tùi hia siúⁿ-sù i phû-tô hn̂g, koh siúⁿ-sù i A-kol （ Chù, " Chai-lān " ê ì-sù ）ê soaⁿ-kok piàn-chò ǹg-bāng ê mn̂g. I ē tī hia ìn-siaⁿ kah siàu-liân ê ji̍t-chí bô koh-iūⁿ, kah tùi Ai-gi̍p tē khí-.lâi ê ji̍t-chí sio-kāng.
2:16 Siōng-chú kóng, " Tng hit ji̍t, lí ē kiû-kiò Góa kóng: Góa ê tiōng-hu bô koh kiû-kiò góa kóng: Góa ê Chú ah;
2:17 In-ūi góa beh tùi in ê chhùi tû-khì chiahê Ba-al ê miâ, bô koh ēng chit-ê miâ kì-liām i.
2:18 " Tng hit ji̍t, Góa beh ūi tio̍h in kah chhân-iá ê cháu-siù, kah khong-tiong ê poe-chiáu, í-ki̍p tē-chiūⁿ ê thâng-thōa li̍p-iok; Góa mā beh tùi chit-ê só͘-chāi at-tn̄g kiong, to kah kau-chiàn, hō͘ in ē-tàng an-jiân tó-teh khùn.
2:19 " Góa beh phèng-tiāⁿ hō͘ lí éng-oán kui tī Góa, jî-chhiáⁿ Góa beh ēng kong-gī, kong-pêⁿ, chû-ài, liân-bín, lâi kā lí phèng-tiāⁿ kui tī Góa;
2:20 Góa mā beh ēng sêng-si̍t kā lí phèng-tiāⁿ kui tī Góa, lí chiū ē bat Siōng-chú.
2:21 " Hit ji̍t, Góa ē ìn-tap, Góa ē ìn-tap thiⁿ, thiⁿ ē ìn-tap tē;
2:22 tē ē ìn-tap ngó͘-kok, chiú, iû, chiahê ē ìn-tap E-chu-le-el.
2:23 Góa beh ūi kakī kā i chai-chèng tī chit-ê tē. Pêng-siông sî bô tit tio̍h liân-bín ê, Góa beh liân-bín i; m̄-sī Góa ê chú-bîn ê, Góa beh tùi i kóng: Lí sī Góa ê chú-bîn, i mā ē kóng: Lí sī góa ê Siōng-tè. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。