但以理書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 看見公綿羊kah公山羊
伯沙撒王坐位第三年，koh有異象出現hō͘我—但以理看tio̍h，to̍h是tī我頭一pái看tio̍h 異象ê以後。
8:2 我看tio̍h異象，看tio̍h ê時是tī以攔省書珊ê宮殿；我看tio̍h異象是tī U-lâi ê河邊。
8:3 我gia̍h頭teh看，你看，有公ê綿羊khiā tī河ê頭前，牠有兩支角，兩支角lóng高。Chit支比hit支khah koân，khah koân ê tòe尾後發。
8:4 我看tio̍h hit隻公ê綿羊ǹg西、ǹg北、ǹg南來觸。無一隻獸有法度tī牠ê面前khiā在，mā無人ē tàng救人脫出牠ê手；牠chhut-chāi kakī ê意思行，kakī 做大。
8:5 我teh想ê時，你看，有一隻公ê山羊tùi西pêng來，牠遍行全地，腳無踏tio̍h地。Chit隻山羊tī牠兩蕊目chiu ê中央，有一支真映目ê角。
8:6 牠去到有兩支角ê公綿羊hia，to̍h是我所看tio̍h khiā tī河ê頭前ê，牠發大受氣，走去chhōe hit隻公綿羊。
8:7 我看tio̍h牠óa近公ê綿羊，ǹg牠發大受氣，觸hit隻綿羊，phah斷牠兩支角。綿羊無力thang khiā tī牠ê面前；牠to̍h hō͘ hit隻公綿羊倒tī地裡，kā牠thún踏，無一个ē tàng救綿羊脫出牠ê手。
8:8 Hit隻山羊kakī 掠做真大。當牠強猛ê時，hit支大支角phah斷，有發四支映目ê角來代替，ǹg天ê四面方向。
8:9 In中間ê一支koh發出一支細支角，成做真大支，ǹg南、ǹg東、ǹg榮耀ê地。
8:10 牠成做koân大，到tī天軍，kā一kóa軍隊kah幾nā个星辰hiat落地裡，koh kā in thún踏。
8:11 而且牠kakī 掠做koân大到tī軍隊ê主宰，除去ta̍k日所獻hō͘祂ê燒祭，koh毀壞祂ê聖所。
8:12 為tio̍h罪過ê緣故，有軍隊kah日日所獻ê燒祭交付牠。牠kā真理hiat tī地裡，chhut-chāi kakī ê意思來行，lóng興通。
8:13 我聽tio̍h有一位聖ê teh講話，koh有一位聖ê對hit位teh講話ê講：「Chitê異象，to̍h是講tio̍h日日所獻ê燒祭kah致使荒廢ê罪惡，以及hō͘聖所kah軍隊受thún踏ê異象，ē到tang時？」
8:14 伊kā我講：「Tio̍h到二千三百暝日，聖所to̍h ē得tio̍h清氣。」
8:15 天使加百列解說異象
我—但以理，我有看tio̍h chitê異象，ài beh明白hitê意思。Hit時，忽然有一位親像人ê款式ê khiā tī我ê面前。
8:16 我koh聽tio̍h U-lâi河雙pêng岸ê中間有人ê聲hoah講：「加百列，tio̍h hō͘ chitê人明白chitê異象。」
8:17 伊to̍h來到我khiā ·leh ê所在。伊一下來到位，我to̍h驚惶，仆tī土腳。伊kā我講：「人子，你tio̍h明白，因為chitê異象是關係末日。」
8:18 伊kah我講話ê時，我ê面仆tī土腳，soah睏重眠；伊to̍h摸我，扶我khiā起來。
8:19 伊講：「你看，我beh hō͘你知受氣ê末日所ē發生ê tāichì，因為chitê是關係tī路尾所定tio̍h ê時。
8:20 「你所看tio̍h ê公ê綿羊，有兩支角ê，to̍h是瑪代kah波斯兩 个王。
8:21 Hit隻長毛ê公ê山羊to̍h是希臘王；伊兩蕊目chiu 中間ê大支角to̍h是頭一个王。
8:22 講tio̍h hit支phah斷ê角，tùi它ê底部koh發出四支角，代表有四國ē tùi伊ê國興起，總是，權力kah伊bē比得。
8:23 「Hiahê國ê末日臨到ê時，人ê罪惡貫滿，就ē有一个王興起，面貌兇惡，gâu用詭詐ê話。
8:24 伊ê權柄成做大，總是，m̄是tùi kakī ê權柄；伊ē行非常ê毀滅，mā ē興通，koh照kakī ê意思來行，koh ē毀滅有權力ê kah聖ê子民。
8:25 伊用計謀hō͘伊詭詐ê手段興通，心內掠kakī 做大。Tī in無提防ê時，伊毀滅真chē人；koh ē起來攻擊萬王ê王。總是，伊ē受毀壞，卻m̄是用人ê手。
8:26 以前所講ê-hng kah早起ê異象是真ê，總是，你tio̍h封密hitê異象，因為它是講tio̍h真chē日後ê tāichì。」
8:27 就ánne，我—但以理昏迷，破病幾nā日，然後起來辦理王ê事務。我因為chitê異象tio̍h驚kah gāng去，無人ē了解其中ê意思。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。