但以理書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 Bel-sia-chal Ông ê Iàn-se̍k
Bel-sia-chal ông siat tōa iàn-se̍k, chhiáⁿ i ê tāi-sîn chi̍t chheng lâng, tī hit chi̍t chheng lâng ê bīn-chêng lim chiú.
5:2 Bel-sia-chal khí-thâu lim chiú ê sî, hoan-hù lâng kā i ê lāu-pē Nep-kat-ne-chal tùi Ê-lú-sa-lèm ê tiān lāi só͘ chhiúⁿ kim-gîn ê khì-kū the̍h-.lâi, hō͘ ông kah i ê tāi-sîn í-ki̍p i ê hō͘-hui thang ēng chiahê khì-kū lim chiú.
5:3 In chiū kā só͘ chhiúⁿ Ê-lú-sa-lèm Siōng-tè ê tiān lāi kim ê khì-kū the̍h-.lâi, ông kah tāi-sîn, hō͘-hui ēng hiahê khì-kū lâi lim.
5:4 In lim chiú, oló in kim, gîn, tâng, thih, chhâ kah chio̍h-thâu ê sîn-bêng.
5:5 Hit sî, hut-jiân lâng ê chhiú-chéng-thâu-á chhut-hiān, tī ông-kiong kah teng-tâi sio-tùi ê hún-piah siá jī, ông khòaⁿ tio̍h siá jī ê chhiú,
5:6 ông ê bīn chiū sit-sek, sim-lāi kiaⁿ-hiâⁿ, io-kut thu̍t-lûn, kha-thâu-u sio kha̍p.
5:7 Ông tōa-siaⁿ bēng-lēng, tiàu hiahê su̍t-sū, Kal-tí-ah lâng, chiam-pok ê lóng ji̍p-.lâi. Ông tùi Ba-bú-lông tì-hūi ê lâng kóng, khòaⁿ siáⁿ lâng ē-hiáu tha̍k chit-ê bûn-jī, kái-bêng hō͘ góa chai, góa beh hō͘ i chhēng chí-sek ê phàu, ām-kún kòa kim-liān, tī kok lāi ê chit ūi pâi tē-saⁿ.
5:8 Tùi hit sî khí, ông só͘-ū ê tì-hūi lâng lóng ji̍p-.lâi; chóng-.sī, in bē hiáu tha̍k hit-ê bûn-jī, mā bē hiáu kái-bêng hō͘ ông chai.
5:9 Bel-sia-chal ông chin kiaⁿ-hiâⁿ, bīn sit-sek, i ê tāi-sîn mā lóng tio̍h-kiaⁿ kah gāng-.khì.
5:10 Ông-hō͘ in-ūi ông kah i ê tāi-sîn só͘ kóng ê ōe, chiū ji̍p-khì pān iàn-se̍k ê chhù, ông-hō͘ kā i kóng, " Goān ông bān-sòe! Lí ê sim m̄ thang kiaⁿ-hiâⁿ, bīn m̄ thang sit-sek.
5:11 Tī lí ê kok lāi ū chi̍t-ê lâng, i ê sim-lāi ū sèng ê Siōng-tè ê sîn-lêng. Lí ê lāu-pē chāi-seⁿ ê ji̍t-chí, khòaⁿ-chhut i ê sim-lāi ū kng-bêng, chhong-bêng kah tì-hūi, chhin-chhiūⁿ chiahê sîn-bêng ê tì-hūi. Lí ê lāu-pē — Nep-kat-ne-chal ông, to̍h-sī ông lí ê lāu-pē, kā i siat-li̍p chò chheⁿ-siōng-ka, su̍t-sū, Kal-tí-ah lâng kah chiam-pok-chiá ê thâu-lâng.
5:12 I ū hó sèng-chêng, ū tì-sek koh chhong-bêng, ē oân-bāng, ē khui-thiah ò-biāu, kái-sek giâu-gî ê tāichì. Chit-ê lâng ê miâ kiò-chò Ta-ni-el, ông koh kā i chheng-chò Bel-ti-sia-chal. Taⁿ lí thang kiò Ta-ni-el lâi, i ē kā lí kái-bêng. "
5:13 Ta-ni-el Kái-soeh Piah-téng ê Jī
In chiū chhōa Ta-ni-el lâi-kàu ông ê bīn-chêng. Ông mn̄g Ta-ni-el kóng, " Lí sī siū lia̍h ê Iô-tah lâng tiong-kan ê Ta-ni-el, to̍h-sī góa ê lāu-pē chò ông ê sî, tùi Iô-tah kā lí lia̍h-.lâi ê, sī-.bô?
5:14 Góa thiaⁿ-kóng lí ê sim-lāi ū hit-ê Siōng-tè ê sîn-lêng, jî-chhiáⁿ lí ū kng-bêng, chhong-bêng kah hó ê tì-hūi.
5:15 Taⁿ hiahê tì-hūi ê lâng kah su̍t-sū í-keng hông chhōe lâi góa ê bīn-chêng, beh hō͘ in tha̍k hiahê bûn-jī lâi kái-bêng hō͘ góa chai, chóng-.sī, in bē hiáu kái-bêng chit-ê tāichì.
5:16 Góa bat thiaⁿ tio̍h lí ê tāichì, lí gâu kái-bêng, ē kái-sek giâu-gî ê tāichì; taⁿ lí nā ē-hiáu tha̍k chit-ê bûn-jī, kái-bêng hō͘ góa chai, góa chiū beh hō͘ lí chhēng chí-sek ê phàu, ām-kún kòa kim-liān, tī kok lāi ê chit ūi pâi tē-saⁿ. "
5:17 Ta-ni-el tī ông ê bīn-chêng ìn kóng, " Lí ê chióng-phín thang kui tī lí pún-sin, lí ê pò-siúⁿ thang kui hō͘ pa̍t lâng; chóng-.sī, góa beh kā ông tha̍k chit-ê bûn-jī, kái-bêng hō͘ ông chai.
5:18 " Ông, chì-koân Siōng-tè bat kā kok-ūi, tōa-koân, êng-iāu kah ui-hong, siúⁿ-sù hō͘ lí ê lāu-pē — Nep-kat-ne-chal;
5:19 In-ūi Siōng-tè só͘ siúⁿ-sù I ê tōa-koân, chiahê jîn-bîn, chiahê kok, chiahê khiuⁿ-kháu ê lâng lóng tī i ê bīn-chêng kiaⁿ kah phi̍h-phi̍h chhoah. I sûi-ì hō͘ lâng sí, sûi-ì hō͘ lâng oa̍h, sûi-ì kā lâng ko-seng, sûi-ì kā lâng kàng kē.
5:20 Chóng-.sī, i ê sim kiau-ngō͘, i ê sèng giám-ngē, tì-sú kiâⁿ-ta̍h kiau-ngō͘, chiū hông lut i ê ông-ūi, chhiúⁿ-toa̍t i ê êng-kng.
5:21 I siū kóaⁿ-chhut lī-khui lâng, i ê sim piàn-chò chhin-chhiūⁿ cháu-siù ê sim; i kah iá-lî chò-hóe tòa, koh chia̍h chháu chhin-chhiūⁿ gû; i ê seng-khu hō͘ thiⁿ ê lō͘-chúi sip-tâm, ti̍t-kàu i chai chì-koân Siōng-tè chiáng-koán lâng ê kok, chiàu I ê ì-sù siat-li̍p lâng lâi tī-lí.
5:22 " Bel-sia-chal, lí sī i ê kiáⁿ, lí sûi-jiân chai che it-chhè, lí ê sim bô kakī khiam-pi,
5:23 kèng-jiân kiau-ngō͘ lâi kong-kek thiⁿ-téng ê Chú. Lí ū chhe lâng tòa I tiān lāi ê khì-kū kàu tī lí ê bīn-chêng, lí kah lí chiahê tāi-sîn í-ki̍p lí ê hō͘-hui lóng ēng i lâi lim chiú. Lí koh oló hiahê gîn, kim, tâng, thih, chhâ kah chio̍h-thâu só͘ chò ê sîn-bêng, to̍h-sī bē khòaⁿ, bē thiaⁿ, bē chai ê; chóng-.sī, koán lí ê chhoán-khùi, tiāⁿ tio̍h lí ê cho-gū ê Siōng-tè, lí khiok bô êng-kng I.
5:24 Chiū ánne, I tùi I ê bīn-chêng chhun-chhut hit ki chhiú lâi siá chit-ê bûn-jī.
5:25 " Só͘-siá ê bûn-jī to̍h-sī: " MENE, MENE, TEKEL, UPARSIN"（ Chù, A-lân bûn,Ì-sù sī"soàn-su̍t, soàn-su̍t, chhìn-thûi, hun-lia̍t". Lēng-gōa ì-sù khó-lêng sī"saⁿ chióng tāng-liōng ê tan-ūi" ）
5:26 ì-sù to̍h-sī ánne: " MENE " to̍h-sī Siōng-tè í-keng sǹg lí ê kok ê nî-ji̍t, koh hō͘ i kiat-sok.
5:27 " TEKEL " to̍h-sī lí tī thian-phêng siū chhìn, hián-bêng lí ê bô kàu-gia̍h.
5:28 " PERES"（ Chù, A-lân bûn " PARSIN " ê tan-sò͘ hêng, chêng-tì ê "U" sī " Kah "ê ì-sù ）Chiū-sī lí ê kok hun-lia̍t, kui hō͘ Ma-tái lâng kah Phel-siah lâng.
5:29 In-ūi ánne, Bel-sia-chal chhut lēng, lâng chiū kā chí-sek phâu hō͘ Ta-ni-el chhēng, ēng kim-liān khòa tī i ê ām-kún, koh thoân-lēng hō͘ i tī kok lāi ê chit ūi pâi tē-saⁿ.
5:30 Tī hit mê, Kal-tí-ah ông — Bel-sia-chal hō͘ lâng thâi-sí.
5:31 Ma-tái lâng Ta-lió-suh tit tio̍h kok-ūi, hit sî i la̍k-cha̍p-jī hòe.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。