以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 不忠ê耶路撒冷
上主ê話koh臨到我，講：
16:2 「人子，你tio̍h hō͘耶路撒冷知她hiahê可惡ê tāichì，
16:3 kā in講，至koân上主對耶路撒冷ánne講：你ê本源kah你ê出世是tī迦南地；亞摩利人是你ê老父，你ê老母是赫人。
16:4 講tio̍h你出世ê景況，當你出世ê日無kā你tńg臍，mā無用水kā你洗hō͘你清氣，lóng無kā你sám鹽，mā無用布kā你包。
16:5 無人看顧你，kā你做chiahê tāichì，mā無人憐憫你；你出世ê日hō͘人hiat tī田野，是因為你hō͘人討厭。
16:6 「我tùi你hia經過，看tio̍h你kō tī你ê血中，to̍h對你講：你雖然tī你ê血中，iáu koh thang活leh。
16:7 我hō͘你長成，親像田裡所發生ê，你koh漸漸成（chiâⁿ）做大人，面貌清秀，奶phòng，頭毛長；總是，你猶原赤身露體。
16:8 「我tùi你hia經過，看tio̍h你；你看，hit時是你興起愛情ê時，我to̍h用衫á裾kā你蓋teh，遮你thǹg光光ê身軀，koh對你chiùchōa，kah你結約，你就屬tī我。這是至koân上主講ê。
16:9 「Hit時，。我用水kā你洗，kā你身軀ê血洗清氣，koh用油kā你抹。
16:10 我hō͘你穿繡花ê衫，mā hō͘你穿海狗皮ê鞋，mā用幼苧布hō͘你縖腰，koh用綢緞做衫hō͘你moa，
16:11 我用打扮ê物kā你打扮；用手環掛tī你ê手，用金鍊á掛tī你ê頷頸。
16:12 我mā用環掛tī你ê鼻；用耳鉤掛tī你ê耳á，用súi ê帽á戴tī你ê頭殼。
16:13 Án-ne，你to̍h有金銀ê打扮，所穿ê是幼苧布kah綢緞，以及繡花ê衫；所食ê是幼幼ê麵、蜂ê蜜kah油。你mā非常súi，發達到王后ê尊貴。
16:14 你súi ê名聲傳到tī列國中，是tùi你ê súi koh完全，因為我有用我ê榮光hō͘你。這是至koân上主講ê。
16:15 「獨獨你óa靠kakī ê súi，koh因為你ê名聲，to̍h行姦淫。你放縱淫慾，hō͘過路人chhut-chāi伊ê意思來行。
16:16 Koh用你ê衫，裝飾（chong-sek）koân ê所在，五色lóng齊備（chê-pī）；tī hit頂面行姦淫。Chit款tāichì bē koh來，mā無koh有。
16:17 你mā取我所hō͘你ê金銀kah súi ê寶器，為tio̍h你kakī 做chapo͘人ê像，kah它行姦淫；
16:18 koh用你繡花ê衫kā它moa，mā用我ê膏油，我ê芳料，排tī它ê面前；
16:19 而且koh kā我所賞賜hō͘你ê食物、幼麵，以及油kah蜜，是我所用來養飼你ê，你to̍h kā伊排tī in ê面前，來做芳味，你實在有ánne做。這是至koân上主講ê。
16:20 「你koh用你ê kiáⁿ兒，to̍h是你所kā我生ê，來獻hō͘ in食。你行chiahê淫亂，kám是小khóa tāichì？
16:21 你竟然kohthâi死我chiahê kiáⁿ來交hō͘它，hō͘ in經過火來歸tī它？
16:22 你行chiahê一切可惡kah淫亂ê tāichì，lóng無想tio̍h你細漢赤身露體，kō tī你血中ê日子。」
16:23 耶路撒冷親像淫婦
（至koân上主講：「你有災禍à！有災禍à！）
16:24 你行這一切pháiⁿ事以後，koh為kakī 起花樓，tī ta̍k條街路起高台。
16:25 你tī所有ê街路口起高台，hō͘你ê súi變做可惡ê，koh kah真chē過路ê人行姦淫。
16:26 你mā kah你ê隔壁國，放縱情慾ê埃及人行姦淫，加添你ê淫亂，惹我受氣。
16:27 「你看，我伸出我ê手攻擊你，減少你需要用ê物件，koh kā你交hō͘怨恨你ê腓利士hiahê chabó͘ gín-á，hō͘ in chhut-chāi意思款待你。In看tio̍h你行pháiⁿ來見笑。
16:28 「你因為好色不知足，koh kah亞述人行姦淫；kah in行姦淫了後，猶原無滿意。
16:29 你koh tī迦南地去到迦勒底行真chē淫亂，iáu koh無滿意。
16:30 至koân上主講：你行這一切ê tāichì，是霸性淫婦ê所行，可見你ê心是gōa軟弱！
16:31 因為你tī所有ê街路口起花樓，tī ta̍k條街路起高台，因為你無親像別个娼妓，無ài錢。
16:32 Wah！你chitê行姦淫ê bó͘，beh ài別人來代替丈夫。
16:33 人是用物件送娼妓，你顛倒用物件送你相好ê人，請in tùi四箍圍來kah你行姦淫。
16:34 你ê行姦淫kah別个 chabó͘人對反，因為m̄是人chhōe你行姦淫，是你用物件送人，m̄是人送你；所以，你kah別个 chabó͘人對反。」
16:35 上帝審判耶路撒冷
「因為ánne，你chitê娼妓，tio̍h聽上主ê話。
16:36 至koân上主ánne講：因為你piàⁿ出你ê污穢，你kah你所相好ê thǹg光光行姦淫，koh因為你所拜一切可惡ê偶像，koh為tio̍h所流你chiahê kiáⁿ ê血，to̍h是你所獻hō͘ in ê；
16:37 你看，因為ánne，我beh聚集你所有相好ê，to̍h是你bat kah伊宴樂ê，kah你一切所疼ê，你一切所怨恨ê，我beh tùi四箍圍聚集來攻擊你，mā beh對in露出你ê thǹgpaktheh，hō͘ in看你ê thǹgpaktheh。
16:38 我mā beh審判你，親像審判行姦淫kahthâi人ê chabó͘人。我beh用大受氣、嫉妒hō͘你流血。
16:39 我koh beh kā你交tī in ê手，in ē拆毀你ê花樓，毀壞你ê城堡，thǹg你ê衫，搶你súi ê寶器，kā你留tī hia赤身露體。
16:40 「In mā ēchhōa真chē人起來攻擊你，用石頭kā你tìm死，用刀劍鑿透你，
16:41 用火燒你ê厝宅，tī真chē chabó͘人ê面前審判你；我一定hō͘你無koh行姦淫，mā無koh送人物件。
16:42 Án-ne，我對你ê大受氣to̍h ēsoah去，我ê嫉妒mā ē離開你，我beh安靜無koh受氣。
16:43 因為你bē記得你細漢ê日子，tī這一切ê tāichì來激我，所以我beh照你所行ê，報應tī你ê頭殼頂，hō͘你無koh行姦淫，加添tī你一切可惡ê tāichì。這是至koân上主講ê。」
16:44 有hit款ê老母to̍h有hit款ê Cha-bó͘ kiáⁿ
上主講：「你看，見若講俗語ê，ē用俗語kā你供（keng）體，講：『有hit款ê老母to̍h有hit款ê chabó͘ kiáⁿ。』
16:45 你真正是lín老母ê chabó͘ kiáⁿ，討厭她ê丈夫kah kiáⁿ兒；你真正是lín姊妹ê姊妹，討厭in ê丈夫kah kiáⁿ兒。Lín老母是赫人，lín老父是亞摩利人。
16:46 「你ê大姊是撒馬利亞，她kah她ê眾chabó͘ kiáⁿ tiàm tī你ê倒pêng；你ê小妹是所多瑪，她kah她ê眾chabó͘ kiáⁿ tiàm tī你ê正pêng。
16:47 你無學in ê所行，mā無照in可惡ê tāichì去做，你掠做小khóa tāichì，你所行ê一切比in khah臭名聲。
16:48 「至koân上主講：我kí我ê永遠活命來chiùchōa，你ê小妹所多瑪kah她眾chabó͘ kiáⁿ，無行你kah你眾chabó͘ kiáⁿ所行ê tāichì。
16:49 你看，你ê小妹所多瑪ê罪是chit款：她kah她ê眾chabó͘ kiáⁿ心志驕傲，米糧飽足，享受khùiⁿ活，lóng無扶助困苦kah sànchhiah人ê手。
16:50 In驕傲，tī我ê面前行可惡ê tāichì，我看了to̍h kā in除去。
16:51 「撒馬利亞所犯ê罪無你ê一半，你加添可惡ê tāichì比in khah chē，koh tùi你所行一切可惡ê tāichì，hō͘你ê姊妹顯明是義。
16:52 你既然斷定你ê姊妹做義，to̍h tio̍h擔當你kakī ê凌辱；因為你所犯ê罪比in khah可惡，in to̍h比你khah有義；你已經hō͘你ê姊妹顯明是義，你to̍h tio̍h見笑，擔當kakī ê凌辱。」
16:53 所多瑪kah撒馬利亞會復興
上主對耶路撒冷講：「我beh hō͘ in受掠ê倒tńg來，to̍h是hō͘所多瑪kah她ê眾chabó͘ kiáⁿ受掠ê，撒馬利亞kah她ê眾chabó͘ kiáⁿ受掠ê，以及in中間受掠ê，lóngē倒tńg來，
16:54 thang hō͘你擔當kakī ê凌辱，koh tùi你一切ê所行hō͘ in得tio̍h安慰ê，來見笑。
16:55 你ê姊妹所多瑪kah她ê眾chabó͘ kiáⁿ會tńg來原位；撒馬利亞kah她ê眾chabó͘ kiáⁿ會tńg來原位；你kah你ê眾chabó͘ kiáⁿ mā ētńg來原位。
16:56 當你驕傲ê日，你ê嘴無講起你ê小妹所多瑪。
16:57 Hit時，你ê pháiⁿ iáu未發現，亞南chiahê chabó͘ kiáⁿ連她四箍圍ê人iáu未凌辱你；腓利士chiahê chabó͘ kiáⁿ平時tī四箍圍藐視你ê，她mā無凌辱你。
16:58 上主講：你好（hò͘ⁿ）淫亂kah可惡ê tāichì，你已經擔當à。」
16:59 永遠ê約
「因為至koân上主ánne講：你背約koh看輕chiùchōa，我beh照你所行ê來款待你。
16:60 總是，我beh追念我tī你少年ê時kah你所立ê約，mā beh kah你設立永遠ê約。
16:61 當你接納你ê姊妹，to̍h是你ê大姊kah你ê小妹ê時，你ē記得你所行ê來見笑；我mā beh kā in hō͘你做chabó͘ kiáⁿ，獨獨m̄是對你ê約。
16:62 我beh kah你設立我ê約，（你to̍h ē知我是上主），
16:63 到我赦免你一切所做ê時，你ē記得就見笑，koh因為你ê凌辱，to̍h無koh開嘴。這是至koân上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。