出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 對待奴隸ê規定
(申15：12-18)
「你tī人民ê面前所tio̍h設立ê法度是ánne：
21:2 你若買希伯來人做奴僕，伊tio̍h服事你六年，第七年伊to̍hē tàng自由離開。
21:3 伊若是單身來，就單身離開；伊若是有bó͘，伊ê bó͘ to̍h kah伊做伙離開。
21:4 伊ê主人若kā伊娶bó͘，bó͘ kā伊生kiáⁿ á是chabó͘ kiáⁿ，bó͘ kah kiáⁿ兒tio̍h歸主人，伊tio̍h單身離開。
21:5 設使奴僕明明講：『我疼我ê主人、我ê bó͘ kah我ê kiáⁿ兒，無ài出去自由。』
21:6 伊ê主人to̍h tio̍h chhōa伊到敬拜上帝ê所在，koh tio̍h chhōa伊óa近門á是門框，主人tio̍h用鑽á鑽伊ê耳á，伊to̍h永遠服事chitê主人。
21:7 「人若賣chabó͘ kiáⁿ hō͘人做女婢，她bē tàng親像奴僕ánne離開。
21:8 主人若定tio̍h收伊做bó͘，後來，若看無kah意，to̍h tio̍h准她贖身；主人已經騙她，to̍h無權thang kā她賣hō͘外邦人。
21:9 主人若kā她定tio̍h hō͘ kakī ê kiáⁿ，to̍h tio̍h親像kakī ê chabó͘ kiáⁿ kā她款待。
21:10 若有koh娶一个bó͘，她ê食、穿kah配合ê tāichì，猶原m̄ thang減少。
21:11 伊若無對第一个bó͘盡chit三項義務，她to̍h thang自由離開去，免用錢來贖。
21:12 刑罰暴力ê條例
Phah死人ê一定tio̍h hō͘伊死。
21:13 人若m̄是故意thâi人，是上帝交tī伊手中ê，我to̍h kā伊設一个所在，伊thang走去hia。
21:14 人若用詭詐ê計謀thâi伊ê厝邊，to̍h是講來tī我ê壇前，mā tio̍h掠去kā伊thâi死。
21:15 「Phah老父á是老母ê，一定tio̍h hō͘伊死。
21:16 「拐人去賣ê á是iáu tī伊ê手中ê，一定tio̍h hō͘伊死。
21:17 「咒詛老父á是老母ê，一定tio̍h hō͘伊死。
21:18 「人若冤家，chitê用石頭á是拳頭母phah hitê，iáu無致到死，不過是倒tī眠床，
21:19 若ē koh起來，óa靠柺á出去，hitê kā伊phah ê，thang算做是無罪；獨獨tio̍h賠伊bē做工ê錢，mā tio̍h kā伊醫到完全好。
21:20 人若用槌á phah伊ê奴僕á是女婢，致到隨時死，伊一定tio̍h受刑罰。
21:21 若過一兩日chiah死，to̍h thang免受刑罰，因為是用伊ê錢買ê。
21:22 「人若相phah，傷害有娠（sin）孕ê chabó͘人，致使ka-la̍uh娠，後來，無別項ê傷害，hitê人tio̍h罰錢，照chabó͘人ê丈夫所定ê，tī官府ê面前hō͘伊。
21:23 若有別項ê傷害，to̍h tio̍h用命賠命。
21:24 目chiu 賠目chiu ，嘴齒賠嘴齒，手賠手，
21:25 腳賠腳，燒賠燒，傷賠傷，phah賠phah。
21:26 「人若phah-pháiⁿ伊ê奴僕á是女婢一蕊目chiu ，to̍h tio̍h因為in ê目chiu 放in去自由。
21:27 若phah-lak伊ê奴僕á是女婢一支嘴齒，to̍h tio̍h因為in ê嘴齒放in去自由。
21:28 物件主人ê責任
「牛若觸死一个chapo͘人á是一个chabó͘人，tio̍h用石頭tìm死hit隻牛，總是，m̄ thang食牠ê肉；牛ê主人算無罪。
21:29 設使hit隻牛平時會觸人，有人報伊ê主人知，伊竟然無kā牛關起來，致使觸死chapo͘人á是chabó͘人，to̍h tio̍h用石頭kā hit隻牛tìm死，牛ê主人mā tio̍h死。
21:30 若是擬定用錢贖性命，to̍h tio̍h照所擬定ê來贖伊ê性命。
21:31 牛無論觸tio̍h人ê kiáⁿ á是chabó͘ kiáⁿ，tio̍h照chitê例來辦。
21:32 牛若觸tio̍h奴僕á是女婢，tio̍h用銀三十舍客勒hō͘ in ê主人，mā tio̍h用石頭kā牛tìm死。
21:33 「人若掀開井á是掘井無蓋kòa，有牛á是驢跋落去hit內面，
21:34 井ê主人tio̍h賠，mā tio̍h the̍h錢hō͘牠ê主人，死ê chengseⁿ歸伊kakī 。
21:35 「Chitê人ê牛若觸tio̍h hitê人ê牛致到死，in tio̍h去賣活ê hit隻牛，價錢平分，死ê牛mā tio̍h平分。
21:36 人若知chit隻牛平時會觸人，主人竟然無kā牛關teh，伊to̍htioh8用牛賠牛，死ê牛歸伊kakī 。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。