以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 上主責備拜偶像
有幾nā个以色列ê長老來我chia，坐tī我ê面前。
14:2 上主ê話就臨到我，講：
14:3 「人子，chiahê人已經kā in ê偶像接納tī in ê心，koh hēē致使犯罪ê阻礙tī kakī ê面前。我kám ē hō͘伊問啥物？
14:4 「所以，你tio̍h對in講：『至koân上主ánne講：以色列ê子民中間，見若接納伊ê偶像tī伊ê心內ê人，koh hēē致使犯罪阻礙tī伊kakī ê面前，koh來見先知ê，我—上主tī伊所求ê tāichì，beh照伊ê chē-chē偶像來應答伊，
14:5 致使我thang hō͘以色列ê子民心內kakī 責備，因為in lóng為tio̍h in ê偶像來kah我疏遠。』
14:6 「所以，你tio̍h kā以色列ê子民講：至koân上主ánne講：『Tio̍h回頭，oa̍t tńg來離開lín ê偶像，oa̍t-tńg面，m̄ thang遵thàn lín一切可惡ê tāichì。』
14:7 因為以色列ê子民á是tī以色列中寄腳ê出外人，見若kah我隔斷，接納伊ê偶像tī伊ê心內，koh hēē致使犯罪ê阻礙tī伊kakī ê面前，koh來見先知，想beh為kakī ê tāichì來問我ê，我—上主beh親身kā伊應答。
14:8 我beh對hit款人變面，hō͘伊做人ê鑑戒，hō͘人做話柄，hō͘人tio̍h驚kah gāng去，我mā beh tùi我ê子民中kā伊剪除。Lin2to̍h ē知我是上主。
14:9 「先知若迷惑來講一句話，to̍h是我—上主迷惑hitê先知；我mā beh伸手kā伊攻擊，kā伊tùi我ê以色列子民中除滅。
14:10 In會擔當kakī ê罪過。先知ê罪過kah來求問伊ê人ê罪過lóng是仝款，
14:11 thang hō͘以色列ê子民無koh行迷路離開我，無koh因為ta̍k種ê罪過kā kakī òe lahsap。總是，in ē做我ê子民，我beh做in ê上帝。這是至koân上主講ê。」
14:12 挪亞、但以理、約伯
上主ê話臨到我，講：
14:13 「人子，若有國tùi in ê悖逆來得罪我，我mā beh伸手kā它攻擊，斷絕它所óa靠ê米糧，hō͘飢荒臨到tī它，tùi in中間剪除人kah chengseⁿ；
14:14 其中雖然有挪亞、但以理、約伯chit三个人，in只有ē因為in ê義來救kakī ê性命niā-niā。這是至koân上主講ê。
14:15 「我若hō͘惡獸經過hitê地來kā它損壞，hō͘ hit所在荒廢，因為chiahê獸ê緣故，致使無人tùi hia經過；
14:16 雖然有chit三个人tī in中間，至koân上主講：我kí我ê永遠活命來chiùchōa，in bē tàng救in ê kiáⁿ兒，只有in本身得tio̍h救niā-niā，地方猶原荒廢。
14:17 「Á是我hō͘刀劍臨到hitê所在，講：刀劍，你tio̍h經過hitê所在，致使我tùi in中間剪除人kah chengseⁿ；
14:18 雖然有chit三个人tī in中間，至koân上主講：我kí我ê永遠活命來chiùchōa，in bē tàng救in ê kiáⁿ兒，只有in本身得tio̍h救niā-niā。
14:19 「Á是我hō͘瘟疫流行tī hitê所在，hō͘我piàⁿ出消滅性命ê大受氣tī in ê頂面，thang tùi in中間剪除人kah chengseⁿ；
14:20 雖然有挪亞、但以理、約伯tī in中間，至koân上主講：我指我ê永遠活命來chiùchōa，in bē tàng救in ê kiáⁿ兒，只有ē因為in ê義來救kakī ê性命niā-niā。」
14:21 至koân上主ánne講：「何況我kā我四項ê大災禍，to̍h是刀劍、飢荒、惡獸、瘟疫，降落tī耶路撒冷，tùi hit中間剪除人kah chengseⁿ，kám m̄是koh khah bē tàng救得？
14:22 你看，ē有所chhun落來ê人留teh，to̍h是受掠出來ê kiáⁿ兒；你看，inē出來到lín chia，lín會看tio̍h in ê所行、所做，講tio̍h我所降落tī耶路撒冷ê災禍，to̍h是我一切降落tī in頂面ê，lín to̍h ē得tio̍h安慰。
14:23 Lín看tio̍h in ê所行、所做，to̍h ē受安慰，to̍h ē知我tī耶路撒冷所行ê m̄是無緣無故。」這是至koân上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。