耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
52:1 耶路撒冷ê陷落
西底家坐位ê時，伊二十一歲，tī耶路撒冷做王十一年。伊ê老母ê名叫做Ha-mu-tal，是立拿人耶利米ê chabó͘ kiáⁿ。
52:2 伊行上主所看做pháiⁿ ê tāichì，照約雅敬所行ê一切。
52:3 耶路撒冷kah偤大tú tio̍h chiahê tāichì，是因為上主發出受氣，beh tùi祂ê面前kā in趕出去；hit時，西底家背叛巴比倫王。
52:4 當西底家坐位第九年十月初十，巴比倫王尼布甲尼撒chhōa伊ê軍隊來攻擊耶路撒冷，tī城ê對面紮營，koh tī四箍圍做土堆來攻擊城。
52:5 就ánne，城受圍困，一直到西底家十一年。
52:6 四月初九，城內飢荒真傷重，致使hit所在ê人民lóng無米糧。
52:7 城受攻破，所有ê兵á透暝tùi óa近王ê園，兩 个城牆中ê門hit條路逃走出城。迦勒底人tútú tī四箍圍teh攻擊城，in to̍htui3亞拉巴ê路逃走。
52:8 迦勒底ê軍兵去jiok王，tī耶利哥城ê平原jiok tio̍h西底家。伊ê軍隊lóng離開伊四散去。
52:9 In掠tio̍h王，kā伊掠到哈馬地ê利比拉—巴比倫王hia；巴比倫王to̍h kā伊審判。
52:10 巴比倫王tī西底家ê目chiu 前，thâi死伊hiahê kiáⁿ，koh tī利比拉thâi死偤大所有ê貴族。
52:11 Koh搤（iah）西底家ê兩蕊目chiu ，巴比倫王用鐵鏈kā伊鏈起來，押去到巴比倫，kā伊關tī監裡，一直到伊死ê日。
52:12 聖殿毀滅
(王下25：8-17)
巴比倫王尼布甲尼撒王十九年五月初十，跟tòe巴比倫王ê侍衛長尼布撒拉旦攻入耶路撒冷，
52:13 用火燒上主ê殿kah王宮，koh用火燒耶路撒冷所有ê厝，to̍h是富貴家ê厝。
52:14 跟tòe侍衛長迦勒底ê軍隊to̍h拆毀耶路撒冷四箍圍ê城牆。
52:15 Hit時，侍衛長尼布撒拉旦kā民間sànchhiah ·ê kah留tī城內所chhun落來 ê人民，kah hiahê投降巴比倫王ê，以及群眾中所chhun落來ê，lóng掠去。
52:16 獨獨侍衛長尼布撒拉旦留hitê所在siōng sànchhiah ·ê，hō͘ in管理葡萄園kah種作。
52:17 上主殿內ê銅柱kah盆座，以及銅海，迦勒底人lóng kā它phah破，kā hiahê銅lóng運到巴比倫。
52:18 Koh帶去鼎、托á、剪刀、盤、碗kah所有ê銅器。
52:19 Koh kā杯、火爐、盤、鼎、燈台、碗kah甌，以及所有金器ê金、銀器ê銀，侍衛長lóng帶去。
52:20 Koh帶所羅門為上主ê殿所創ê兩支柱，一个銅海kah座下ê十二隻銅牛，chiahê器具ê銅重kah bē tàng秤（chhìn）它ê輕重。
52:21 一支柱高十八肘，圓環十二肘，厚四指，中央空殼。
52:22 柱ê頂面有銅ê柱斗，高五肘；柱斗ê四箍圍有網á kah石榴，lóng是銅做ê。第二支柱仝款，mā有石榴。
52:23 四面有九十六粒ê石榴，tī網á ê四箍圍總共有一百粒石榴。
52:24 偤大人民Hông掠去巴比倫
（王下25:18-21, 27-30）
侍衛長掠大祭司西萊雅kah第二級ê祭司西番亞kah三个顧門ê，
52:25 koh tùi城內掠一个管兵á ê官長，kah tī城內所tú tio̍h tiāⁿ-tiāⁿ 見王ê面ê七个人，kah軍長ê書記，點算人民ê，以及城中所tú ·tio̍h ê人民六十人。
52:26 侍衛長尼布撒拉旦kā chiahê人掠到利比拉，去見巴比倫王。
52:27 巴比倫王kā in phah，tī哈馬地ê利比拉kā inthâi死。Án-ne，偤大人受掠，離開本地。
52:28 尼布甲尼撒所掠ê人數，記tī下底：Tī第七年掠偤大人三千khòng二十三人。
52:29 尼布甲尼撒十八年，tùi耶路撒冷掠去八百三十二人。
52:30 尼布甲尼撒二十三年，侍衛長尼布撒拉旦掠去偤大人七百四十五名；總共有四千六百人。
52:31 偤大王約雅斤受掠了後，第三十七年，巴比倫王E-bil-me-lo-tak元年十二月二五，舉起偤大王約雅斤，放伊出監，
52:32 mā用好話kā伊安慰，hō͘伊ê位khah koân其他chiahê王ê位，to̍h是kah in仝受掠tī巴比倫ê。
52:33 伊thǹg去監內所穿ê衫，一世人kah巴比倫王做伙食。
52:34 巴比倫王賞賜伊所需要ê食物，日日hō͘伊一份；kui世人是ánne，一直到伊死ê日。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。