耶利米書 線上收聽:中文和合本 現代中文譯本修訂版 台語聖經 客語 福州話 希伯來文讀經 下載檔案 關於語音聖經
51:1 Koh再審判巴比倫
上主ánne講：「你看，我beh起毀滅ê風，來攻擊巴比倫kah tòa tī hia ê迦勒底人。
51:2 我beh差外邦人來到巴比倫來kā in簸（pòa），hō͘ in ê地變空虛。Tī in tú tio̍h患難ê日，in ētùi四箍圍來kā伊攻擊。
51:3 開弓ê tio̍h ǹg開弓ê來開弓，ǹg穿戰甲挺身ê來開弓。M̄-thang惜in ê少年人，tio̍h全部滅掉in ê軍隊。
51:4 受thâiêē倒tī迦勒底人ê地，受刺êē倒tī街路。
51:5 雖然以色列kah偤大in ê所在滿滿得罪以色列ê聖ê，in iáu koh無hō͘萬軍ê上主—伊ê上帝kā in棄sak。
51:6 Lín tio̍h tùi巴比倫中走出來，ta̍k人救kakī ê性命！M̄-thang tī in ê罪中來滅亡；因為這是上主報仇ê期，祂beh hō͘ in tú tio̍h應該受ê報應。
51:7 巴比倫平時是上主手內ê金杯，hō͘全地ê人醉；列邦bat lim她ê酒，所以列邦起狂。
51:8 巴比倫忽然受chhia倒、毀壞；tio̍h為她啼哭，the̍h乳香來止她ê痛疼，kiámchhái iáu會醫得。
51:9 咱想beh醫治巴比倫，m̄ koh她無得tio̍h。咱tio̍h離開她，ta̍k人tńg去本國；因為她ê罪案抵天，透到穹蒼。」
51:10 上帝ê子民ē講：「上主已經顯明咱ê公義。來，咱thang tī錫安報揚咱ê上帝—上主ê所做。
51:11 上主定tio̍h意思beh攻擊巴比倫，來kā她毀滅。所以，激動瑪代君王ê心，講：「Lín tio̍h磨光lín ê箭，giâ-tiâu lín ê藤牌。因為這是上主ê報仇，to̍h是祂為tio̍h祂ê殿來報仇。
51:12 Koh 講：Tio̍h khiā大旗來攻擊巴比倫ê城牆！Tio̍h堅固瞭望ê台！Tio̍h派守望ê人！Tio̍h設埋伏！因為上主所講關係tòa tī巴比倫ê人民，祂有ánne計畫，mā有kā它成。
51:13 Tòa tī大海頂面teh大發財ê人，你ê終局到à！貪心ê量已經滿à！
51:14 萬軍ê上主kí kakī chiùchōa講：「我beh hō͘人充滿lín中間，親像草蜢hiah chē，in ē喝喊（hoah-hiàm）來攻擊你。」
51:15 O-ló上主ê詩歌
上主用大權能創造地；用智慧建立世界，用聰明展開chiahê天。
51:16 祂一下出聲，空中to̍h有真chē水激動；祂hō͘雲霧tùi地極chhèng起來。祂為tio̍h落雨，創造sihnà，祂hō͘風tùi祂ê金庫出來。
51:17 Ta̍k人lóng愚蠢無智識。Ta̍k個銀匠lóng為tio̍h伊所雕刻ê偶像來見笑；因為伊所鑄ê偶像是假ê，mā無活氣tī hit內面，
51:18 lóng是空空ê，是迷惑人ê所做，到辦理in ê時，in一定ē受除滅。
51:19 雅各ê上帝無親像chiahê，因為祂是創造萬物ê主；以色列mā是祂產業ê支族。萬軍ê耶和華是祂ê名。
51:20 上主ê鐵鎚
祢是我ê斧頭，交戰ê ke-si；我beh用祢來phah碎列邦，用你來毀滅列國；
51:21 用祢來phah碎馬kah騎馬ê；用祢來phah碎戰車kah坐tī hit頂面ê人；
51:22 用祢來phah碎chapo͘人kah chabó͘人；用祢來phah碎老人kah gín-á；
51:23 用祢來phah碎少年人kah在室女；用祢來phah碎牧者kah伊ê羊群；用祢來phah碎作田人kah伊ê一對牛；用祢來phah碎總督kah官員。
51:24 懲罰巴比倫
上主講：「早前tòa tī巴比倫kah迦勒底ê人民，tī錫安所行一切ê pháiⁿ，我beh kā in報應，hō͘ lín親目看tio̍h。」
51:25 你chitê行毀滅ê山，你看，我kah你做對敵，你毀滅全地。我beh伸我ê手tī你ê頂面，tùi山巖kā你chhia落去，hō͘你成做燒毀ê山。
51:26 人一定無tùi你hia取一塊石來做厝角，mā無取一塊石來做地基；你ē永遠拋荒。這是上主講ê。
51:27 Tio̍h tī境內khiā大旗，tī ta̍k國中pûn哨角，thiau-tî準備列國來kā她攻擊，招集亞拉臘、Me-nî、A-si-ke-nah chiahê國來攻擊巴比倫，koh派軍長來kā她攻擊，hō͘馬兵起來親像粗毛ê草蜢。
51:28 Thiau-tî準備列國kah瑪代ê列王、伊ê總督、伊ê官員kah伊所管全地ê人，來kā她攻擊。
51:29 地搖動koh悽慘；因為上主攻擊巴比倫ê旨意已經定tio̍h，祂ēhō͘巴比倫ê地拋荒，無人tòa。
51:30 巴比倫ê勇士無ài交戰，tòa tī營房內。伊ê氣力已經無去，成做親像chabó͘人。In ê厝宅受燒，in ê門閂hông phah斷。
51:31 走文書ê走去tú tio̍h走文書ê，報消息ê去tú tio̍h報消息ê，報告hō͘巴比倫王知，伊ê城四面hō͘人征服去à，
51:32 路頭hō͘人佔去，蘆竹受火燒，交戰ê人mā lóng驚惶。
51:33 萬軍ê上主—以色列ê上帝ánne講：巴比倫親像稻埕，已經hō͘人踏kah平平，koh無gōa久，收成ê時to̍h beh到。
51:34 巴比倫王—尼布甲尼撒吞食我，teh碎我，hō͘我成做空空ê器具。伊親像大魚吞我，用我ê寶物充滿伊ê腹肚，koh kā我吐出來。
51:35 Tòa tī錫安ê人民ē講：巴比倫用暴虐款待我kah我ê身軀，願chitê罪歸tī伊。耶路撒冷人ē講：願流阮ê血ê罪歸hō͘ tòa tī迦勒底ê人民。
51:36 上主beh幫贊以色列
所以，上主ánne講：「你看，我beh替你申冤，mā beh替你報仇；我beh hō͘巴比倫ê海乾去，hō͘她ê水泉無水。
51:37 巴比倫會成做土堆，做野狗tòa ê所在，做thang tio̍h驚kah gāng去，thang恥笑ê，mā無人tī hia tòa。
51:38 Inē親像勇猛ê獅hm̄-hm̄哮，親像細隻獅teh哮叫。
51:39 當in熱 ·人ê時，我beh為in辦酒桌，hō͘她酒醉，hō͘她快樂，hō͘她久長teh睏，永遠無精神。這是上主講ê。
51:40 我beh chhōa in落去，親像teh chhōa羊á，親像chhōa公ê綿羊kah公ê山羊，去到受thâiê地。」
51:41 巴比倫ê命運
「Si-siak ná ē受攻破？天下所oló ê ná ē受霸佔？巴比倫tī列國中ná ē變做拋荒？
51:42 海水漲起來，淹過巴比倫；她hō͘真chē湧蓋密。
51:43 她ê城變做拋荒、乾燥ê地、沙漠，無人tòa，無人經過ê所在。
51:44 我beh tī巴比倫刑罰Be-l，我beh挖出她ê嘴所吞落去ê。萬民無koh歸óa她；巴比倫ê城牆mā倒壞。
51:45 我ê人民，lín tio̍h tùi她ê中間出去！Ta̍k人tio̍h救kakī ，閃避上主ê大受氣。
51:46 Lín ê心m̄ thang失膽，mā m̄ thang因為境內所聽tio̍h ê風聲來驚惶；因為今年有風聲傳來，暗時mā有風聲；境內有強暴ê tāichì，官長攻擊官長。
51:47 你看，日子teh beh到，我beh辦巴比倫所雕刻ê偶像。Hō͘ in全地見笑；伊hiahê受thâiê人ē倒tī in中間。
51:48 Hit時，天地kah其中所有êē因為巴比倫失敗來歡喜，因為行毀滅êē tùi北方來到她hia。這是上主講ê。
51:49 巴比倫án怎hō͘以色列受thâiê人倒落去，親像ánne，她全地受thâiê人mā ētī巴比倫倒落去。」
51:50 Hō͘ tī巴比倫ê以色列人ê信息
上主講：「閃避刀劍ê tio̍h緊走，m̄ thang khiā ·leh！Tio̍h tī遠遠ê所在記念上主，心內追想耶路撒冷。
51:51 阮因為聽tio̍h chhoh罵來漏氣，滿面見笑，因為異邦人入去上主ê殿hiahê聖ê所在。
51:52 所以，上主講：你看，日子teh beh到，我beh辦巴比倫雕刻ê偶像，全國受傷ê人ē哀聲吐氣。
51:53 巴比倫雖然上到天，雖然hō͘她堅固koân ê所在koh khah堅固，iáu koh有行毀滅ê beh tùi我chia到她hia。這是上主講ê。
51:54 巴比倫ê滅亡
上主講：Tùi巴比倫有哀哭ê聲，tùi迦勒底人ê地有大毀滅ê聲。
51:55 因為上主毀滅巴比倫，hō͘ in中間ê大聲soah去，in ê湧hōa-hōa哮，親像大海，伊響ê聲mā發出來。
51:56 因為毀滅ê來攻擊巴比倫。伊ê勇士受掠，in ê弓tú tio̍h at斷；因為上主是行報應ê上帝，祂絕對會報仇。
51:57 君王—名做萬軍ê上主ê，講：我beh hō͘伊ê貴族、星象家、總督kah官員，以及勇士lóng酒醉，永遠teh睏，bē精神。
51:58 萬軍ê上主ánne講：巴比倫闊大ê城牆會全部倒壞；她koân大ê城門ē hō͘火燒燒去。眾人所勞苦ê會歸tī空空；列國所勞苦ê歸tī火，in lóng ē厭倦。
51:59 耶利米ê信息傳到巴比倫
偤大王西底家坐位ê第四年tńg去巴比倫ê時，瑪西雅ê孫—尼利亞ê kiáⁿ西萊雅kah王做伙去。
51:60 (西萊雅是王ê宮內侍候)耶利米先知有話吩咐伊。耶利米kā所有beh臨到巴比倫ê災禍，to̍h是講tio̍h巴比倫所寫一切ê話，記tī冊裡。
51:61 耶利米對西萊雅講：「你到巴比倫ê時，iáu緊tio̍h讀chit本冊裡ê話；
51:62 koh tio̍h講：『上主ah，祢講tio̍h chit所在bat講beh kā她消滅，甚至無人tòa，連chengseⁿ mā無，一定永遠拋荒。』
51:63 你chit本冊讀了，to̍h tio̍h kā它縛tī一粒石頭，hiat落去幼發拉底河中，
51:64 講：『巴比倫為tio̍h上主所beh降hō͘她ê災禍一定ē親像ánne沉落去，bē koh起來；in lóng ē厭倦。』」耶利米ê話到chia為止。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。