耶利米書 線上收聽:中文和合本 現代中文譯本修訂版 台語聖經 客語 福州話 希伯來文讀經 下載檔案 關於語音聖經
50:1 巴比倫受佔領
上主託耶利米先知論巴比倫，論迦勒底人ê地，所講ê話：
50:2 「Lín tio̍h tī列邦中傳播hō͘ in聽tio̍h，tio̍h khiā大旗；tio̍h hō͘ in聽tio̍h，公開講：巴比倫受攻破，Be-l見笑，Me-lo-tak phah-pháiⁿ，伊ê佛 lóng見笑，伊ê偶像lóng phah-pháiⁿ。
50:3 「因為有一國tùi北方起來攻擊伊，beh hō͘伊ê地拋荒，無人tòa，人kah chengseⁿ lóng走去。」
50:4 以色列人Tńg去本國
上主講：「Hit日hit時，以色列人ē來，inē kah偤大人做伙來，in ē行路，ná行ná哮，來chhōe in ê上帝—上主。
50:5 In問錫安ê tāichì，面ǹg hia，講：『來lah，lín tio̍h結永遠無bē記得ê約，來kah上主聯合。』
50:6 「我ê人民做迷路ê羊，in ê牧者hō͘ in行叉路，hō͘ in oat去山裡。In tùi大山行到小山，bē記得in安息ê所在。
50:7 見若tú tio̍h in ê會吞食in。In chiahê對敵講：『阮無罪，因為in得罪上主，to̍h是公義tòa ê所在，mā是in ê祖先所ǹg望ê上主。』
50:8 「Lín tio̍h tùi巴比倫中逃走，tùi迦勒底人ê地出去，tio̍h親像公ê山羊tī羊群ê頭前。
50:9 我beh激起真chē大國tùi北方做伙來攻擊巴比倫，in ē排陣來攻擊；它ē tùi hia受攻破。In ê箭ē親像gâu射ê勇士ê箭，lóng無空空倒tńg來。
50:10 迦勒底ē hō͘人搶去；見若搶它ê lóng ē滿意。這是上主講ê。」
50:11 巴比倫陷落
上主講：「巴比倫人，搶我ê產業ê，因為lín歡喜快樂，因為lín跳來跳去，親像踏五穀ê牛母，mā teh哮親像勇ê 馬。
50:12 Lín ê老母會見笑到極，生你ê一定漏氣。你看，伊ēhông列tī chiahê國ê路尾，成做曠野，做乾燥ê地，做沙漠。
50:13 因為上主ê大受氣，一定無人tòa tī hia，會全然拋荒；見若經過巴比倫êē tio̍h驚kah gāng去，mā ē因為她所tú tio̍h chiahê災禍，來kā她恥笑。
50:14 「開弓ê人，lín tio̍h tī巴比倫ê四箍圍排陣，tio̍h射箭kā它攻擊，m̄ thang保惜lín ê箭，因為它有得罪上主。
50:15 Lín tio̍h tī它ê四箍圍喝喊（hoah-hiàm）；伊已經投降。伊ê營寨倒壞à，城牆拆毀à；因為這是上主報仇ê tāichì。Lín tio̍h ǹg伊報仇；伊án怎款待人，mā tio̍h ánne kā伊款待。
50:16 Lín tio̍h tùi巴比倫剪除掖種ê kah收割ê時gia̍h鐮á ê。因為驚壓制ê刀劍ta̍k人ē倒tńg去本族，ta̍k人ē走到本所在。」
50:17 以色列人回國
上主講：「以色列人是四散ê羊，是hō͘獅趕走ê。Tāi先是亞述王kā伊吞食，路尾chitê巴比倫王—尼布甲尼撒at斷伊ê骨頭。」
50:18 所以，萬軍ê上主—以色列ê上帝ánne講：「你看，我beh刑罰巴比倫王kah伊ê地，親像我bat刑罰亞述王ánne。
50:19 我beh koh chhōa以色列人tńg來伊ê草場，伊beh tī迦密 kah巴珊食草，koh tī以法連山kah基列地，伊ê心得tio̍h飽足。
50:20 Hit日hit時，我beh查以色列ê罪過，mā lóng查無；我beh chhōe偤大ê罪惡，mā lóng chhōe無；因為我所留落來ê子民我ē kā in赦免。」
50:21 上主審判巴比倫
上主講：「Tio̍h tńg去攻擊Me-la-tha-im ê地kah tòa tī Pe-ko͘t ê人民。Tio̍h jiok去kā in全部thâi死，照我所吩咐你ê一切去行。
50:22 境內有交戰ê聲kah大毀滅。
50:23 Phah全地ê大支槌ná ē phah斷毀壞？巴比倫tī列國中ná ē teh拋荒？
50:24 巴比倫，我為你設活tauh，你hō͘它tauh tio̍h mā m̄知。你hō͘人chhōe ·tio̍h、掠tio̍h，因為你kah上主做對敵。
50:25 上主已經開祂ê軍裝庫，gia̍h出祂大受氣ê器械；因為主—萬軍ê上主，有tāichì beh tī迦勒底人ê地發生。
50:26 Lín tio̍h tùi極遠ê邊界來攻擊她，開她ê粟倉，kā她hiat做土堆，全部kā她滅掉，無留kah半項。
50:27 Tioh8thâi她所有ê牛káng，hō͘ in落去受thâi。In有災禍ah！因為辦in ê日，hitê期已經到。」
50:28 （有tùi巴比倫地逃走出來ê人ê聲，tī錫安報告上主—咱ê上帝來報仇，to̍h是祂beh為tio̍h祂ê殿來報仇。）
50:29 「Tio̍h招集射箭ê兵，to̍h是所有會開弓ê，來攻擊巴比倫。Tī她ê四箍圍紮營，來kā她phah，m̄ thang hō͘她走kah一个，照她所做ê來kā她報應；伊án怎款待人，tio̍h照ánne來kā她款待，因為她驕傲悖逆上主—以色列ê聖ê。
50:30 因為ánne，她ê少年人ētī伊ê街路倒落去。當hit日，她所有ê兵á lóng ē滅亡。這是上主講ê。
50:31 「你看，驕傲ê巴比倫人，我beh做你ê對敵，因為我辦你ê日，hitê期已經到。
50:32 驕傲ê腳踢tio̍h來跋倒，無人kā伊扶起來。我beh hō͘火tī你hiahê城to̍h起來，kā她四箍圍所有ê全部燒燒去。」
50:33 萬軍ê上主ánne講：「以色列人kah偤大人平平受壓制；所有掠in ê lóng kā in顧tiâu-tiâu，m̄肯放in去。
50:34 救贖in ê有大氣力，祂ê名叫做萬軍ê上主。祂ē為in申冤，hō͘全地得tio̍h平安，mā hō͘ tòa tī巴比倫ê人民phi̍h-phi̍h chhoah。」
50:35 上主講：有刀劍會臨到迦勒底人kah tòa tī巴比倫ê人民，kah in ê貴族，kah in ê星象家。
50:36 有刀劍會臨到誇口ê人，in to̍h成做戇人；有刀劍臨到伊ê勇士，in to̍h起驚惶。
50:37 有刀劍臨到伊ê馬、伊ê車kah其中ê雜色人；inē親像chabó͘人。有刀劍臨到伊ê寶物，伊to̍h受搶奪。
50:38 有炕旱臨到伊所有ê水，to̍h ē乾乾去；因為這是雕刻偶像ê地，人因為神佛來顛狂。
50:39 所以，曠野ê走獸kah豺狼會tòa tī hia，刀劍mā ē tiàm tī hit中間，永遠無人煙，代代無人tòa。
50:40 上主講：的確無人tòa tī hia，mā無人寄腳tī in中間，ē親像我—上帝chhia倒所多瑪、蛾摩拉kah附近ê城ánne。
50:41 你看，有人民tùi北方來，mā有大國kah真chē君王受激動，tùi地極來。
50:42 In gia̍h弓kah鎗，殘忍無憐憫；in ê聲親像海湧hōa-hōa哮。In騎馬排隊，親像上陣ê人，巴比倫ê城，in beh來攻擊你。
50:43 巴比倫王聽tio̍h in ê風聲，手就軟落去；痛苦kā伊擒tiâu，痛疼親像beh生kiáⁿ ê chabó͘人。
50:44 你看，伊ē親像獅tùi約旦河邊ê樹林起來，攻擊堅固tòa ê所在。一目nih久，我beh hō͘ in逃走，離開chitê所在。啥人受揀選，我to̍h派伊治理chitê地。啥人ē比-得我？啥人ē kā我定一个期？有啥物牧者ē tàng khiā tī我ê面前？
50:45 所以，lín tio̍h聽上主所計畫beh攻擊巴比倫ê計策，以及祂所定tio̍h beh攻擊迦勒底ê旨意。In定tio̍h beh kā hiahê細隻羊群拖去。祂mā ē hō͘ in tòa ê所在荒廢。
50:46 因為巴比倫倒壞ê聲，地就搖動，in大聲hoah ê聲傳到tī列邦中。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。