耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
49:1 上主審判亞捫
關係亞捫，上主ánne講：「以色列kám無kiáⁿ？Kám無後嗣？Mal-kam ná ē得tio̍h迦得ê地做產業，伊ê人民ná ē tòa tī伊中間hiahê城？
49:2 你看，日子teh beh到，我beh hō͘交戰ê聲tī亞捫族ê拉巴聽tio̍h，它會成做拋荒ê土堆；它chiahê城會 hō͘火燒，以前佔以色列ê，taⁿē hō͘以色列佔倒tńg來。這是上主講ê。
49:3 「希實本人，你tio̍h哀哭，因為艾（ai）城變做拋荒。拉巴ê人民，你tio̍h大聲hoah，用麻布縖腰；tio̍h啼哭，tī籬笆中行來行去；因為Mal-kam kah伊ê祭司、貴族會做一下hō͘人掠去。
49:4 悖逆ê人民，lín ná ē因為hiahê山谷，to̍h是有水滋潤ê山谷來誇口？你óa靠財寶，講：啥人ē來到阮chia。
49:5 我—主—萬軍ê上主ánne講：你看，我beh hō͘驚惶tùi四箍圍臨到tī lín，línē受趕出，ta̍k人直直走去，走無路ê無人thang收留。
49:6 「總是，後來，我ē hō͘亞捫族受掠ê人倒tńg來。這是上主講ê。」
49:7 上主審判以東
關係以東，萬軍ê上主ánne講：「Tī提幔kám無koh有智慧？聰明ê人kám無koh有計畫？In ê智慧kám無去à？
49:8 底但ê人民，你tio̍h退去，tio̍h去逃走，tio̍h bih去隱密ê所在；因為我刑罰以掃ê時，我beh hō͘伊ê災禍臨到tī伊。
49:9 挽葡萄ê若到你hia挽，kám無iáu留幾粒á？賊á若暗時來，kám m̄是損壞到滿意niā-niā？
49:10 總是，我hō͘以掃光溜溜，露現伊隱密ê所在，致使無tè thang bih。伊ê kiáⁿ孫，伊ê兄弟，伊ê厝邊lóng失敗，伊mā歸tī空空。
49:11 Tio̍h kā你ê孤兒放下teh，我ē kā in保全hō͘ in活落去；你chiahê寡婦，mā tio̍h óa靠我。」
49:12 因為上主ánne講：「你看，本來無應該lim hitê杯ê，一定tio̍h lim，何況是你，你kám ē全部免受刑罰？你一定bē tàng免受刑罰，你一定tio̍h lim。
49:13 我kí kakī 來chiùchōa，波斯拉會成做thang tio̍h驚kah gāng去，thang凌辱，thang咒詛，koh荒廢；它所有ê城ē永遠變做拋荒。」
49:14 我講：「我tùi上主hia聽tio̍h消息，mā有使者奉差派去列國，叫in tio̍h聚集來kā它攻擊，tio̍h起來交戰。
49:15 因為我hō͘你tī列國中做微細ê，hō͘人看輕。
49:16 Tòa tī石洞內把守山頂ê，你ê威風，你心內ê驕傲騙kakī ；你雖然親像鷹鳥，做你ê巢tī koân ê所在，我beh tùi hia kā你取落來。這是上主講ê。
49:17 上主講：「以東會成做thang tio̍h驚kah gāng去ê，見若tùi hia經過ê一定ē感覺奇怪，因為伊所tú ·tio̍h ê一切災禍來kā伊恥笑。
49:18 的確無人tòa tī hia，mā無人寄腳tī hia，ē親像所多瑪、蛾摩拉，kah附近ê城倒壞。
49:19 你看，伊ē親像獅，tùi約旦河邊ê樹林起來，攻擊堅固ê tòa ê所在。目nih久，我beh hō͘ in逃走，離開chitê所在。啥人受揀選，我to̍h派伊治理chitê地；啥人ē比得我？啥人ē kā我定一个期？有啥物牧者ē tàng khiā tī我ê面前？
49:20 所以，lín tio̍h聽上主所計畫beh攻擊以東ê計策，以及祂所註定beh攻擊tòa tī提幔ê人民ê旨意；in定tio̍h beh kā hiahê羊群ê細隻ê拖去，祂mā beh hō͘ in tòa ê所在荒廢。
49:21 因為in倒壞ê聲，地就搖動。In大聲hoah ê聲，傳到紅海。
49:22 你看，伊beh起來，親像鷹鳥飛來，thí開牠ê翼tī波斯拉。到hit日，以東chiahê勇士ê心ē親像beh生kiáⁿ ê chabó͘人ê心。」
49:23 上主審判大馬士革
關係大馬士革，哈馬kah亞珥拔bē見笑，因為in聽tio̍h pháiⁿ消息就失膽。海面有憂愁，bē平靜。
49:24 大馬士革衰弱，oa̍t-tńg身beh逃走，phi̍h-phi̍h chhoah kā伊掠tiâu-tiâu；痛苦憂愁kā伊khiú tiâu-tiâu，親像beh生kiáⁿ ê chabó͘人。
49:25 Thang oló ê城，to̍h是我所歡喜ê城，ná ē受放sak到ánne？
49:26 她ê少年人ētī街路倒落去；當hit日，她所有ê兵á會滅亡。這是萬軍ê上主講ê。
49:27 我mā beh hō͘火to̍h tī大馬士革ê城牆，燒滅便哈達ê宮殿。」
49:28 審判基達國kah夏瑣國
關係基達kah夏瑣chiahê國，to̍h是巴比倫王尼布甲尼撒所phah敗ê，上主ánne講：「你起來，上去基達，剿滅東方ê人。
49:29 In ê布棚kah羊群ē hō͘人搶去，kā帳幅kah一切ê器具，以及駱駝，lóng搶去做kakī ê。人對in hoah：『四箍圍lóng有驚惶』。
49:30 「Tòa tī夏瑣ê人民，你tio̍h逃走，走去遠遠，bih去隱密ê所在；因為巴比倫王尼布甲尼撒設計beh害lín，決定beh kā lín攻擊。
49:31 上主講：「起來！上去攻擊安然生活無操煩ê族，in無門戶，無門閂，是kakī tòa ê。
49:32 In ê駱駝ē hō͘人搶去；in真chē chengseⁿē hō͘人劫去。見若剃鬢邊ê，ē kā in趕散去tī四方，hō͘災禍tùi四箍圍臨到tī in。這是上主講ê。
49:33 夏瑣會成做野狗tòa ê所在，永遠稀微，無人tī hia tòa，mā無人tī hia寄腳。」
49:34 上主審判以攔
偤大王西底家起頭坐位ê時，上主關係以攔ê話臨到耶利米先知，講：
49:35 「萬軍ê上主ánne講：你看，我beh at斷以攔人ê弓，to̍h是in上等ê氣力。
49:36 我beh hō͘四面ê風tùi天ê四面吹來，臨到以攔人，kā in趕散去tī四方。以攔受趕散ê人無一國無到。
49:37 我beh hō͘以攔人tī對敵ê面前kah siàu想in ê性命ê人ê面前來驚惶；我mā beh hō͘災禍，to̍h是我ê大受氣臨到tī in，koh beh hō͘刀劍jiok in，直到kā in全部消滅。
49:38 我beh設立我ê寶座tī以攔，tùi hia除去君王kah貴族。這是上主講ê。
49:39 「總是，到日後，我beh hō͘以攔受掠ê人倒tńg來。這是上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。