出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 葉忒羅來訪問摩西
摩西ê丈人—米甸ê祭司葉忒羅，聽tio̍h上帝為摩西kah祂ê子民—以色列人所行一切ê tāichì，to̍h是上主chhōa以色列人出埃及ê tāichì。
18:2 摩西ê丈人葉忒羅chhōa摩西ê chabó͘人西坡拉來，to̍h是摩西前差她tńg去ê，
18:3 koh chhōa伊兩 个kiáⁿ，一个名叫做革順，因為摩西講：「我寄腳tī外邦。」
18:4 另外一个名叫做以利以謝，因為摩西講：「我ê父ê上帝幫贊我，救我脫離法老ê刀。」
18:5 摩西ê丈人葉忒羅，chhōa摩西兩 个kiáⁿ kah伊ê chabó͘人，來到上帝ê山，to̍h是摩西tī曠野紮營ê所在。
18:6 伊kā摩西講：「我是你ê丈人葉忒羅，chhōa你ê chabó͘人kah她ê兩 个kiáⁿ，來你chia。」
18:7 摩西出去迎接伊ê丈人，對伊鞠躬行禮，kah伊chim嘴，做伙請安了後to̍h入去布棚。
18:8 摩西kā上主為以色列ê緣故對法老kah埃及人所行一切ê tāichì，以及路裡所tú tio̍h一切ê艱難，kah上主án怎kā in拯救，lóng一一講hō͘伊ê丈人聽。
18:9 葉忒羅因為上主款待以色列人一切ê好事，救in脫離埃及人ê手，to̍h真歡喜。
18:10 葉忒羅講：「上主是應該oló ê，祂救lín脫離埃及人ê手，mā脫離法老ê手，救chiahê人民出埃及人ê手下。
18:11 Taⁿ我知影上主比hiahê神明khah偉大，to̍h是對in hiahê埃及人驕傲款待chiahê人民ê tāichì。
18:12 摩西ê丈人葉忒羅kā燒祭kah別款ê祭獻hō͘上帝。亞倫kah以色列ê長老lóng來，tī上帝ê面前，kah摩西ê丈人做伙食。
18:13 指派審判官
(申1：9-18)
隔tńg工，摩西坐teh審判人民；人民tùi早起到ê-hng，lóng khiā óa來摩西ê身邊。
18:14 摩西ê丈人看tio̍h伊對人民所做一切ê tāichì，to̍h講：「你對人民所做ê是啥物tāichì？你ná ē kakī 坐teh，眾人tùi早起到ê-hng lóng khiā tī你ê身邊？」
18:15 摩西應伊ê丈人講：「這是因為人民到我chia來問上帝。
18:16 In有tāichì ê時to̍h來我chia，我to̍h tī in雙pêng ê中間kā in判斷，hō͘ in知上帝ê律例kah法度。」
18:17 摩西ê丈人對伊講：「你ánne做m̄好。
18:18 你kah你chiahê人民ē真損身，因為chitê tāichì hō͘你siuⁿ重ê擔，你kakī 一个人做bē去。
18:19 Taⁿ你tio̍h聽我ê話，我替你想講，願上帝kah你同在。你tio̍h替人民到上帝ê面前，kā案件請問上帝；
18:20 koh tio̍h kā律例kah法度教示in，指示in所tio̍h行ê路，所tio̍h做ê tāichì；
18:21 mā tio̍h tùi人民ê中間揀有才能ê人，to̍h是敬畏上帝，誠實無lāmsám，怨恨不義ê錢hit款人，設立in做人民ê序大，有ê管一千人，有ê管一百人，有ê管五十人，有ê管十人，
18:22 hō͘ in照時審判人民，大事tio̍h hō͘ in到你chia，小事in thang kakī 審判。Án-ne，你to̍h ēkhah減輕重擔，in mā thang kah你做伙擔當。
18:23 你若ánne行，上帝mā ánne吩咐你，你to̍h接（chih）載ē tiâu，chiahê人民mā thang安然到伊ê所在。」
18:24 就ánne，摩西遵thàn伊ê丈人ê話，lóng照伊所講ê去行。
18:25 摩西tùi以色列人中間揀有才能ê人，設立in做人民ê序大，有ê管一千人，有ê管一百人，有ê管五十人，有ê管十人。
18:26 In照時審判人民，有oh得解決ê案件to̍h去摩西hia，若是ta̍k項小事，in to̍hkakī 審判。
18:27 後來，摩西送伊ê丈人出發，葉忒羅to̍h tńg去伊ê故鄉。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。