耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
36:1 巴錄tī聖殿展卷宣讀
偤大王約西亞ê kiáⁿ—約雅敬第四年，有話tùi上主臨到耶利米，講：
36:2 「你tio̍h the̍h一本冊，kā我所對你講beh攻擊以色列kah偤大，以及ta̍k國所有ê話，tùi我kā你講話ê hit日起，to̍h是tùi約西亞hiahê日起到tī今á日，lóng寫tī hit內面。
36:3 Kiám-chhái偤大家ē聽tio̍h我所按算beh降hō͘ in ê一切災禍，致使in ēoa̍t頭，ta̍k人離開伊ê pháiⁿ路，我to̍h thang赦免in ê罪過kah罪惡。」
36:4 耶利米to̍h叫尼利亞ê kiáⁿ—巴錄來；巴錄to̍h kā耶利米所傳上主對伊講一切ê話，lóng記tī冊裡。
36:5 耶利米吩咐巴錄講：「我受阻礙，bē tàng入去上主ê殿。
36:6 你tio̍h去，kā我所傳，你所寫tī冊裡ê上主ê話，tī上主ê殿，tī禁食ê日讀hō͘眾人聽，mā讀hō͘ tùi chiahê城來ê偤大人聽。
36:7 Kiám-chhái inē tī上主ê面前謙卑祈禱，in ē回頭，ta̍k人離開伊ê pháiⁿ路，因為上主對chiahê人民所講beh發出ê受氣，hitê受氣真大。」
36:8 尼利亞ê kiáⁿ—巴錄就照耶利米先知一切所吩咐ê去行，tī上主ê殿，讀冊裡所記載上主ê話。
36:9 偤大王約西亞ê kiáⁿ—約雅敬五年ê九月，耶路撒冷ê眾人kah hiahê tùi偤大城來到耶路撒冷ê眾人；宣布tī上主ê面前禁食。
36:10 Hit時，tī上主ê殿，書記沙番ê kiáⁿ—Ge-má-liah ê房，tī頂院，近上主ê殿，新門ê門口，巴錄tùi hit本冊讀耶利米ê話，hō͘眾人親耳來聽。
36:11 向官員宣讀
沙番ê孫—Ge-má-liah ê kiáⁿ—米該亞聽tio̍h冊內上主一切ê話，
36:12 伊to̍h落去王宮，入去書記ê房。你看，眾貴族lóng坐tī hia，to̍h是書記以利沙瑪，示瑪雅ê kiáⁿ第萊雅，亞革波ê kiáⁿ以利拿單，沙番ê kiáⁿ Ge-má-liah，哈拿尼雅ê kiáⁿ西底家，kah所有ê貴族。
36:13 就ánne，米該亞對in講起伊所聽tio̍h一切ê話，to̍h是巴錄對人民讀hit本冊ê時伊所聽tio̍h ·ê。
36:14 因為ánne，chiahê貴族to̍h差古示ê干á孫，示利米雅ê孫，尼探雅ê kiáⁿ E-ho-tih到巴錄hia，對伊講：「你kā所讀hō͘人民聽ê冊，親手the̍h來hō͘我。」尼利亞ê kiáⁿ—巴錄就親手the̍h hit本冊來伊hia。
36:15 In對伊講：「請坐，讀hō͘阮聽。」巴錄就讀hō͘ in聽。
36:16 In聽這一切ê話，大家就驚惶相看，kā巴錄講：「阮絕對beh kā chiahê話lóng對王講。」
36:17 In koh問巴錄講：「請你kā阮講，你用啥款來寫伊所傳一切ê話？」
36:18 巴錄應講：「伊親嘴對我講chiahê話，我to̍h用筆墨寫tī冊裡。」
36:19 Hiahê貴族對巴錄講：「你kah耶利米tio̍h去bih teh，m̄ thang hō͘人知lín tī tó位。」
36:20 王燒冊卷
Hiahê貴族kā hit本hē tī書記以利沙瑪ê房，chiah入去院內見王，kā chiahê話lóng講hō͘王聽。
36:21 王差E-ho-tih去the̍h hit本冊來；伊to̍htui3書記以利沙瑪ê房the̍h來。E-ho-tih讀hō͘王聽，mā hō͘ khiā tī王左右hiahê貴族聽。
36:22 Hit時，是九月，王坐tī過寒天ê厝，面頭前有火爐teh to̍h。
36:23 E-ho-tih見若讀三篇á是四篇，王to̍h用書記ê刀kā它割起來，hiat tī火爐，到全本lóng tī爐中ê火燒掉。
36:24 王kah聽tio̍h chiahê話ê人臣，in lóng無驚mā無拆裂in ê衫。
36:25 以利拿單、第萊雅kah Ge-má-liah，求王m̄ thang燒hit本冊，總是，伊m̄聽。
36:26 王to̍h命令王子（註：原譯本是 "Hap-bí-le̍k ê kiáⁿ"，"Hap-bí-le̍k"ê原文是「王」ê意思）耶拉篾，kah亞斯列ê kiáⁿ西萊雅，kah Ab-tel ê kiáⁿ示利米雅，去掠書記巴錄kah耶利米先知。總是，上主kā in藏（chhàng）起來。
36:27 耶利米重寫冊卷
王kā hit本，to̍h是巴錄所寫耶利米所傳ê話，燒去了後，上主ê話koh臨到耶利米，講：
36:28 「你koh the̍h一本，kā偤大王約雅敬所燒早前hit本hiahê話，lóng寫tī hit內面。
36:29 講tio̍h偤大王約雅敬，你tio̍h講：上主ánne講：你燒hit本，講：『你ná ē tī hit內面寫講：巴比倫王一定ē來毀滅chitê土地，hō͘ chit所在ê人kah chengseⁿ lóng死去？』
36:30 所以，上主關係偤大王約雅敬，講：祂ē無人thang坐大衛ê寶座，伊ê身屍會hông hiat-ka̍k tī外面，日時hō͘日曝，暗時hō͘霜凍。
36:31 我beh因為伊kah伊ê kiáⁿ孫，kah伊ê人臣ê罪過，kā in刑罰。我beh hō͘我所講一切ê災禍臨到in，以及耶路撒冷ê人民kah偤大人；總是，in m̄聽。」
36:32 就ánne，耶利米koh the̍h一本，交hō͘尼利亞ê kiáⁿ—書記巴錄，伊to̍hka7耶利米所傳ê話寫tī hit內面，to̍h是偤大王約雅敬所燒去hit本所有ê話，另外koh添真chē類似ê話。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。