耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
35:1 耶利米kah利甲族
當偤大王—約西亞ê kiáⁿ約雅敬坐位ê時，上主ê話臨到耶利米，講：
35:2 「你tio̍h去利甲族ê厝，kah in講話；chhōa in到上主ê殿，入去一間房，用酒hō͘ in lim。」
35:3 我to̍h kā Ha-ba-ji-niah ê孫，E-le-miah ê kiáⁿ Ia-cha-niah，kah伊ê兄弟，kah伊ê眾kiáⁿ，以及利甲全族ê人，
35:4 chhōa in來到上主ê殿，入去上帝ê奴僕—Ik-ta-liah ê kiáⁿ哈難眾kiáⁿ ê房。Hit間房tī貴族ê房隔壁，貴族ê房to̍h是tī沙龍ê kiáⁿ把門ê瑪西雅ê房頂面。
35:5 我to̍h用碗、用杯貯酒滿滿，排tī利甲族人ê面前，kā in講：「請lín lim酒。」
35:6 Into̍h講：「阮m̄-lim酒，因為阮ê先祖—利甲ê kiáⁿ約拿達bat吩咐阮講：『Lín kah lín ê kiáⁿ孫永遠m̄ thang lim酒，
35:7 mā m̄ thang起厝，m̄ thang掖種，m̄ thang栽種葡萄園，m̄ thang有chiahê；一世人tio̍h tòa tī布棚，hō͘ lín tī lín寄腳ê所在長歲壽。』
35:8 見若阮先祖—利甲ê kiáⁿ約拿達吩咐阮ê話，阮lóng遵thàn；阮kah阮ê bó͘、阮ê kiáⁿ、阮ê chabó͘ kiáⁿ，一世人lóng無lim酒，
35:9 mā無起厝來hō͘ kakī tòa，mā無有葡萄園，無有田園，無有種籽。
35:10 獨獨tòa tī布棚，lóng遵thàn阮ê先祖—約拿達所命令ê來行。
35:11 總是，巴比倫王尼布甲尼撒來到chitê地ê時，阮to̍h講：『來，咱tio̍h chiuΝ7耶路撒冷，來閃避迦勒底人ê兵，kah亞南ê兵；因為ánne，阮chiah tòa tī耶路撒冷。」
35:12 上主ê話臨到耶利米，講：
35:13 「萬軍ê上主—以色列ê上帝ánne講：你tio̍h去kā偤大人kah tòa tī耶路撒冷ê人民講：上主講：Lín kám m̄受教示，m̄遵thàn我ê話？
35:14 利甲ê kiáⁿ約拿達所吩咐伊ê kiáⁿ孫m̄ thang lim酒ê話，in lóng遵守，到今á日mā無lim，因為in遵thàn先祖ê命令。總是，我有對lín講，早早to̍h起來講，m̄ koh，lín m̄聽我ê話。
35:15 我mā 差我ê眾奴僕—chiahê先知來見lín，早早to̍h起來差in，講：『Lín tio̍h oa̍t頭，ta̍k人離開伊ê pháiⁿ路，改換lín ê所做，無thàn別種ê神明來服事in，lín to̍hthang tòa tī我所賞賜hō͘ lín kah lín祖先ê地。』總是，lín m̄ àⁿ耳孔來聽，mā m̄聽我ê話。
35:16 因為利甲ê kiáⁿ—約拿達ê kiáⁿ孫有遵守in ê先祖所kā in吩咐ê命令，獨獨chiahê人民無beh遵thàn我！
35:17 所以，上主—萬軍ê上主—以色列ê上帝ánne講：你看，我beh hō͘我所講ē kā in攻擊ê一切災禍臨到偤大人kah耶路撒冷所有ê人民。因為我對in講，in無beh遵thàn；我叫in，in無beh應。」
35:18 耶利米對利甲族ê人講：「萬軍ê上主—以色列ê上帝ánne講：因為lín遵thàn lín ê先祖約拿達ê命令，守伊一切ê誡命，照ánne行一切所命令lín ê，
35:19 所以，萬軍ê上主—以色列ê上帝ánne講：利甲ê kiáⁿ約拿達一定永遠有人khiā tī我ê面前。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。