耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
32:1 耶利米購置田園
偤大王西底家第十年，to̍h是尼布甲尼撒十八年，有上主ê話臨到耶利米。
32:2 Hit時，巴比倫王ê軍隊圍困耶路撒冷，耶利米先知關tī拘留所ê院，tī偤大王ê厝。
32:3 因為偤大王西底家已經kā伊關禁，講：「你ná ē預言講：上主ánne講：『你看，我beh kā chitê城交tī巴比倫王ê手，伊ē kā她征服。
32:4 偤大王西底家一定bē脫離迦勒底人ê手，定tio̍h會交tī巴比倫王ê手，mā ē kah伊嘴對嘴講話，伊ê目chiu mā ē看伊ê目chiu 。
32:5 西底家ē hō͘伊掠到巴比倫，tòa tī hia，到我照顧伊ê時滿。Lín雖然kah迦勒底人交戰，mā無利益。這是上主講ê。』」
32:6 耶利米講：「上主ê話臨到我講：
32:7 『你看，你ê阿叔沙龍ê kiáⁿ Ha-ná-mel beh來見你，講：我tī亞拿突hit坵田，請你來買；因為贖回ê權在tī你，你thang買。』」
32:8 我ê阿叔ê kiáⁿ Ha-ná-mel果然照上主ê話來拘留所ê院chhōe我，對我講：「我tī便雅憫ê境內ê亞拿突ê hit坵田，請你來買；因為承接kah贖回ê權在tī你，你tio̍h買來成做你ê！」我to̍h知這是上主ê話。
32:9 我to̍h tùi我ê阿叔ê kiáⁿ Ha-ná-mel買亞拿突hit坵田，秤hitê價錢hō͘伊，共十七舍客勒。
32:10 我tī契面簽名，kā契約書封密，koh請人來做證人，mā用天秤秤（chhìn）銀hō͘伊。
32:11 我to̍htheh8照規例所立ê買契，to̍h是封密ê hit張契約書kah無封密ê hit張，
32:12 當我ê阿叔ê kiáⁿ Ha-ná-mel kah簽名tī契面chiahê證人，以及坐tī拘留所院內所有偤大人ê面前，kā買賣ê價錢交hō͘瑪西雅ê孫—尼利亞ê kiáⁿ巴錄。
32:13 當in ê面前，我吩咐巴錄講：
32:14 「萬軍ê上主—以色列ê上帝ánne講：你tio̍h kā封密ê kah無封密ê chit兩張契約書，收tī磁器ê內面，thang久長留存。
32:15 因為萬軍ê上主—以色列ê上帝ánne講：將來tī chit所在，人ēkoh買厝宅、田園kah葡萄園。」
32:16 耶利米ê祈禱
我kā買契交hō͘尼利亞ê kiáⁿ 巴錄以後，to̍h對上主祈禱，講：
32:17 「至koân上主ah，祢bat用大權能kah伸出ê手創造天地，在tī祢，無一項oh成ê tāichì。
32:18 祢施慈愛hō͘千萬人，koh kā老父ê罪過報應tī伊kiáⁿ孫ê身上。至大全能上帝，萬軍ê耶和華是祂ê名。
32:19 祢ê計畫有大本事，做tāichì有大權能，注目看世間人一切ê行為，照ta̍k人ê所行kah in ê所做ê效果，來kā伊報應。
32:20 Tī埃及地顯出神跡奇事，一直到今á日；tī以色列kah別人ê中間mā是ánne，hō͘祢得tio̍h名聲，親像今á日ánne。
32:21 祢用神跡奇事kah大權能ê手，以及伸出ê手骨kah大koh thang驚ê tāichì，chhōa祢ê子民—以色列人出埃及地。
32:22 祢kā chitê流奶kah蜜ê地賞賜hō͘ in，to̍h是祢對in ê祖先chiùchōa beh hō͘ in ê。
32:23 In入來得tio̍h它做產業，總是，in無遵thàn祢ê話，無行祢ê律法；祢一切命令in行ê，in無行kah半項，所以，祢hō͘所有ê災禍臨到tī in。
32:24 「你看，有koân ê土堆，in已經逼óa chitê城，beh kā她征服；城mā因為刀劍、飢荒、瘟疫，交hō͘攻擊它ê迦勒底人ê手。祢所講ê已經成，祢mā親目看tio̍h。
32:25 至koân上主ah，祢kā我講，tio̍h為kakī 用銀買田，koh請人做證人。Taⁿ chitê城已經交tī迦勒底人ê手à。」
32:26 上主ê話臨到耶利米，講：
32:27 「你看，我是上主，是所有有血氣ê ê上帝，在tī我kám有一項oh成ê tāichì？
32:28 你看，我beh kā chitê城交hō͘迦勒底人ê手，kah巴比倫王尼布甲尼撒ê手，伊ē kā她征服。
32:29 攻城ê迦勒底人ē放火燒chitê城kah厝宅。Tī chiahê厝頂，人bat ǹg巴力燒香，ǹg別个神明灌奠，來惹我受氣。
32:30 以色列人kah偤大人，tùi少年以來，硬硬beh行我目chiu 中看做pháiⁿ ê tāichì；以色列人全部用手所做ê來惹我受氣。這是上主講ê。
32:31 Chitê城tùi起造ê日到今á日，tiāⁿ-tiāⁿ 惹我受氣，hō͘我懊惱，致使我kā她除去，離開我ê面前；
32:32 是因為以色列人kah偤大人一切ê邪惡，to̍h是in kah in ê君王、貴族、祭司、先知kah偤大ê群眾，以及tòa tī耶路撒冷ê人民所行ê，來惹我受氣。
32:33 In用尻脊骿ǹg我，無用面；我雖然教示in，是早早to̍h起來教示in，總是，in無遵thàn來受教示。
32:34 In竟然用in可惡ê物hē tī用我ê名所稱呼ê厝，來kā它òe lahsap。
32:35 In tī便欣嫩ê山谷起巴力ê城堡，beh hō͘ in ê kiáⁿ兒經過火來歸摩洛；in行這可惡ê tāichì 來hō͘偤大陷落罪。這m̄是我所命令ê，mā m̄是我ê心所想ê。」
32:36 復國ê應允
Taⁿ講tio̍h chitê城，是lín所講已經因為刀劍、飢荒、瘟疫，交tī巴比倫王ê手ê。以色列ê上帝—上主ánne講：
32:37 「你看，我tī受氣、懊惱kah大受氣ê中間，kā in趕去到ta̍k國。後來，我beh tùi hia招集in出來，chhōa in tńg來chit所在，hō͘ in安然tòa tī hia。
32:38 In會做我ê子民，我beh做in ê上帝。
32:39 我beh hō͘ in一心一意，hō͘ in tiāⁿ-tiāⁿ 敬畏我，hō͘ in kah in ê kiáⁿ孫得tio̍h福氣。
32:40 我beh kah in立永遠ê約，to̍h是無beh oa̍t-tńg離開in，是beh賜福hō͘ in，koh hō͘ in存心敬畏我，無oa̍t-tńg離開我。
32:41 我beh疼in，賜福hō͘ in，我實在beh盡心盡意，kā in栽培tī chitê所在。」
32:42 上主ánne講：「我án怎 hō͘ chitê大ê災禍臨到tī chiahê人民，我mā beh ánne hō͘我所應允in一切ê福氣臨到in。
32:43 Lín講：Chitê所在是拋荒，無人，無chengseⁿ，是交hō͘迦勒底人ê手ê。將來人ēkoh tī chit所在買田園。
32:44 Tī便雅憫地，tī耶路撒冷ê四箍圍，tī偤大chiahê城，tī山地chiahê城，tī平原chiahê城，kah tī南方chiahê城，人ē用銀買田，tī契面簽名，kā契約書封密，請人做證人；因為我beh hō͘受掠ê人倒tńg來。這是上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。