耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
31:1 以色列人回鄉
上主講：「Hit時，我beh做以色列ta̍k房頭ê上帝，in ē做我ê子民。」
31:2 上主ánne講：以色列hō͘刀thâi無了ê人民，tī曠野得tio̍h恩典，我beh hō͘ in得tio̍h安息。
31:3 早前上主對我顯現，講：我用永遠ê疼，疼你，因為ánne，我用慈愛牽你。
31:4 以色列ê在室女，我beh koh kā你建立，你to̍h ē得tio̍h建立；你beh koh用lin-long鼓做打扮，kah快樂ê人做陣跳舞出去。
31:5 你ēkoh栽種葡萄園tī撒馬利亞chiahê山，栽種ê會栽種，來享受它ê果子。
31:6 因為有一日，以法連山守望ê人ē大聲hoah：起來！咱來去錫安，到上主—咱ê上帝hia。
31:7 上主ánne講：Lín tio̍h為雅各唱歡喜ê歌，為萬國中做頭ê國出大聲，傳播oló講：上主ah，救祢ê子民—以色列人所chhun落來ê人。
31:8 你看，我beh chhōa in tùi北方來，聚集in tùi地極來；kah in來ê，有chheⁿmê ê、跛腳ê、帶娠ê、beh生kiáⁿ ê，kui大陣做伙來。
31:9 In會啼哭來，我beh tī祈禱中chhōa in，我beh tī正直bē跋倒ê路chhōa in來到河邊，因為我是以色列ê父，以法連做我ê大kiáⁿ。
31:10 上主講：列國，lín tio̍h聽上主ê話，傳報tī遠ê島嶼，講：趕散以色列êē kā伊聚集，koh kā伊顧守，親像牧者顧守伊ê羊群。
31:11 因為上主已經救贖雅各，kā伊贖回脫離比伊khah強ê ê手。
31:12 Inē到錫安koân ê所在唱歌，koh ē親像河水teh流，到上主恩典ê地，得tio̍h五穀、酒、油、羊群kah細隻ê牛群。In ê心ē親像灌ak ê園，lóng無koh憂苦。
31:13 Hit時，在室女會跳舞來歡喜，少年人kah老人mā ē做伙歡喜；因為我beh hō͘ in ê悲哀變做歡喜，mā beh kā in安慰，hō͘ in tī憂悶了後來，快樂。
31:14 我beh用油膩hō͘祭司ê心滿足；我ê人民mā ē因為我ê恩惠滿意。這是上主講ê。
31:15 上主憐憫以色列
上主ánne講：Tī拉瑪聽tio̍h聲，啼哭koh大悲傷，拉結哭她ê kiáⁿ兒，m̄願受安慰，因為她ê kiáⁿ死去à。
31:16 上主ánne講：Tio̍h禁止你ê聲，m̄ thang啼哭，禁止你ê目chiu ，m̄ thang流目屎，因為你做工ē得tio̍h報賞；in ētùi對敵ê國tńg來。這是上主講ê。
31:17 上主講：你ê尾景有ǹg望，你ê kiáⁿ兒ē倒tńg來kakī ê境內。
31:18 我實在有聽tio̍h以法連kakī 痛恨，講：你督責我，我to̍h受督責；我親像教bē上chōa ê牛á，求祢hō͘我oa̍t倒tńg，我to̍h oa̍t倒tńg，因為祢是我ê上帝—上主。
31:19 我oa̍t倒tńg以後to̍h反悔；受教示以後to̍hphah腳腿痛悔；我to̍h見笑漏氣，因為我擔當少年ê時ê凌辱。
31:20 上主講：以法連kám是我疼ê kiáⁿ？Kám是thang歡喜ê gín-á？我見若kā伊責備，iáu koh深深數念伊；所以，我ê心腸為tio̍h伊bē平安，我一定beh憐憫伊。
31:21 以色列ê人民，你tio̍h為kakī 立指路牌，khiā引路柱，你tio̍h注意ǹg大路，to̍h是你所去ê原路；你tio̍h倒tńg來，tńg來tī你chiahê城。
31:22 偏邪ê chabó͘ gín-á，你四界流浪無定tio̍h ē到tang時？上主tī地chiūⁿ創一項新ê tāichì，to̍h是chabó͘人beh保護chapo͘人。
31:23 上帝子民ê光明前途
萬軍ê上主—以色列ê上帝ánne講：「我hō͘受掠ê人倒tńg來ê時，tī偤大地kah它hiahê城，人ēkoh用chitê話講：公義ê厝，聖ê山，願上主kā你賜福。
31:24 偤大kah hiahê城ê人以及作穡人、四界飼羊ê人，lóng ē做伙tòa tī hia。
31:25 因為心神厭倦ê人，我已經hō͘伊滿足；心神憂悶ê人，我已經hō͘伊知足。
31:26 先知講：「我睏醒teh想，我ê睏真歡喜！」
31:27 上主講：「你看，日子teh beh到，我beh hō͘以色列ê子民kah偤大家，人kah chengseⁿ lóng傳種。
31:28 我早前án怎專心kā in拔出、拆毀、chhia倒、滅亡、困苦，chitmá mā beh照ánne專心kā in建立、栽種。這是上主講ê。
31:29 當hiahê日，人無koh講：老父食酸ê葡萄，kiáⁿ ê嘴齒痠軟。
31:30 Ta̍k人ē因為kakī ê罪來死；見若食酸ê葡萄ê，in ê嘴齒會軟去。
31:31 上主講：「你看，日子teh beh到，我beh kah以色列ê子民以及偤大家立新ê約，
31:32 m̄是照我kah in ê祖先所立ê約，tī我牽in ê手，chhōa in出埃及地ê時所立ê。我雖然做in ê丈夫，in猶原違背我ê約。這是上主講ê。」
31:33 上主講：「Hiahê日了後，我kah以色列ê子民所beh立ê約是chitê：to̍h是我beh用我ê律法hē tī in ê心內，刻tī in ê心肝。我beh做in ê上主，in ē做我ê子民。
31:34 In無koh ta̍k人教示in ê厝邊kah in ta̍k人ê兄弟，講：『Lín tio̍h bat上主』，因為in tùi大到細lóng ēbat我。因為我beh赦免in ê罪過，無kohē記得in ê罪。這是上主講ê。」
31:35 上主設日頭做日時ê光，設月kah星ê定例做暗時ê光，搖動大海，hō͘它ê湧hōa-hōa哮，萬軍ê耶和華to̍h是祂ê名。祂有ánne講：
31:36 Chiahê定例若ē tī我ê面前廢除，以色列ê kiáⁿ孫chiah ētī我ê面前絕斷，永遠bē成做國。這是上主講ê。
31:37 上主ánne講：若tī頂面ê天會量得，tī地ê下面chiahê根基會測度得，我to̍h一定因為以色列ê kiáⁿ孫一切ê所行來棄sak伊。這是上主講ê。
31:38 上主講：「你看，日子teh beh到，chitê城ē kā上主起造，tùi Ha-na-nel ê樓到角頭ê門。
31:39 量ê索koh牽出去，一直到Ga-lep山，oa̍t tńg去到Go-ah。
31:40 Hiat身屍kah piàⁿ火灰tī全部ê山谷kah所有ê田園，一直到汲淪溪，koh直到東pêng「馬ê門」ê角頭lóng beh做聖，歸tī上主，無koh拔出，無koh chhia倒，一直到永遠。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。