耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
31:1 I-su-la-el Lâng Hôe-hiong
Siōng-chú kóng, " Hit sî, Góa beh chò I-su-la-el ta̍k pâng-thâu ê Siōng-tè, in ē chò Góa ê chú-bîn. "
31:2 Siōng-chú ánne kóng: I-su-la-el hō͘ to thâi bô liáu ê jîn-bîn, tī khòng-iá tit tio̍h un-tián, Góa beh hō͘ in tit tio̍h an-hioh.
31:3 Chá-chêng Siōng-chú tùi góa hián-hiān, kóng: Góa ēng éng-oán ê thiàⁿ, thiàⁿ lí, in-ūi ánne, Góa ēng chû-ài khan lí.
31:4 I-su-la-el ê chāi-sek-lí, Góa beh koh kā lí kiàn-li̍p, lí chiū ē tit tio̍h kiàn-li̍p; lí beh koh ēng lin-long-kó͘ chò táⁿ-pān, kah khoài-lo̍k ê lâng chò-tīn thiàu-bú chhut-.khì.
31:5 Lí ē koh chai-chèng phû-tô hn̂g tī Sa-má-lī-a chiahê soaⁿ, chai-chèng ê ē chai-chèng, lâi hióng-siū i ê kóe-chí.
31:6 In-ūi ū chi̍t ji̍t, E-hu-laim soaⁿ siú-bōng ê lâng ē tōa-siaⁿ hoah: Khí-.lâi! Lán lâi-khì Si-óng, kàu Siōng-chú — lán ê Siōng-tè hia.
31:7 Siōng-chú ánne kóng: Lín tio̍h ūi Iâ-kop chhiùⁿ hoaⁿ-hí ê koa, ūi bān-kok tiong chò thâu ê kok chhut tōa-siaⁿ, thoân-pò͘ oló kóng: Siōng-chú ah, kiù Lí ê chú-bîn — I-su-la-el lâng só͘ chhun lo̍h-.lâi ê lâng.
31:8 Lí khòaⁿ, Góa beh chhōa in tùi pak-hong lâi, chū-chi̍p in tùi tē-ke̍k lâi; kah in lâi ê, ū chheⁿmê-.ê, pái-kha-.ê, tòa-sin ê, beh seⁿ kiáⁿ ê, kui tōa-tīn chò-hóe lâi.
31:9 In ē thî-khàu lâi, Góa beh tī kî-tó tiong chhōa in, Góa beh tī chèng-ti̍t bē poa̍h-tó ê lō͘ chhōa in lâi-kàu hô piⁿ, in-ūi Góa sī I-su-la-el ê pē, E-hu-laim chò Góa ê tōa-kiáⁿ.
31:10 Siōng-chú kóng: Lia̍t kok, lín tio̍h thiaⁿ Siōng-chú ê ōe, thoân-pò tī hn̄g ê tó-sū, kóng: Kóaⁿ-sòaⁿ I-su-la-el ê ē kā i chū-chi̍p, koh kā i kò͘-siú, chhin-chhiūⁿ bo̍k-chiá kò͘-siú i ê iûⁿ-kûn.
31:11 In-ūi Siōng-chú í-keng kiù-sio̍k Iâ-kop, kā i sio̍k-hôe thoat-lī pí i khah kiông-.ê ê chhiú.
31:12 In ē kàu Si-óng koân ê só͘-chāi chhiùⁿ koa, koh ē chhin-chhiūⁿ hô chúi teh lâu, kàu Siōng-chú un-tián ê tē, tit tio̍h ngó͘-kok, chiú, iû, iûⁿ-kûn kah sè chiah ê gû-kûn. In ê sim ē chhin-chhiūⁿ koàn-ak ê hn̂g, lóng bô koh iu-khó͘.
31:13 Hit sî, chāi-sek-lí ē thiàu-bú lâi hoaⁿ-hí, siàu-liân lâng kah lāu lâng mā ē chò-hóe hoaⁿ-hí; in-ūi Góa beh hō͘ in ê pi-ai piàn-chò hoaⁿ-hí, mā beh kā in an-ùi, hō͘ in tī iu-būn liáu-āu lâi khoài-lo̍k.
31:14 Góa beh ēng iû-jī hō͘ chè-si ê sim boán-chiok; Góa ê jîn-bîn mā ē in-ūi Góa ê un-hūi boán-ì. Che sī Siōng-chú kóng ê.
31:15 Siōng-chú Liân-bín I-su-la-el
Siōng-chú ánne kóng: Tī La̍h-má thiaⁿ tio̍h siaⁿ, thî-khàu koh tōa pi-siong, La̍h-khel khàu i ê kiáⁿ-jî, m̄-goān siū an-ùi, in-ūi i ê kiáⁿ sí-.khì à.
31:16 Siōng-chú ánne kóng: Tio̍h kìm-chí lí ê siaⁿ, m̄ thang thî-khàu, kìm-chí lí ê ba̍k-chiu, m̄ thang lâu ba̍k-sái, in-ūi lí chò-kang ē tit tio̍h pò-siúⁿ; in ē tùi tùi-te̍k ê kok tńg-.lâi. Che sī Siōng-chú kóng ê.
31:17 Siōng-chú kóng: Lí ê bóe-kéng ū ǹg-bāng, lí ê kiáⁿ-jî ē tò tńg-lâi kakī ê kéng lāi.
31:18 Góa si̍t-chāi ū thiaⁿ tio̍h E-hu-laim kakī thòng-hūn, kóng: Lí tok-chek góa, góa chiū siū tok-chek; góa chhin-chhiūⁿ kà bē chiūⁿ chōa ê gû-á, kiû Lí hō͘ góa oa̍t tò-tńg, góa chiū oa̍t tò-tńg, in-ūi Lí sī góa ê Siōng-tè — Siōng-chú.
31:19 Góa oa̍t tò-tńg í-āu chiū hoán-hóe; siū kà-sī í-āu chiū phah kha-thúi thòng-hóe; góa chiū kiàn-siàu làu-khùi, in-ūi góa tam-tng siàu-liân ê sî ê lêng-jio̍k.
31:20 Siōng-chú kóng: E-hu-laim kám sī Góa thiàⁿ ê kiáⁿ? Kám sī thang hoaⁿ-hí ê gín'á? Góa kiàn-nā kā i chek-pī, iáu koh chhim-chhim siàu-liām i; só͘-í, Góa ê sim-tn̂g ūi tio̍h i bē pêng-an, Góa it-tēng beh liân-bín i.
31:21 I-su-la-el ê jîn-bîn, lí tio̍h ūi kakī li̍p chí-lō͘ pâi, khiā ín-lō͘ thiāu, lí tio̍h chù-ì ǹg tōa lō͘, to̍h-sī lí só͘ khì ê goân-lō͘; lí tio̍h tò tńg-.lâi, tńg-lâi tī lí chiahê siâⁿ.
31:22 Phian siâ ê chabó͘ gín'á, lí sì-kè liû-lōng bô tiāⁿ tio̍h ē kàu tang-sî? Siōng-chú tī tē-chiūⁿ chhòng chi̍t hāng sin ê tāichì, to̍h-sī chabó͘ lâng beh pó-hō͘ chapo͘ lâng.
31:23 Siōng-tè Chú-bîn ê Kng-bêng Chiân-tô͘
Bān-kun ê Siōng-chú — I-su-la-el ê Siōng-tè ánne kóng, " Góa hō͘ siū lia̍h ê lâng tò tńg-.lâi ê sî, tī Iô-tah tē kah i hiahê siâⁿ, lâng ē koh ēng chit-ê ōe kóng: Kong-gī ê chhù, Sèng ê soaⁿ, goān Siōng-chú kā lí sù-hok.
31:24 Iô-tah kah hiahê siâⁿ ê lâng í-ki̍p choh-sit lâng, sì-kè chhī iûⁿ ê lâng, lóng ē chò-hóe tòa tī hia.
31:25 In-ūi sim-sîn ià-siān ê lâng, Góa í-keng hō͘ i boán-chiok; sim-sîn iu-būn ê lâng, Góa í-keng hō͘ i ti chiok.
31:26 Sian-ti kóng, " Góa khùn-chhéⁿ teh siūⁿ, góa ê khùn chin hoaⁿ-hí! "
31:27 Siōng-chú kóng, " Lí khòaⁿ, ji̍t-chí teh beh kàu, Góa beh hō͘ I-su-la-el ê chú-bîn kah Iô-tah ke, lâng kah chengseⁿ lóng thoân chéng.
31:28 Góa chá-chêng án-chóaⁿ choan-sim kā in poe̍h-chhut, thiah-húi, chhia-tó, bia̍t-bông, khùn-khó͘, chitmá mā beh chiàu ánne choan-sim kā in kiàn-li̍p, chai-chèng. Che sī Siōng-chú kóng ê.
31:29 Tng hiahê ji̍t, lâng bô koh kóng: Lāu-pē chia̍h sng ê phû-tô, kiáⁿ ê chhùi-khí sng-nńg.
31:30 Ta̍k lâng ē in-ūi kakī ê chōe lâi sí; kiàn-nā chia̍h sng ê phû-tô ê, in ê chhùi-khí ē nńg-.khì.
31:31 Siōng-chú kóng, " Lí khòaⁿ, ji̍t-chí teh beh kàu, Góa beh kah I-su-la-el ê chú-bîn í-ki̍p Iô-tah ke li̍p sin ê iok,
31:32 m̄-sī chiàu Góa kah in ê chó͘-sian só͘ li̍p ê iok, tī Góa khan in ê chhiú, chhōa in chhut Ai-gi̍p tē ê sî só͘ li̍p ê. Góa sûi-jiân chò in ê tiōng-hu, in iû-goân ûi-pōe Góa ê iok. Che sī Siōng-chú kóng ê. "
31:33 Siōng-chú kóng, " Hiahê ji̍t liáu-āu, Góa kah I-su-la-el ê chú-bîn só͘ beh li̍p ê iok sī chit-ê: to̍h-sī Góa beh ēng Góa ê lu̍t-hoat hē tī in ê sim-lāi, khek tī in ê sim-koaⁿ. Góa beh chò in ê Siōng-chú, in ē chò Góa ê chú-bîn.
31:34 In bô koh ta̍k lâng kà-sī in ê chhù-piⁿ kah in ta̍k lâng ê hiaⁿ-tī, kóng, ' Lín tio̍h bat Siōng-chú', in-ūi in tùi tōa kàu sè lóng ē bat Góa. In-ūi Góa beh sià-bián in ê chōe-kò, bô koh ē kì-tit in ê chōe. Che sī Siōng-chú kóng ê. "
31:35 Siōng-chú siat ji̍t-thâu chò ji̍t-sî ê kng, siat goe̍h kah chheⁿ ê tēng-lē chò àm-sî ê kng, iô-tāng tōa hái, hō͘ i ê éng hōa-hōa háu, bān-kun ê I-é-ho-bah to̍h-sī I ê miâ. I ū ánne kóng:
31:36 Chiahê tēng-lē nā ē tī Góa ê bīn-chêng hùi-tû, I-su-la-el ê kiáⁿ-sun chiah ē tī Góa ê bīn-chêng choa̍t-tn̄g, éng-oán bē chiâⁿ-chò kok. Che sī Siōng-chú kóng ê.
31:37 Siōng-chú ánne kóng: Nā tī téng-bīn ê thiⁿ ē niû-.tit, tī tē ê ē-bīn chiahê kin-ki ē chhek-to̍k-.tit, Góa chiū it-tēng in-ūi I-su-la-el ê kiáⁿ-sun it-chhè ê só͘ kiâⁿ lâi khì-sak i. Che sī Siōng-chú kóng ê.
31:38 Siōng-chú kóng, " Lí khòaⁿ, ji̍t-chí teh beh kàu, chit-ê siâⁿ ē kā Siōng-chú khí-chō, tùi Ha-na-nel ê lâu kàu kak-thâu ê mn̂g.
31:39 Niû ê soh koh khan chhut-.khì, it-ti̍t kàu Ga-lep soaⁿ, oa̍t tńg-khì kàu Go-ah.
31:40 Hiat sin-si kah piàⁿ hóe-hu tī choân-pō͘ ê soaⁿ-kok kah só͘-ū ê chhân-hn̂g, it-ti̍t kàu Kit-lông khe, koh ti̍t-kàu tang pêng " Bé ê mn̂g " ê kak-thâu lóng beh chò sèng, kui tī Siōng-chú, bô koh poe̍h-chhut, bô koh chhia-tó, it-ti̍t kàu éng-oán. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。