耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
29:1 寫Phoe hō͘流亡巴比倫ê偤大人
耶利米先知tùi耶路撒冷寄phoe hō͘受掠iáu tī ·leh ê老大kah chiahê祭司、先知，以及眾人，to̍h是尼布甲尼撒tùi耶路撒冷掠到巴比倫ê。
29:2 （這是tī耶哥尼雅王、太后、太監，kah偤大、耶路撒冷ê貴族，以及工匠、鐵匠lóng離開耶路撒冷ê了後。)
29:3 Hit張phoe交託沙番ê kiáⁿ以利亞撒kah希勒家ê kiáⁿ 基瑪利帶去。Chit兩人to̍h是偤大王西底家差去巴比倫，去見巴比倫王尼布甲尼撒ê。
29:4 Phoe內ánne寫：「萬軍ê上主—以色列ê上帝對所有受掠去ê，to̍h是祂hō͘ in tùi耶路撒冷受掠去到巴比倫ê人，ánne講：
29:5 『Lín tio̍h起厝來tòa，作園來食它ê果子；
29:6 娶bó͘來生kiáⁿ兒，kā lín ê kiáⁿ娶bó͘，hō͘ lín ê chabó͘ kiáⁿ出嫁，hō͘ in生kiáⁿ兒。Án-ne thang tī hia加添真chē，無減少。
29:7 我所hō͘ lín受掠去ê hitê城，lín tio̍h圖謀它ê平安，替它對上主祈禱；因為它得tio̍h平安，lín mā ētòe它平安。
29:8 萬軍ê上主—以色列ê上帝ánne講：『 M̄-thang hō͘ lín中間ê先知kah卜卦ê引誘，mā m̄ thang信lín ê夢，to̍h是lín所夢見ê。
29:9 因為in託我ê名對lín宣布白賊話，我並無差in。這是上主講ê。』
29:10 「因為上主ánne講：『巴比倫七十年ê期限已經滿，我beh臨到lín，成我對lín所講ê好話，hō͘ lín tńg來chitê所在。
29:11 我知我對lín所存ê意思，是賞賜平安ê意思，m̄是降災禍，beh hō͘ lín ê尾景有ǹg望。
29:12 Hit時，lín會求叫我，會去對我祈禱，我ē聽lín。
29:13 Lín beh chhōe我，ē來tú tio̍h，因為lín會專心chhōe我。
29:14 我beh hō͘ lín chhōe ·tio̍h，我mā beh hō͘ lín受掠ê人倒tńg來，beh tùi我所趕lín去到ê ta̍k國、ta̍k所在聚集lín，mā beh hō͘ lín tńg來本所在，to̍h是我所hō͘ lín tùi hia受掠ê。這是上主講ê。』
29:15 「因為lín講：『上主tī巴比倫kā阮興起先知』。
29:16 Taⁿ上主講tio̍h坐大衛寶座ê王，mā講tio̍h tòa tī chitê城ê眾人，to̍h是無kah lín做伙受掠去ê兄弟，
29:17 萬軍ê上主ánne講：『你看，我beh用刀劍，用飢荒，用瘟疫臨到tī in，hō͘ in親像極bái ê無花果，bái到bē食得。
29:18 我beh用刀劍，用飢荒，用瘟疫jiok in，hō͘ in tī天下萬國流浪，tī我趕in去到ê ta̍k國，做thang咒詛，thang tio̍h驚kah gāng去，thang khau洗，thang凌辱ê。
29:19 這是因為in無遵thàn我ê話，to̍h是我差我chiahê奴僕—眾先知kā in講ê話，是我早早起來差in；總是，lín無聽。這是上主講ê。
29:20 所以，lín所有受掠去ê，to̍h是我tùi耶路撒冷差lín到巴比倫ê，lín lóng tio̍h聽上主ê話。』
29:21 「萬軍ê上主—以色列ê上帝ánne講：講tio̍h Ko-lai-iah ê kiáⁿ亞哈kah瑪西雅ê kiáⁿ西底家，in託我ê名對lín宣布白賊。你看，我beh kā in交tī巴比倫王—尼布甲尼撒ê手，伊ētī lín ê面前kā inthâi死。
29:22 偤大受掠ê群眾tī巴比倫ê，ē用chit兩人做話柄來咒詛人，講：『願上主hō͘你親像西底家kah亞哈，hō͘巴比倫王用火kā你燒。』
29:23 In tī以色列中做出見笑ê tāichì，姦淫in厝邊ê bó͘，koh託我ê名宣布白賊，是我所無命令in ê。知影tāichì ê是我，做見證ê mā是我。這是上主講ê。」
29:24 示瑪雅ê Phoe
「關係Ne-he-lâm人示瑪雅，你tio̍h講：
29:25 萬軍ê上主—以色列ê上帝ánne講：你bat用kakī ê名寄phoe hō͘耶路撒冷ê眾人kah祭司瑪西雅 ê kiáⁿ西番雅，以及所有ê祭司講：
29:26 『上主有設立你做祭司，來替祭司耶何耶大，hō͘ lín 監督上主ê殿，thang kā所有khong-khám kakī 叫做先知ê人，用柴枷kā伊枷，用鎖kā伊鎖。
29:27 Taⁿ亞拿突人耶利米對lín伊kakī 叫做先知，lín ná ē無kā伊責備？
29:28 因為伊寄phoe到巴比倫kā阮講：受掠ê時會真久長，lín tio̍h起厝來tòa，作園來食果子。』」
29:29 祭司西番雅to̍h kā chit張phoe，讀hō͘耶利米先知聽。
29:30 就ánne，上主ê話臨到耶利米講：
29:31 「你tio̍h寄phoe hō͘所有受掠ê人，講：『上主講tio̍h Ne-he-lâm人示瑪雅講：因為示瑪雅對lín宣布ê，我無差伊，伊hō͘ lín óa靠白賊；
29:32 所以，上主ánne講：我beh刑罰Ne-he-lâm人示瑪雅kah伊ê kiáⁿ孫，伊一定無留kah半個人tòa tī chiahê人民ê中間，mā無thang看tio̍h我所beh賞賜hō͘我ê人民ê福氣，因為伊講悖逆上主ê話。這是上主講ê。』」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。