耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 耶利米受審判
偤大王約西亞ê kiáⁿ約雅敬起頭坐位ê時，有chitê話tùi上主來，講：
26:2 「上主ánne講：你tio̍h khiā tī上主ê殿ê院內，有偤大chiahê城來上主ê殿敬拜ê，你tio̍h用我所有命令你對in講ê話，kā in講，m̄ thang減一句。
26:3 Kiám-chhái in肯遵thàn，ta̍k人回頭離開in ê pháiⁿ路，我to̍h為tio̍h in所行ê pháiⁿ，想beh降hō͘ in ê災禍來後悔。
26:4 你tio̍h kā in講，上主ánne講：『Lín若m̄肯聽我，來行我所設tī lín面前ê律法，
26:5 來遵thàn我所差到lín hia ê我chiahê奴僕—眾先知ê話，to̍h是我早早起來所差ê，（總是，lín無聽)；
26:6 我to̍h beh hō͘ chit間厝親像示羅，hō͘ chitê城成做地chiūⁿ萬國咒詛ê話柄。』」
26:7 耶利米tī上主ê殿內講chiahê話，祭司、先知kah眾人lóng有聽tio̍h。
26:8 耶利米kā上主吩咐伊對眾人講ê話，全部講了，祭司、先知kah眾人lóng來掠伊，講：「你一定tio̍h死！
26:9 你ná ē託上主ê名來預言，講chit間厝ē親像示羅，chitê城會拋荒，無人tòa？」就ánne，眾人lóng tī上主ê殿聚集，來到耶利米hia。
26:10 偤大ê貴族聽tio̍h chiahê tāichì，to̍h tùi王宮上到上主ê殿，坐tī上主ê殿新門ê門口。
26:11 祭司kah先知對貴族kah眾人講：「Chitê人tio̍h定伊死罪，因為伊有預言攻擊chitê城，tútú親像lín親耳所聽ê。」
26:12 耶利米to̍h對chiahê貴族kah眾人講：「上主差我預言，攻擊chit間厝kah chitê城，講起lín所有聽tio̍h chiahê一切ê話。
26:13 所以，lín taⁿ tio̍h改lín ê路kah lín ê所做，遵thàn lín ê上帝—上主ê話，上主to̍h ē後悔祂所beh降hō͘ lín ê災禍。
26:14 講tio̍h我，你看，我tī lín ê手頭；lín看做好，看做應該ê，就照ánne款待我！
26:15 總是，lín tio̍h確實知，若害死我，to̍h ēhō͘無罪ê血歸tī lín kah chitê城，以及tòa tī其中ê人民；因為上主實在有差我到lín chia，kā chiahê一切ê話傳到lín ê耳孔。」
26:16 貴族kah眾人to̍h kā祭司、先知講：「Chitê人無應該定伊死罪，因為伊是託上主—咱ê上帝ê名來對咱講話。」
26:17 國內ê老大to̍h有幾nā个人起來，對聚會ê眾人講：
26:18 「當偤大王希西家ê日，有Mó͘-leh-sa人米迦對偤大ê群眾預言，講：萬軍ê上主ánne講：錫安ē hō͘人犁親像teh犁田園；耶路撒冷ē變做土堆；chit間殿ê山ē親像樹林koân ê所在。
26:19 「偤大王希西家kah眾偤大人，kám有hō͘伊死？希西家 kám m̄是敬畏上主，懇求上主ê恩？上主kám就後悔祂所講beh降hō͘ in ê災禍？Taⁿ若害死chitê人，咱to̍h是做大pháiⁿ，會害tio̍h kakī ê性命。」
26:20 （Koh有一个人託上主ê名來宣布，是基列耶琳人示瑪雅ê kiáⁿ烏利亞，伊照耶利米一切ê話來宣布，攻擊chitê城kah chitê地。
26:21 約雅敬王kah伊ê眾勇士、貴族聽tio̍h伊ê話，王to̍h想beh hō͘伊死。烏利亞聽tio̍h就驚，走去埃及。
26:22 約雅敬王差人去埃及，to̍h是亞革波ê kiáⁿ以利拿單kah幾nā个人去到埃及。
26:23 Into̍h tùi埃及kā烏利亞掠tńg來，送到約雅敬王hia；王用刀kā伊thâi，kā伊ê身屍hiat tī平常人ê墓。）
26:24 總是，沙番ê kiáⁿ亞希甘保護耶利米，chiah無交tī人民ê手hō͘伊死。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。