出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 嗎哪kah鵪鶉
In tùi以琳出發，tī出埃及地以後，第二月十五日，以色列全會眾來到以琳kah西奈ê中間，汛ê曠野。
16:2 以色列全會眾tī曠野對摩西kah亞倫哀怨。
16:3 以色列人對in講：「M̄值tio̍h阮tī埃及地死tī上主ê手。Hit時，阮有肉滿鼎，有餅thang食到飽。Lín chhōa阮出來到chitê曠野，是beh hō͘ chiahê全會眾lóng餓死。」
16:4 上主對摩西講：「你看，我beh tùi天落米糧hō͘ lín，人民tio̍h出去，ta̍k日拾ta̍k日ê額；我thang kā in試煉，看in beh照我ê法度á m̄。
16:5 到第六日，in tio̍h kā所拾入來ê準備好勢，比ta̍k日所拾ê重倍chē。」
16:6 摩西kah亞倫對以色列人民講：「到ê-hng lín會知，chhōa lín出埃及地ê是上主。
16:7 明á早起，lín會看tio̍h上主ê榮光，因為上主有聽tio̍h lín teh哀怨祂。阮算啥物，lín竟然對阮哀怨？」
16:8 摩西koh講：「上主ê-hng時ē hō͘ lín食肉，早起時ē hō͘ lín食餅到飽，因為lín哀怨上主，祂lóng有聽tio̍h。阮算啥物？Lín m̄是哀怨阮，是teh哀怨上主。」
16:9 摩西對亞倫講：「你tio̍h kā以色列全會眾講：『Lín tio̍h來上主ê面前，因為祂已經聽tio̍h lín ê哀怨à。』」
16:10 亞倫tútú teh對以色列全會眾講話ê時，in ǹg曠野teh看，你看，上主ê榮光tī雲中顯現。
16:11 上主對摩西講：
16:12 「我已經聽tio̍h以色列人ê哀怨，你tio̍h kā in講：『到黃昏ê時，lín會食肉，早起ē有餅thang食飽，lín to̍h知我是上主—lín ê上帝。』」
16:13 到ê-hng有鵪鶉（ian-thun）飛來，遮蓋營房；天光早起，tī營房四箍圍ê地面有真重ê露水。
16:14 露水乾ê時，你看，曠野ê地面有細細圓圓ê物，細kah親像霜。
16:15 以色列人看tio̍h，m̄知he是啥物，大家做伙講：「這是啥物？」摩西kā in講：「這to̍h是上主hō͘ lín食ê餅。
16:16 上主所吩咐ê是ánne：Lín tio̍h照ta̍k人所食ê量來拾，ta̍k人為伊布棚內ê人，照伊ê人額來拾，一个人一俄梅珥。
16:17 以色列人照ánne行，有ê拾chē，有ê拾少。
16:18 到用俄梅珥來量，拾chē ·ê無chhun，拾少ê mā無欠，ta̍k人照in食ê量來拾。
16:19 摩西kā in講：「人m̄ thang kā所chhun ·ê留到隔工早起。」
16:20 總是，in無聽摩西ê話，有人留到隔工早起，to̍h生蟲發出臭味；摩西對in受氣。
16:21 In ta̍k早起，照ta̍k人食ê量來拾，日頭一下曝，就熔去。
16:22 到第六日，in拾重倍ê額，ta̍k人兩俄梅珥。全會眾hiahê頭人來kā摩西講；
16:23 摩西kā in講：「上主ánne講：明á載是重要ê安息，to̍h是服事上主聖ê安息日。Lín ài煏ê就煏，ài煮ê就煮，所chhun ·ê，tio̍h kakī 收teh，留到隔工早起。」
16:24 In就照摩西所吩咐收teh，留到隔工早起，mā無臭味，內面mā無蟲。
16:25 摩西講：「Lín今á日食chitê，因為今á日是服事上主ê安息日；今á日lín tī田野一定chhōe無。
16:26 Lín六日間thang拾，第七日是安息日，hit日to̍h無thang拾。」
16:27 第七日，有人出去拾，mā chhōe無。
16:28 上主對摩西講：「Lín m̄肯守我ê命令、我ê律法，beh到tang時？
16:29 Lín tio̍h看，上主已經kā安息日賞賜hō͘ lín，所以，第六日祂hō͘ lín兩日ê米糧，第七日ta̍k人tio̍h tiàm kakī ê所在，lóng m̄ thang出去。」
16:30 就ánne，人民to̍h tī第七日安息。
16:31 Chitê物，以色列人kā它叫做嗎哪，款式親像芫荽（iân-sui）仁，色緻是白ê，滋味親像chham蜜ê餅。
16:32 摩西講：「上主ánne吩咐：『Τio̍h kā一俄梅珥 tīⁿ-tīⁿ ê嗎哪，留到lín ê後代，hō͘ in看我hit當時chhōa lín出埃及地，tī曠野所hō͘ lín食ê餅。』」
16:33 摩西kā亞倫講：「你the̍h一个器具，貯一俄梅珥 tīⁿ-tīⁿ ê嗎哪，khǹg tī上主ê面前，留到lín ê後代。」
16:34 亞倫照上主所吩咐摩西ê，kā嗎哪 hē tī見證ê約櫃前留teh。
16:35 以色列人食嗎哪總共四十年，一直到in來到tī有人tòa ê所在。In食嗎哪，一直到in入去迦南ê境界。
16:36 （一俄梅珥to̍h是伊法 ê十分之一。）
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。