出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 過紅海
上主kā摩西講：
14:2 「你吩咐以色列人oa̍t倒tńg，紮營tī Pí-hap-hi-lio̍k ê頭前，tī密奪kah海ê中間，tī Pa-le̍k-sé-hun ê頭前，tī hit對面紮營tī海邊。
14:3 法老會議論以色列人講：『In tī hia se̍h無路，曠野kā in圍困teh。』
14:4 我beh hō͘法老ê心硬，伊ējiok in，我to̍h tī法老kah伊ê軍隊來得tio̍h榮光，埃及人to̍h知我是上主。」In就ánne行。
14:5 有人報埃及王講：「Hiahê人民走去à。」法老kah伊ê人臣對待hitê人民ê心to̍h變換，講：「咱准以色列人離開，無koh服事咱，這是啥物緣故？」
14:6 法老就準備伊ê車，chhōa伊ê人民做伙去，
14:7 mā帶六百台特別ê車kah埃及所有ê車，ta̍k台車lóng有兵頭teh管。
14:8 上主hō͘埃及王法老ê心硬，伊to̍hjiok以色列人，m̄ koh，以色列人靠大權能ê手出去。
14:9 埃及人jiok in，法老所有ê馬、車kah伊ê馬兵，以及伊ê軍隊，to̍h tī海邊óa近Pí-hap-hi-lio̍k，tī Pa-le̍k-sé-hun ê對面，tī以色列人紮營ê所在，jiok tio̍h in。
14:10 法老近óa ê時，以色列人gia̍h頭看tio̍h埃及人jiok óa來，to̍h真驚，大聲喉叫上主。
14:11 群眾對摩西講：「Kám是埃及無墓地，你chiah chhōa阮出來死tī曠野？你ná ē ánne款待阮，chhōa阮出埃及？
14:12 阮tī埃及kám無對你ánne講：m̄ thang chhap阮，chhut-chāi阮服事埃及人？因為服事埃及人，khah值得死tī曠野。」
14:13 摩西對群眾講：「M̄免驚，做lín khiā ·leh，看上主今á日為tio̍h lín所beh行ê拯救，因為lín今á日所看tio̍h ê埃及人，一定永遠無koh看tio̍h。
14:14 上主ē為lín交戰，做lín恬恬，mài出聲。」
14:15 上主對摩西講：「你án怎大聲teh 對我喉叫？你tio̍h kah以色列人進前去。
14:16 你gia̍h 柺á伸手kí海，來kā海分開。以色列人beh tī海中行乾地。
14:17 獨獨我，我beh hō͘埃及人ê心硬，in ētòe lín落去。我beh tī法老kah伊ê軍隊、伊ê車、伊ê馬兵，來得tio̍h榮光。
14:18 我tī法老kah伊ê車、伊ê馬兵，得tio̍h榮光ê時，埃及人to̍h知我是上主。」
14:19 上帝ê使者本來行tī以色列ê營前ê，徙來行tī in ê後面；雲柱mā tùi in ê頭前，徙來khiā tī in ê後面。
14:20 Τī埃及營kah以色列營ê中間，hit-pêng有雲有烏暗，chit pêng暗時發出光，kui暝兩pêng bē相近óa。
14:21 摩西to̍h伸手kí海，上主kui暝hō͘東風大起，hō͘海水退去，水就分開，海to̍h成做乾地。
14:22 以色列人落去海中行乾地，水tī in ê雙pêng成做牆壁。
14:23 埃及人jiok in，法老所有ê馬、車kah馬兵，lóng tòe in落去海中。
14:24 到天beh光ê時，上主tùi雲kah火ê柱中àⁿ落，看埃及ê軍隊，phah亂in ê隊伍；
14:25 koh hō͘ in ê車輪lak去，oh得行，致使埃及人講：「咱tio̍h tùi以色列人ê面前逃走，因為上主為tio̍h in teh kah埃及人交戰。」
14:26 上主kā摩西講：「你伸手kí海，hō͘水倒tńg來淹埃及人kah in ê車、in ê馬兵。」
14:27 摩西to̍h伸手kí海，到天一下光，海水koh照舊。埃及人想beh逃走，水閘（cha̍h）tī in ê頭前，上主to̍h kā埃及人chhia倒tī海中。
14:28 水就反流，淹密hiahê車kah馬兵。法老ê軍隊tòe以色列人落海ê，連一个mā無留teh。
14:29 總是，以色列人tī海中行乾地，水tī in ê雙pêng成做in ê牆壁。
14:30 Hit日，上主ánne救以色列人脫離埃及人ê手，以色列人看tio̍h埃及人ê身屍tī海邊。
14:31 以色列人看tio̍h上主對埃及人所行ê大事，就敬畏上帝，koh信服上主kah祂ê奴僕摩西。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。