出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Pôaⁿ過節
上主tī埃及地對摩西kah亞倫講：
12:2 「Chit月tio̍h做lín ê正月，做每年ê頭一个月。
12:3 Lín tio̍h對以色列ê全會眾講：「本月初十，做老父ê tio̍h為全家ê人取羊á，一家一隻。
12:4 若是一家ê人siuⁿ少，一隻羊á食bē了，伊tio̍h kah厝邊，照人額做伙取一隻。Lín準備羊á，tio̍h按算ta̍k人所會食ê量。
12:5 Lín ê羊á tio̍h無缺點ê，未滿年ê羊káng-á，lín tio̍h tùi綿羊中á是山羊中，lóng thang。
12:6 Lín tio̍h留到本月十四日，黃昏ê時，以色列全會眾人lóng tioh8thâi羊á。
12:7 In tio̍h取淡薄á血，抹tī食羊á hit間厝ê雙pêng ê門框 kah門楣。
12:8 Hit暝，tio̍h食用火逼ê羊á肉，kah無酵餅、苦菜chham-teh食。
12:9 M̄-thang生食，絕對m̄ thang用水煮，tio̍h用火煏，頭、腳kah五臟lóng tio̍h食。
12:10 Lóng m̄ thang留隔暝，若留到隔工早起，tio̍h用火燒掉。
12:11 Lín tio̍h ánne食，腰縖帶，腳穿鞋，手gia̍h 柺á，mā tio̍h趕緊食。這是上主ê Pôaⁿ過節。
12:12 「因為hit暝我beh遍行埃及地，phah死埃及地所有頭水生ê，無論人á是chengseⁿ，koh beh審判埃及所有ê神明。我to̍h是上主。
12:13 Chitê血tī lín所tòa ê厝，beh做lín ê記號；我一下看tio̍h chitê血，to̍h ētùi lín pôaⁿ過去。我phah埃及地ê時，災禍bē臨到lín來kā lín毀滅。
12:14 Lín tio̍h用chit日做記念，做上主ê節來守，lín tio̍h代代守chitê節，做永遠ê例。
12:15 無酵節
上主koh講：「Lín tio̍h食無酵餅七日，頭一日tio̍h tùi lín ta̍k間厝kā酵除去，因為tùi頭一日到第七日，所有食有酵ê，ē tùi以色列中除去。
12:16 頭一日，lín tio̍h有聖會，第七日mā tio̍h有聖會。Chit兩日，除去準備ta̍k人所tio̍h食ê以外，無論啥物工lóng m̄ thang做。
12:17 Lín tio̍h守無酵節，因為我tútú tī hit日chhōa lín ê軍隊tùi埃及地出來。所以，lín tio̍h守chit日，ta̍k世代做永遠ê例。
12:18 Tùi正月十四ê-hng到二一ê-hng，lín tio̍h食無酵餅。
12:19 Tī lín ta̍k間厝，七日內m̄ thang有酵，因為見若食有酵ê物，無論是寄腳ê á是本地ê，hitê人tio̍h tùi以色列會中除去。
12:20 有酵ê物，lín lóng m̄ thang食，tī lín所有tòa ê所在，tio̍h食無酵餅。」
12:21 第一pái ê Pôaⁿ過節
摩西to̍h叫以色列眾長老來，kā in講：「Lín ta̍k人tio̍h照家口取羊á，kā牠thâi來做Pôaⁿ過節。
12:22 Lín tio̍h the̍h一把ê牛膝草，ùn盆內ê血，用盆內ê血抹門楣kah雙pêng ê門框，lín無論啥人lóng m̄ thang tùi伊ê厝出門，一直到明á早起。
12:23 因為上主beh遍行，phah死埃及人，祂看tio̍h血tī門楣kah雙pêng ê門框，上主to̍h ēpôaⁿ過hitê門，m̄准滅性命ê入去lín ê厝，來phah死lín。
12:24 Chitê tāichì lín tio̍h遵守，做lín kah lín ê kiáⁿ孫永遠ê例。
12:25 後來，lín來到上主照祂所應允賞賜hō͘ lín hitê地，to̍h tio̍h守chitê禮儀。
12:26 Lín ê kiáⁿ兒若問lín：『是án怎行chitê禮儀？』
12:27 Lin2to̍h tio̍h講：『這是上主Pôaⁿ過節ê祭，當以色列人tī埃及ê時，上主phah死埃及人，pôaⁿ過以色列人ê厝，救咱大家。』」就ánne，人民àⁿ頭敬拜。
12:28 以色列人to̍h照ánne行，上主所吩咐摩西kah亞倫ê，in照ánne去行。
12:29 頭胎ê long2thâi
到半暝，上主kā埃及地所有ê大kiáⁿ，to̍h是tùi坐位ê法老ê大kiáⁿ到監犯ê大kiáⁿ，以及頭水生ê chengseⁿ，全部thâi死。
12:30 法老kah所有ê人臣，以及埃及ê群眾，暗時lóng起來，tī埃及有大啼哭ê聲，因為無一家無死人。
12:31 法老透暝召摩西kah亞倫來，講：「起來！叫以色列人tio̍h tùi我ê人民中間出去，照lín所講ê，去服事上主！
12:32 Μā照lín所講ê，連羊群、牛群lóng帶帶去，mā tio̍h kā我祝福。」
12:33 埃及人迫人民，叫in趕緊離開in ê地，講：「阮lóng死à。」
12:34 人民就the̍h無酵ê生麵，kā chhiau麵ê器具包tī衫á內，揹tī肩胛頭頂。
12:35 以色列人照摩西ê話行，tùi埃及人討銀器、金器kah衫褲。
12:36 上主hō͘人民tī埃及人ê面前得tio̍h恩典，照in所討ê hō͘ in。就ánne，in去搶埃及人。
12:37 以色列人離開埃及
以色列人tùi蘭塞去疏割，除gín-á以外，行路ê大人約有六十萬。
12:38 Koh有真chē雜族ê人，mā有羊群、牛群、真chē chengseⁿ kah in做伙去。
12:39 In用tùi埃及帶出來ê生麵煏做無酵餅，無發酵，是因為受逼出埃及，bē tàng延chhiân得，mā無為kakī 準備啥物食物。
12:40 以色列人出外tī埃及，總共四百三十年。
12:41 到四百三十年滿，tútú hit日，上主ê軍隊lóng tùi埃及地出來。
12:42 Chit暝，tio̍h為上主來守做記念日，因為祂chhōa in出埃及地。這是上主ê暝，是以色列人民代代所tio̍h守ê記念日。
12:43 Pôaⁿ過節ê規定
上主對摩西kah亞倫講：「Pôaⁿ過節ê例是ánne：外邦人lóng m̄ thang食Pôaⁿ過節。
12:44 獨獨ta̍k人用銀買來ê奴僕已經kā伊行割禮ê，to̍h thang食。
12:45 寄腳ê kah倩工lóng m̄ thang食。
12:46 Tio̍h tī一間厝內食，一塊肉mā m̄ thang帶出去厝外，牠ê骨一支mā m̄ thang phah斷。
12:47 以色列人全會眾lóng tio̍h守chitê節。
12:48 若有外族人出外tī lín中間，ài守Pôaⁿ過節來服事上主，伊所有ê chapo͘人tio̍h受割禮，然後伊to̍hthang來守chitê節，to̍h kah本族ê人無各樣；總是，無受割禮ê人lóng m̄ thang守chitê節。
12:49 本族ê人kah外族ê人出外tī lín中間，lóng仝相siâng ê例。
12:50 以色列人民就ánne行，照上主所吩咐摩西kah亞倫ê去做。
12:51 當hit日，上主chhōa以色列人，照in ê軍隊，出埃及地。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。