出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 草蜢ê災難
上主對摩西講：「你入去見法老，因為我已經hō͘伊ê心，kah伊ê人臣ê心giám硬，thang hō͘我顯明我chiahê神跡tī in中間，
10:2 mā ē hō͘你kā我tī埃及所做ê tāichì，kah我tī in中間所行chiahê神跡，傳hō͘你ê kiáⁿ孫聽，thang hō͘ lín知我是上主。」
10:3 摩西kah亞倫to̍h去見法老，kā伊講：「上主—希伯來人ê上帝ánne講：『你tī我ê面前m̄肯kakī 謙卑，beh到tang時？你tio̍h准我ê子民離開，hō͘ in來服事我。
10:4 你若m̄肯hō͘我ê人民離開，你看，明á載我beh hō͘草蜢入去你ê境內，
10:5 In會遮蓋地面，致使看bē tio̍h土，koh ē食hitê tùi災禍所chhun落來ê，to̍h是雹所phah無了ê，mā ē食田裡為lín所發一切ê樹木。
10:6 草蜢會充滿你ê厝，kah你ê眾人臣ê厝，以及所有埃及人ê厝，tùi你ê老父kah你ê祖先出世到taⁿ，m̄ bat看tio̍h ánne。』」摩西to̍h oa̍t-tńg身，離開法老出去。
10:7 法老ê人臣對伊講：「Chitê人做咱ê羅網，ē到tang時chūn？Tio̍h准chiahê人去服事上主—in ê上帝！埃及已經敗壞，你kám m̄知？」
10:8 就ánne，摩西kah亞倫受召倒tńg來見法老，法老kā in講：「Lín去服事上主—lín ê上帝；獨獨hiahê想 beh去ê，到底是啥物款人？」
10:9 摩西講：「阮beh kah阮ê少年人、老人去，mā beh chhōa阮ê kiáⁿ兒kah阮ê羊群、牛群做伙去，因為阮tio̍h守上主ê節。」
10:10 法老對in講：「好là，我准lín kah lín ê gín-á去！願上主kah lín同在，lín tio̍h謹慎，災禍已經tī lín ê目chiu 前ā！
10:11 Án-ne bē做得，kantaⁿ lín chiahê大人thang去服事上主，因為這是lín所求ê。」to̍h tùi法老ê面前kā in趕出去。
10:12 上主kā摩西講：「你伸手kí埃及地，hō͘草蜢起來埃及地，食地裡一切ê菜蔬，to̍h是雹phah無了ê。」
10:13 摩西to̍h伸伊ê柺á，kí埃及地。上主to̍h hō͘東風kui日kui暝吹tī地裡。到明á早起，東風to̍h kā草蜢吹來。
10:14 草蜢起來埃及全地，歇tī埃及ê四箍圍，厲害到極。早前無有ánne ê草蜢，以後mā bē koh ánne。
10:15 因為in遮蓋全地，致使地lóng烏暗，koh食地chiūⁿ一切雹所phah無了ê菜蔬kah樹裡ê果子。埃及全地，無論樹木á是田裡ê菜蔬，無留kah一項青翠ê物。
10:16 就ánne，法老趕緊叫摩西kah亞倫來，講：「我得罪lín ê上帝—上主，mā得罪lín。
10:17 Taⁿ求你koh一pái赦免我ê罪，求lín ê上帝—上主hō͘我脫離chit pái ê死亡。」
10:18 摩西to̍h離開法老，去求上主。
10:19 上主就掃真透ê西風kā草蜢吹起來，趕入去紅海，無留kah一隻草蜢tī埃及ê四箍圍。
10:20 總是，上主hō͘法老ê心硬，m̄准以色列人離開。
10:21 烏暗ê災難
上主kā摩西講：「你伸手ǹg天，hō͘埃及地烏暗，chitê烏暗會烏kah bē摸得。
10:22 摩西to̍h伸手ǹg天，埃及to̍h全地三日烏烏暗暗。
10:23 Chit三日，人看bē tio̍h人，mā無起來離開伊ê所在；獨獨以色列人ê厝lóng有光。
10:24 法老to̍h叫摩西來講：「Lín去服事上主；獨獨lín ê羊群、牛群tio̍h留teh，lín ê gín-a2to̍h thang kah lín做伙去。」
10:25 摩西講：「你mā tio̍h kā牲禮kah燒祭ê物交阮ê手，hō͘阮thang祭祀上主—阮ê上帝。
10:26 阮ê chengseⁿ mā tio̍h kah阮做伙去，連一隻mā 無beh留teh，因為阮tio̍h tùi hit中間取來服事上主—阮ê上帝。阮koh iáu未到hia，mā m̄知tio̍h用啥物來服事上主。」
10:27 總是，上主hō͘法老ê心硬，m̄肯hō͘ in離開。
10:28 法老kā摩西講：「你tio̍h離開我去，你tio̍h kakī 謹慎，m̄ thang koh再來見我ê面，因為你koh再見我ê面hit日，你ē死。」
10:29 摩西講：「你ánne講，好！我無beh koh再見你ê面ā。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。