創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 大水災
上主對挪亞講：「你kah你全家lóng tio̍h入大船，因為tī chit世代ê中間，我看tio̍h你tī我ê面前是義人。
7:2 見若清氣ê chengseⁿ，你tio̍h帶七隻公ê，七隻母ê；無清氣ê chengseⁿ，你tio̍h帶一隻公ê，一隻母ê。
7:3 天頂ê鳥mā tio̍h帶，七隻公ê，七隻母ê，thang留in ê種活tī全地。
7:4 因為koh過七日，我beh落雨tī地chiūⁿ，四十工四十暝。我beh kā我所造ta̍k種ê活物lóng tùi地chiūⁿ剿滅。」
7:5 挪亞就照上主所kā伊命令ê，全部去行。
7:6 當大水氾濫tī地chiūⁿê時，挪亞六百歲。
7:7 挪亞to̍h kah伊ê kiáⁿ，伊ê bó͘，伊ê新婦，lóng入去大船，閃避大水。
7:8 清氣ê chengseⁿ kah無清氣ê chengseⁿ，飛鳥kah地chiūⁿ一切ê蟲thōa，
7:9 lóng一對一對，有公ê有母ê，來到挪亞hia，進入大船；tú照上主命令挪亞ê。
7:10 過七日了後，大水氾濫tī地chiūⁿ。
7:11 當挪亞六百歲，二月十七日，hit日深淵ê水源lóng裂開，天mā破隙。
7:12 四十工四十暝，落雨tī地面上。
7:13 Tú-tú hit日，挪亞kah伊ê kiáⁿ—閃、含、雅弗kah挪亞ê bó͘，以及伊三个新婦lóng入去大船；
7:14 in kah百獸各照牠ê類，一切ê chengseⁿ各照牠ê類，一切tī地chiūⁿ趖（sô）ê蟲thōa各照牠ê類，一切有翼ê各照牠ê類，一切ê飛鳥各照牠ê類，lóng進入大船。
7:15 見若肉體內面有活氣ê，lóng一對一對，來到挪亞hia，入去大船。
7:16 見若入去大船ê，lóng是有公有母ê肉體，tú照上帝所命令ê。上主to̍h kā in關tī大船內。
7:17 大水氾濫tī地chiūⁿ四十工；水漲ná koân，hō͘大船chhèng浮，船to̍h離地。
7:18 水勢真大，tī地chiūⁿ直直漲起來；船漂流tī水面。
7:19 水勢tī地chiūⁿ非常大，天下ê高山lóng hō͘大水淹密。
7:20 水勢比山加漲高十五肘；山lóng hō͘大水淹密。
7:21 見若tī地chiūⁿ有肉體ê動物，to̍h是飛鳥、chengseⁿ、走獸，kah一切tī地chiūⁿ趖（sô）ê蟲thōa，以及所有ê人類lóng死。
7:22 見若tī乾地有鼻孔喘氣ê生靈lóng死。
7:23 見若地chiūⁿ一切ê活物lóng受剿滅；人kah chengseⁿ、蟲thōa，以及空中ê飛鳥，in lóng tùi地chiūⁿ受剿滅，只有挪亞chham hiahê kah伊tī船裡ê留teh。
7:24 水勢真大，tī地chiūⁿ經過一百五十工。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。