傳道書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 我心內想講：「來！我用歡喜kā你試探，你thang享受安樂。」你看，這mā是空虛。
2:2 講tio̍h好笑，我to̍h講：「這是顛狂」；講tio̍h歡喜，我to̍h講：「這beh chhòng啥？」
2:3 我用心講究走chhōe tio̍h án怎用酒hō͘我ê肉體khùiⁿ活；總是，我ê心猶原tio̍h hō͘智慧引chhōa；我mā 走chhōe tio̍h án怎擒tiâu愚戇，thèng候我看清楚，世間人tī天下，tī伊短短ê一生tio̍h行啥物tāichì chiah好。
2:4 我為tio̍h kakī 興起大ê工程，為kakī 起厝，為kakī 栽葡萄園。
2:5 我為kakī 修造花園kah果子園，tī hit內面栽種ta̍k種ê果子樹。
2:6 我為kakī 開水池，來灌ak培養生長ê樹林。
2:7 我mā買奴僕kah女婢，mā有出世tī我厝內ê，mā有真chē牛群kah羊群，贏過我以前tī耶路撒冷hiahê人所有ê。
2:8 我koh為kakī 積聚金銀，kah列王以及ta̍k省ê財寶，koh得tio̍h唱歌ê男女，kah世間人所歡喜ê物，koh有真chē宮妃。
2:9 Án-ne，我to̍h做大，贏過我以前所有tòa tī耶路撒冷ê人。而且，我ê智慧mā猶原kah我同在。
2:10 我ê目chiu 所意愛ê，我無kā它阻擋；我ê心所歡喜ê，我無kā它禁止。因為我ê心為tio̍h我所勞苦ê來快樂；這to̍h是我tùi所有ê勞苦來得tio̍h ê份額。
2:11 我看我ê手所做一切ê工，以及我所經歷ê勞苦；你看，這lóng是空虛，lóng是teh掠風，tī日光ê下面lóng無利益。
2:12 我kakī oa̍t tńg來看智慧、顛狂kah愚戇；tī君王後輩ê人iáu ē tàng做啥物？to̍h是早前已經做過ê tāichì niā-niā。
2:13 Án-ne，我to̍h看出智慧贏過愚戇，親像光明贏過烏暗。
2:14 智慧ê人ê目chiu 光明，愚戇ê人行tī烏暗。總是，我知in ê結局lóng相仝。
2:15 我to̍h心內想講：「戇人所tú ·tio̍h ê，我mā ē ánne tú ·tio̍h；我kám m̄免比in khah有智慧？」我心內想講：「這mā是空虛。」
2:16 智慧ê人kah愚戇ê人仝款無得tio̍h人永遠ê記念，因為到將來ê日lóngē hō͘人bē記得。害ah！智慧ê人死去kah愚戇ê人無啥物無仝。
2:17 所以，我怨身慼命，因為tī日光ê下面所做ê工lóng是hō͘我勞苦；因為這lóng是空虛，lóng是掠風。
2:18 我怨恨我一切ê勞碌，to̍h是我tī日光ê下面所勞碌ê；因為我tio̍h留hō͘我以後ê人。
2:19 Hitê人是智慧á是愚戇，啥人ē知？而且我tī日光ê下面，用智慧勞碌所做成ê，伊ē kā它管轄。這mā是空虛。
2:20 因為ánne，我倒tńg去想，為tio̍h我tī日光ê下面ê勞碌hō͘我真失望。
2:21 因為有人用智慧、智識、本事來勞碌，總是，伊tio̍h kā一切留hō͘ hiahê m̄ bat勞碌ê人做產業。這mā是空虛，mā是大不幸。
2:22 因為人tī日光ê下面勞碌勞心，有得tio̍h啥物？
2:23 因為伊一生憂悶操心，伊ê勞碌成做痛苦，連暗時心神mā無安息。這mā是空虛。
2:24 人不如來食來lim，koh hō͘心享受伊所勞苦ê成果。我看，chitê mā是出tī上帝ê手。
2:25 講tio̍h lim食á是享福，啥人ē贏過我？
2:26 因為上帝所歡喜ê人，祂to̍h hō͘伊有智慧、智識kah快樂；獨獨有罪ê人祂hō͘伊勞苦來收集、來積聚，thang歸tī上帝所歡喜ê人。這mā是空虛，mā是掠風。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。