出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 田蛤á ê災難
上主kā摩西講：「你入去見法老，kā伊講：『上主ánne講：准我ê子民離開，thang服事我。
8:2 你若m̄准in離開，你看，我beh hō͘田蛤á phah-pháiⁿ你ê境內。
8:3 河會生湠田蛤á，in ē起來入去你ê宮殿，你ê睏房，上你ê眠床，入去你ê人臣ê厝，上你ê人民ê身軀，入去你ê灶孔kah你chhiau麵ê器具。
8:4 Koh會上去你kah你ê人民，以及你眾人臣ê身軀。』」
8:5 上主對摩西講：「你kā亞倫講：『你ê手gia̍h 柺á，伸tī江、河kah池ê頂面，hō͘田蛤á起來埃及地。』」
8:6 亞倫to̍h伸伊ê手tī埃及chiahê水ê頂面，田蛤a2to̍h起來遮蓋全埃及地。
8:7 博士用in ê邪術mā ánne做，hō͘田蛤á起來埃及地。
8:8 法老叫摩西kah亞倫，講：「請lín求上主hō͘ chiahê田蛤á離開我kah我ê人民，我to̍h准chiahê人民thang去祭祀上主。」
8:9 摩西對法老講：「我遵照你ê意思，我tio̍h為你kah你ê人臣，以及你ê人民，祈求tī tang時thang除滅田蛤á來離開你kah你hiahê厝，只有留tī河裡？」
8:10 法老講：「明á載。」摩西講：「Τhang照你ê話，hō͘你知阮ê上帝—上主無一个ē比並得。
8:11 田蛤á會離開你kah你hiahê厝，kah你ê人臣，以及你ê人民，只有留tī河裡。」
8:12 摩西kah亞倫離開法老出去，摩西為tio̍h祂所差來害法老ê田蛤á，求叫上主。
8:13 上主就照摩西ê話來行，見若tī厝內、院中、田裡ê田蛤á lóng死。
8:14 人kā in拾kui堆，全地lóng臭味。
8:15 法老看tio̍h災禍有khah減輕，to̍h koh硬伊ê心，m̄聽in ê話，tútú照上主所講ê。
8:16 蝨母ê災難
上主對摩西講：「你kā亞倫講：『伸出你ê柺á，phah地裡ê土沙粉，hō͘它tī埃及全地變做蝨母。』」
8:17 In就ánne做，亞倫gia̍h 柺á，伸手phah地裡ê土沙粉，to̍h tī人kah chengseⁿ ê身軀lóng有蝨母，地裡ê土沙粉tī埃及全地lóng變做蝨母。
8:18 博士mā用in ê邪術照ánne做，ài生出蝨母，總是，無法度。Hit時，就ánne，tī人kah chengseⁿ ê身軀lóng有蝨母。
8:19 博士對法老講：「這是上帝ê手段。」法老ê心硬，m̄聽in ê話，tútú照上主所講ê。
8:20 胡蠅ê災難
上主kā摩西講：「你透早起來，你看，法老beh到水邊，你khiā tī伊ê面頭前，kā伊講：『上主ánne講：准我ê子民離開，thang來服事我。
8:21 你若m̄准我ê人民去，我beh差kui陣ê胡蠅到你kah你ê人臣hia，以及你ê人民，mā ē入去你hiahê厝，koh有埃及人ê厝kah in所tòa ê所在，lóng ē有kui陣ê胡蠅滿滿。
8:22 當hit日，我ē分別我ê人民所tòa ê歌珊地，tī hia bē有kui陣ê胡蠅，thang hō͘你知影我tī天下做上主。
8:23 我ē分別我ê人民kah你ê人民，明á載ē有chitê神跡。』」
8:24 上主ánne做，to̍h有胡蠅kui大陣來入法老ê宮殿kah伊ê人臣ê厝，以及埃及全地；地因為chiahê kui陣ê胡蠅來受敗壞。
8:25 法老叫摩西kah亞倫來，講：「Lín去，tī chitê地祭祀lín ê上帝！」
8:26 摩西講：「Án-ne做無適合，因為阮ē用埃及人所討厭ê物祭祀上主—阮ê上帝；阮若tī埃及人ê目chiu 前，用in所討厭ê物來獻祭，in kám bē用石頭kā阮tìm？
8:27 阮beh去曠野，行三日ê路程，祭祀阮ê上帝—上主，照祂所吩咐阮ê。」
8:28 法老講：「我ē准lín去，tī曠野祭祀上主—lín ê上帝，獨獨m̄ thang去遠，lín tio̍h替我祈禱。」
8:29 摩西講：「我beh tùi你chia出去，mā beh求上主hō͘ kui陣ê胡蠅明á載離開法老kah伊ê人臣，以及伊ê人民；總是，法老m̄ thang koh詭詐，m̄准人民離開去祭祀上主。」
8:30 摩西to̍h tùi法老hia出去，對上主祈禱。
8:31 上主就照摩西ê話行，hō͘ kui陣ê胡蠅離開法老kah伊ê人臣，以及伊ê人民，無留kah半隻。
8:32 Chit pái法老koh硬伊ê心，m̄准人民離開。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。