出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 上主對摩西講：「你看，我beh hō͘你tī法老ê面前kahná上帝，hō͘你ê阿兄亞倫做你ê先知。
7:2 見若我所吩咐你ê，你lóng tio̍h講。你ê阿兄亞倫tio̍h對法老講，hō͘伊准以色列人離開伊ê地。
7:3 我beh hō͘法老ê心硬，mā beh tī埃及地行我真chē ê神跡奇事。
7:4 總是，法老無beh聽lín ê話，我ē伸我ê手tī埃及，用大ê審判chhōa我ê軍隊，我ê子民—以色列人出埃及地。
7:5 我伸我ê手tī埃及，chhōa以色列人tùi in中間出來ê時，埃及人to̍h ē知我是上主。」
7:6 摩西kah亞倫就照ánne去做，上主án怎kā in吩咐，in to̍h照ánne去做。
7:7 In kah法老講話ê時，摩西八十歲，亞倫八十三歲。
7:8 亞倫ê柺á
上主對摩西kah亞倫講：
7:9 法老若對lín講：『Lín tio̍h行一件奇事來看māi一下。』你tio̍h對亞倫講：『Gia̍h你ê柺á來hiat tī法老ê面前，hō͘它變做蛇。』」
7:10 摩西kah亞倫入去見法老，就照上主所吩咐ê去做。亞倫kā伊ê柺á hiat tī法老kah伊ê人臣面前，柺a2to̍h變做蛇。
7:11 法老mā召智慧ê人kah司公來，in是埃及ê星象家，mā用in ê邪術照ánne作法。
7:12 In ta̍k人hiat in ê柺á，lóng變做蛇；總是，亞倫ê柺á kā in ê柺á吞食落去。
7:13 法老ê心硬，無beh聽in，tútú照上主所講ê。
7:14 埃及Tú tio̍h災難—血ê災難
上主對摩西講：「法老ê心固執，伊m̄准人民離開。
7:15 天光早起，你去見法老，你看，伊出去水邊，你tio̍h khiā tī河邊等伊，你ê手tio̍h gia̍h hit支變蛇ê柺á，
7:16 對伊講：『上主—希伯來人ê上帝差我來見你，講：准我ê子民離開，thang tī曠野服事我。你看，到taⁿ你iáu m̄聽話。
7:17 上主ánne講：你ētùi chit件事來知我是上主。你看，我beh用我手裡ê柺á phah河中ê水，水to̍h ē變做血；
7:18 河裡ê魚ē死，河水mā ē變臭味，埃及人to̍h ē討厭lim河ê水。』」
7:19 上主對摩西講：「你tio̍h kā亞倫講：『Gia̍h你ê柺á，伸你ê手tī埃及chiahê水ê頂面，to̍h是tī in ê江、河、池kah所有ê水窟頂面，hō͘ in lóng變做血。Tī埃及全地，無論柴ê器具，á是石ê器具lóng ē有血。』」
7:20 摩西kah亞倫就ánne做，照上主所吩咐ê，tī法老kah伊ê人臣ê面前gia̍h起柺á，phah河裡ê水，河裡ê水to̍h lóng變做血。
7:21 河裡ê魚lóng死，河水mā起臭味，埃及人bē tàng lim河裡ê水，埃及ê全地lóng有血。
7:22 埃及ê星象家mā用in ê邪術照ánne行，法老ê心硬，m̄聽in，tútú照上主所講ê。
7:23 法老tńg去伊ê宮內，chitê tāichì伊mā無掛心。
7:24 埃及人tī河ê雙pêng掘地，ài beh得tio̍h水thang lim，因為河ê水in bē lim得。
7:25 上主phah河了後經過七工。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。