出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 上帝對摩西講：「我所beh對付法老ê，taⁿ你ē看tio̍h，因為用權能ê手，伊ē准in去，koh用權能ê手，伊ē趕in出伊ê地。」
6:2 上主呼召摩西
上主koh對摩西講：「我to̍h是上主。
6:3 我是全能上帝，出現tī亞伯拉罕、以撒、雅各；總是，我ê名叫做耶和華，我m̄ bat hō͘ in bat我。
6:4 我koh kah in立我堅固ê約，beh kā in所tòa過ê迦南地賞賜hō͘ in，to̍h是in寄腳ê地。
6:5 我mā有聽tio̍h以色列人哀聲吐氣，to̍h是埃及人督in做苦工，我mā ē記念我ê約。
6:6 所以，你tio̍h kā以色列人講：『我是上主，我ētùi埃及人所hō͘ lín擔（taⁿ）ê重擔chhōa lín出來，koh beh救lín脫離in所hō͘ lín做ê苦工。我mā ē用伸出來ê手kah大ê審判來救贖lín。
6:7 我mā ē掠lín做我ê子民，我mā ē做lín ê上帝。Lín 會知我是上主—lín ê上帝，是tùi埃及人所hō͘ lín擔ê重擔chhōa lín出來ê。
6:8 我chiùchōa應允beh hō͘亞伯拉罕、以撒、雅各hitê地，我beh chhōa lín koh入去hia，kā hitê地賞賜hō͘ lín做產業。我是上主。』」
6:9 摩西ánne對以色列人講，總是，in為tio̍h心內憂悶，mā做苦工，soah m̄肯聽摩西。
6:10 上主吩咐摩西講：
6:11 「你入去kā埃及王法老講，tio̍h准以色列人離開伊ê地。」
6:12 摩西tī上主ê面前講：「祢看，以色列人都m̄聽我ê話，法老ná ē beh聽我chitê嘴舌tun ê人？」
6:13 上主吩咐摩西kah亞倫，tio̍h傳令hō͘以色列人kah埃及王法老，thang chhōa以色列人出埃及地。
6:14 摩西kah亞倫ê家譜
以色列chiahê族長ê名記tī下底：以色列大kiáⁿ流便ê kiáⁿ是哈諾、法路、希斯崙、迦米，chiahê是流便hiahê家。
6:15 西緬ê kiáⁿ是E-mu-el、雅憫、O-hat、雅斤、瑣轄，以及迦南地ê chabó͘ kiáⁿ所生ê掃羅，chiahê是西緬hiahê家。
6:16 利未chiahê kiáⁿ ê名照in ê世系記tī下底：革順、哥轄、米拉利。利未活到一百三十七歲。
6:17 革順ê kiáⁿ照in ê家族：立尼、示每。
6:18 哥轄ê kiáⁿ：暗南、以斯哈、希伯崙、烏薛。哥轄活到一百三十三歲。
6:19 米拉利ê kiáⁿ：抹利、母示。Chiahê是利未hiahê家，照in ê世系。
6:20 暗南娶伊ê阿姑Io-ke-biat做bó͘，她kā伊生亞倫kah摩西。暗南活到一百三十七歲。
6:21 以斯哈ê kiáⁿ：可拉、Ne-he̍k、細基利。
6:22 烏薛ê kiáⁿ：米沙利、以利撒反、Si-thu-lī。
6:23 亞倫娶亞米拿達ê chabó͘ kiáⁿ拿順ê小妹E-lí-se-bah做bó͘，她kā伊生拿答、亞比戶、以利亞撒、以他瑪。
6:24 可拉ê kiáⁿ：亞惜、以利加拿、A-bi-a-sa̍h，chiahê是可拉hiahê家。
6:25 亞倫ê kiáⁿ以利亞撒娶Phu-thi-el ê一个chabó͘ kiáⁿ做bó͘，她kā伊生非尼哈。Chiahê是利未人ê族長，照in ê家族。
6:26 Chitê亞倫、摩西to̍h是上主對in講：「Tio̍h chhōa以色列人照in ê軍隊出埃及地」ê。
6:27 對埃及王法老講beh chhōa以色列人出埃及ê，to̍h是chitê摩西kah亞倫。
6:28 上主命令摩西kah亞倫
當上主tī埃及地對摩西講話ê日，
6:29 上主對摩西講：「我to̍h是上主，我對你所講一切ê話，你lóng tio̍h kā埃及王法老講。」
6:30 摩西tī上主ê面前講：「你看，我是嘴舌tun ê人，法老ná ē beh聽我？」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。