箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Îm-loān ê Tì-miā Khip-ín-la̍t
Góa ê kiáⁿ, lí tio̍h chun-siú góa ê ōe, kā góa ê bēng-lēng khǹg tī sim-lāi.
7:2 Chun-siú góa ê bēng-lēng chiū ē tit tio̍h oa̍h-miā; chun-siú góa ê kà-sī, chhin-chhiūⁿ teh pó-hō͘ ba̍k-chiu-jîn.
7:3 Tio̍h kā in pa̍k tī lí ê chéng-thâu-á, khek tī lí ê sim-lāi.
7:4 Tio̍h tùi tì-hūi kóng, " Lí sī góa ê chí-mōe "; tio̍h kiò chhong-bêng chò lí ê chhin-lâng.
7:5 Tì-hūi ē pó-hō͘ lí siám-phiah îm-hū, siám-phiah kóng phô͘-tháⁿ ōe ê ki-lí.
7:6 Góa bat khiā tī góa chhù ê thang-á piⁿ, tùi thang-á khòaⁿ chhut-.khì.
7:7 Tī gû-gōng ê siàu-liân lâng tiong-kan, góa bêng-bêng khòaⁿ tio̍h chi̍t-ê bû-ti ê siàu-liân-ke,
7:8 Tùi ke-lō͘ keng-kòe, lâi-kàu îm-hū ê chhù-kak, kiâⁿ hit tiâu thàu kàu i ê chhù ê lō͘;
7:9 Tī hông-hun, tī ê-hng, tī àm-sî ê o͘-àm lîm-kàu ê sî.
7:10 Lí khòaⁿ, ū chi̍t-ê chabó͘ lâng tú tio̍h i, sī ki-lí ê táⁿ-pān, ū káu-koài ê sim-su.
7:11 Chit-ê chabó͘ lâng gâu jióng, bô siū iok-sok; i ê kha bô tòa tī chhù.
7:12 Ū sî tī ke-lō͘-.ni̍h, ū sî tī khui-khoah ê só͘-chāi; ū sî tī ta̍k-ê hāng-á kháu teh tng-tán.
7:13 Khîⁿ-tiâu hit-ê siàu-liân lâng kah i chim-chhùi; bô kiàn-siàu ê bīn-sek, tùi i kóng,
7:14 " Góa chia ū pêng-an-chè, kin-á-ji̍t ū siā góa ê goān.
7:15 Só͘-í, góa chhut-lâi kā lí gêng-chiap, pek-chhiat ài beh kìⁿ lí ê bīn, tú-hó tú tio̍h lí.
7:16 Góa í-keng kā siù-hoe ê thán-á kah Ai-gi̍p ê sòaⁿ só͘ chit ū hoe-chōa ê pò͘, chhu tī góa ê bîn-chhn̂g.
7:17 Góa koh ēng bu̍t-io̍h, tîm-hiuⁿ kah jio̍k-kùi, hiù góa ê bîn-chhn̂g.
7:18 Lâi, lán thang hióng-siū ài-chêng kàu boán-chiok, it-ti̍t kàu thiⁿ-kng, lán thang chò-hóe loân-ài khoài-lo̍k.
7:19 In-ūi góa ê chapo͘ lâng bô tī chhù-.ni̍h, chhut-gōa khì chin hn̄g ê só͘-chāi.
7:20 I tòa gîn-tē chhut-.khì, tio̍h kàu goe̍h-îⁿ chiah ē tńg-.lâi. "
7:21 Îm-hū ēng chin chē kî-khiáu ê ōe ín-iú i, ēng phô͘-tháⁿ ê chhùi pek i chò-hóe khì.
7:22 I sûi-sî tòe i khì, chhin-chhiūⁿ gû hông khan-khì thâi, koh chhin-chhiūⁿ gōng lâng tòa só-liān khì siū hêng-hoa̍t.
7:23 Kàu chìⁿ siā ji̍p-khì i ê sim-koaⁿ, chhin-chhiūⁿ chiáu-á ji̍p lô-bāng, i mā m̄-chai che sī ē koan-hē tio̍h i ê sèⁿ-miā.
7:24 Lín chiahê kiáⁿ, taⁿ tio̍h chun-thàn góa, chù-ì thiaⁿ góa só͘ kóng ê ōe.
7:25 Lí ê sim m̄ thang hō͘ i bê-khì, m̄ thang gōng-gōng-á tòe i khì.
7:26 In-ūi i hō͘ chin chē lâng siū-siong tó lo̍h-.khì, koh ū chin chē lâng hō͘ i thâi-sí.
7:27 I ê chhù sī thong-kàu im-hú ê lō͘, chhōa kàu sí-bông ê chhù-the̍h.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。