出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 摩西應講：「祢看，in ēm̄相信我，mā m̄聽我ê話，因為in ē講：『上主m̄ bat對你顯現。』」
4:2 上主對伊講：「Tī你手裡ê是啥物？」摩西講：「是柺á。」
4:3 上主講：「Hiat落去地裡。」摩西一下kā柺á hiat落去，柺a2to̍h變做蛇；摩西to̍h走閃hit尾蛇。
4:4 上主對摩西講：「伸你ê手去掠牠ê尾。」摩西to̍h伸手去掠，蛇tī伊ê手中koh變做柺á。
4:5 Án-ne thang hō͘ in信上主—in ê祖先ê上帝，亞伯拉罕ê上帝、以撒ê上帝、雅各ê上帝，有對你顯現。」
4:6 上主koh對伊講：「Kā你ê手hē tī你ê胸前。」摩西to̍h kā手hē tī胸前，抽出來ê時，你看，伊ê手to̍h生癩ko，白kah親像雪。
4:7 上主koh講：「你koh kā手hē tī你ê胸前。」摩西kā伊ê手hē tī胸前，抽出來ê時，你看，已經復原，kah全身軀ê肉無各樣。
4:8 上主講：「設使in無beh信你，mā無beh信頭一个神跡，to̍h ē信第二个神跡。
4:9 Hit兩 个神跡in若lóng m̄信，mā m̄聽你ê話，你tio̍h tùi河裡舀水，倒tī乾地，你tùi河裡所舀 ê水會 tī乾地變做血。」
4:10 摩西對上主講：「主ah，我平時m̄是ē講話ê人，tùi祢kā祢ê奴僕講話了後mā是ánne，我是嘴舌tun ê人。」
4:11 上主對伊講：「創造人ê嘴ê是啥人？Hō͘人啞口、臭耳聾、目chiu 金、chheⁿmê ·ê，是啥人？Kám m̄是我—上主？」
4:12 Taⁿ做你去，我ē賞賜hō͘你口才，教示你所應該講ê。」
4:13 摩西講：「主ah，祢kah意差啥人，to̍h差伊去！」
4:14 上主對摩西受氣，講：「Kám m̄是有你ê阿兄—利未人亞倫？我知伊是ē講話ê人。Τaⁿ伊出來kā你迎接，伊一下看tio̍h你，心內to̍h歡喜。
4:15 你tio̍h對伊講，kā所應該講ê話傳hō͘伊；我mā ē賞賜hō͘你kah伊有口才，mā ē教示lín所應該行ê tāichì。
4:16 亞倫會替你對人民講話，伊ē對你準做嘴，你ē對伊準做上帝。
4:17 你ê手tio̍h gia̍h一支柺á，用它來行神跡。」
4:18 摩西Tńg來埃及
Αń-ne摩西to̍h去，tńg去伊ê丈人葉忒羅hia，kā伊講：「求你容允我tńg去，看我tī埃及ê兄弟，看in iáu tī ·leh á無。」葉忒羅kā摩西講：「你thang安然去à。」
4:19 上主tī米甸對摩西講：「你tńg去埃及，因為ài害你ê性命ê人lóng死à。」
4:20 摩西chhōa伊ê bó͘ kah兩 个kiáⁿ，hō͘ in騎驢á，tńg去埃及地。摩西手裡gia̍h上主ê柺á。
4:21 上主對摩西講：「你tńg去埃及ê時，tio̍h注意kā我所交tī你ê手ê所有奇事lóng行tī法老ê面前。總是，我ē hō͘伊ê心硬，伊mā無beh放chiahê人民去。
4:22 你tio̍h kā法老講：『上主有ánne講：以色列是我ê kiáⁿ，to̍h是我ê大kiáⁿ。
4:23 我bat對你講：tio̍h tháu放我ê kiáⁿ thang來服事我，你mā m̄准伊去。你看，我behthâi死你ê kiáⁿ，to̍h是你ê大kiáⁿ。』」
4:24 摩西tī路裡，tī客店，上主tú tio̍h伊，beh hō͘伊死。
4:25 摩西ê bó͘ 西坡拉就the̍h一塊利石，割她ê kiáⁿ ê陽物ê皮，hiat tī摩西ê腳前，講：「你是我用割禮ê血換來ê丈夫。」
4:26 上主to̍h放摩西soah，無kā伊thâi死。chabó͘人講：「你是我血ê丈夫，因為割禮ê緣故。」
4:27 上主kā亞倫講：「你去曠野迎接摩西。」伊to̍h去，tī上主ê山tú tio̍h摩西，to̍h kā伊chim。
4:28 摩西kā上主差伊所講ê話kah吩咐伊行ê神跡，lóng對亞倫講。
4:29 摩西kah亞倫to̍h去招集以色列人ê眾長老。
4:30 亞倫kā上主對摩西所講ê話lóng講出來，koh tī人民ê面前行hiahê神跡。
4:31 人民就相信，in聽tio̍h上主照顧以色列人，koh看tio̍h in ê艱苦，就àⁿ頭敬拜。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。