創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Tōa Chúi-chai
Siōng-chú tùi Nó͘-ah kóng, " Lí kah lí choân ke lóng tio̍h ji̍p tōa chûn, in-ūi tī chit sè-tāi ê tiong-kan, Góa khòaⁿ tio̍h lí tī Góa ê bīn-chêng sī gī lâng.
7:2 Kiàn-nā chheng-khì ê chengseⁿ, lí tio̍h tòa chhit chiah kang ê, chhit chiah bó ê; bô chheng-khì ê chengseⁿ, lí tio̍h tòa chi̍t chiah kang ê, chi̍t chiah bó ê.
7:3 Thiⁿ téng ê chiáu mā tio̍h tòa, chhit chiah kang ê, chhit chiah bó ê, thang lâu in ê chéng oa̍h tī choân tē.
7:4 In-ūi koh kòe chhit ji̍t, Góa beh lo̍h hō͘ tī tē-chiūⁿ, sì-cha̍p kang sì-cha̍p mê. Góa beh kā Góa só͘ chō ta̍k chióng ê oa̍h-mi̍h lóng tùi tē-chiūⁿ châu-bia̍t. "
7:5 Nó͘-ah chiū chiàu Siōng-chú só͘ kā i bēng-lēng ê, choân-pō͘ khì kiâⁿ.
7:6 Tng tōa-chúi hoàn-lām tī tē-chiūⁿ ê sî, nó͘-ah la̍k pah hòe.
7:7 Nó͘-ah chiū kah i ê kiáⁿ, i ê bó͘, i ê sim-pū, lóng ji̍p-khì tōa chûn, siám-phiah tōa-chúi.
7:8 Chheng-khì ê chengseⁿ kah bô chheng-khì ê chengseⁿ, poe-chiáu kah tē-chiūⁿ it-chhè ê thâng-thōa,
7:9 lóng chi̍t tùi chi̍t tùi, ū kang ê ū bó ê, lâi-kàu Nó͘-ah hia, chìn-ji̍p tōa chûn; tú chiàu Siōng-chú bēng-lēng Nó͘-ah ê.
7:10 Kòe chhit ji̍t liáu-āu, tōa-chúi hoàn-lām tī tē-chiūⁿ.
7:11 Tng Nó͘-ah la̍k pah hòe, jī-goe̍h cha̍p-chhit ji̍t, hit ji̍t chhim-ian ê chúi-goân lóng li̍h-.khui, thiⁿ mā phòa-khiah.
7:12 Sì-cha̍p kang sì-cha̍p mê, lo̍h hō͘ tī tē-bīn chiūⁿ.
7:13 Tú-tú hit ji̍t, nó͘-ah kah i ê kiáⁿ — Sé-mh, Hâm, Iá-hia̍t kah Nó͘-ah ê bó͘, í-ki̍p i saⁿ-ê sim-pū lóng ji̍p-khì tōa chûn;
7:14 in kah pah-siù kok chiàu i ê lūi, it-chhè ê chengseⁿ kok chiàu i ê lūi, it-chhè tī tē-chiūⁿ sô ê thâng-thōa kok chiàu i ê lūi, it-chhè ū si̍t ê kok chiàu i ê lūi, it-chhè ê poe-chiáu kok chiàu i ê lūi, lóng chìn-ji̍p tōa chûn.
7:15 Kiàn-nā jio̍k-thé lāi-bīn ū oa̍h-khì ê, lóng chi̍t tùi chi̍t tùi, lâi-kàu Nó͘-ah hia, ji̍p-khì tōa chûn.
7:16 Kiàn-nā ji̍p-khì tōa chûn ê, lóng sī ū kang ū bó ê jio̍k-thé, tú chiàu Siōng-tè só͘ bēng-lēng ê. Siōng-chú chiū kā in koaiⁿ tī tōa chûn lāi.
7:17 Tōa chúi hoàn-lām tī tē-chiūⁿ sì-cha̍p kang; chúi tiòng ná koân, hō͘ tōa chûn chhèng phû, chûn chiū lī tē.
7:18 Chúi-sè chin tōa, tī tē-chiūⁿ ti̍t-ti̍t tiòng khí-.lâi; chûn phiau-liû tī chúi-bīn.
7:19 Chúi-sè tī tē-chiūⁿ hui-siông tōa, thian-hā ê koân soaⁿ lóng hō͘ tōa-chúi im-ba̍t.
7:20 Chúi-sè pí soaⁿ ke tiòng-koân cha̍p-gō͘ tiú; soaⁿ lóng hō͘ tōa-chúi im-ba̍t.
7:21 Kiàn-nā tī tē-chiūⁿ ū jio̍k-thé ê tōng-bu̍t, to̍h-sī poe-chiáu, chengseⁿ, cháu-siù kah it-chhè tī tē-chiūⁿ sô ê thâng-thōa, í-ki̍p só͘-ū ê jîn-lūi lóng sí.
7:22 Kiàn-nā tī ta tē ū phīⁿ-khang chhoán-khùi ê seng-lêng lóng sí.
7:23 Kiàn-nā tē-chiūⁿ it-chhè ê oa̍h-mi̍h lóng siū châu-bia̍t; lâng kah chengseⁿ, thâng-thōa, í-ki̍p khong-tiong ê poe-chiáu, in lóng tùi tē-chiūⁿ siū châu-bia̍t, chí ū Nó͘-ah chham hiahê kah i tī chûn-.ni̍h ê lâu-.leh.
7:24 Chúi-sè chin tōa, tī tē-chiūⁿ keng-kòe chi̍t-pah gō͘-cha̍p kang.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。